ಹೋದಷ್ಟೇ ವೇಗವಾಗಿ ಕಿರುತೆರೆಗೆ ವಾಪಸ್ ಆದ ವಿಜಯ್ ಸೂರ್ಯ

ಇತ್ತೀಚೆಗಷ್ಟೇ 'ಅಗ್ನಿಸಾಕ್ಷಿ' ಧಾರಾವಾಹಿಯಿಂದ ಹೊರಬೀಳುವ ಮೂಲಕ ಅಭಿಮಾನಿಗಳಲ್ಲಿ ಅಚ್ಚರಿ ಮೂಡಿಸಿದ್ದರು ನಟ ವಿಜಯ್ ಸೂರ್ಯ. ಇದೀಗ ಹೊಸ ಧಾರಾವಾಹಿಗೆ ಸಜ್ಜಾಗಿದ್ದಾರೆ. ಹಿಂದಿಯಲ್ಲಿ ಯಶಸ್ವಿಯಾಗಿ ಮುನ್ನುಗ್ಗುತ್ತಿರುವ ದೈನಿಕ ಧಾರಾವಾಹಿ 'ಕಸೌಟಿ ಝಿಂದಗಿ ಕೆ' (ಜೀವನದ ಕವಲು ದಾರಿಗಳು) ಕನ್ನಡಕ್ಕೆ ರೀಮೇಕ್ ಆಗುತ್ತಿದೆ.

ಈ ಧಾರಾವಾಹಿಯನ್ನು ಕನ್ನಡಕ್ಕೆ ರೀಮೇಕ್ ಮಾಡುತ್ತಿದ್ದು 'ಪ್ರೇಮಲೋಕ' ಎಂದು ಹೆಸರಿಡಲಾಗಿದೆ. ತಾನು ಹೊಸ ಧಾರಾವಾಹಿಯಲ್ಲಿ ಅಭಿನಯಿಸುತ್ತಿರುವ ಬಗ್ಗೆ ಸ್ವತಃ ವಿಜಯ್ ಖಚಿತಪಡಿಸಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ಅವರು, "ಹೌದು ಹೊಸ ಧಾರಾವಾಹಿಗೆ ಸಹಿ ಹಾಕಿದ್ದೇನೆ. ಮೂರು ಟಿವಿ ವಾಹಿನಿಗಳಿಂದ ನನಗೆ ಆಫರ್ ಬಂದಿತ್ತು. ಆಯ್ಕೆ ಮಾಡುವುದು ಸ್ವಲ್ಪ ಕಷ್ಟವಾಯಿತು. ಈಗ ಒಪ್ಪಿಕೊಂಡಿರುವ ಧಾರಾವಾಹಿ ಮೂಲ ಧಾರಾವಾಹಿಗೆ ಸಿಕ್ಕಷ್ಟೇ ಜನಪ್ರಿಯತೆ ಪಡೆದುಕೊಳ್ಳುತ್ತದೆ. ಸಹಿ ಹಾಕುವುದಕ್ಕೂ ಮುನ್ನ 'ಕಸೌಟಿ' 70 ಎಪಿಸೋಡ್‍ಗಳನ್ನು ನೋಡಿದ್ದೇನೆ" ಎಂದಿದ್ದಾರೆ ವಿಜಯ್. [ಅಗ್ನಿಸಾಕ್ಷಿಯಾಗಿ ಟೆಕ್ಕಿ ಕೈಹಿಡಿದ ವಿಜಯ್ ಸೂರ್ಯ]

ಮೂಲ ಧಾವಾಹಿಯಲ್ಲಿ ಅನುರಾಗ್ ಪೋಷಿಸಿರುವ ಪ್ರಮುಖ ಪಾತ್ರದಲ್ಲಿ ವಿಜಯ್ ಸೂರ್ಯ ಕಾಣಿಸಲಿದ್ದಾರೆ. ಈ ಧಾರಾವಾಹಿಯ 30 ಎಪಿಸೋಡ್‍ಗಳನ್ನು ಮೈಸೂರು ಮಂಜು ನಿರ್ದೇಶಿಸಲಿದ್ದಾರೆ. ಅವರು ಇದುವರೆಗೆ ಅಗ್ನಿಸಾಕ್ಷಿಗೆ ಆ್ಯಕ್ಷನ್ ಕಟ್ ಹೇಳಿದ್ದರು.

ಅಗ್ನಿಸಾಕ್ಷಿ ಧಾರಾವಾಹಿಗೆ ವಿಜಯ್ ಸೂರ್ಯ ಗುಡ್ ಬೈ ಹೇಳಿದ ಬಳಿಕ ಅಭಿಮಾನಿಗಳು ತೀವ ನಿರಾಸೆಗೆ ಒಳಗಾಗಿದ್ದರು. ಇದೀಗ ಅಷ್ಟೇ ವೇಗವಾಗಿ ಮತ್ತೆ ಕಿರುತೆರೆಗೆ ಮರಳಿದ್ದಾರೆ. ಈ ವಾರಾಂತ್ಯದ ವೇಳೆಗೆ ಚಿತ್ರದ ಪ್ರೊಮೊ ಚಿತ್ರೀಕರಣ ನಡೆಯಲಿದ್ದು ಶೀಘ್ರದಲ್ಲೇ ಧಾರಾವಾಹಿ ಆರಂಭವಾಗಲಿದೆ.