ಮದುವೆ ಬಗ್ಗೆ ಮಜವಾಗಿ ಮಾತನಾಡಿದ ಅಪರ್ಣಾ

'ಮದುವೆಯಾಗಿ ಯಾರು ಸುಖವಾಗಿದ್ದಾರೆ ಹೇಳಿ? ಗಂಡನಾದ್ರೂ ಅನುಭವಿಸ್ತಿರ್ತಾನೆ, ಇಲ್ಲಾ ಹೆಂಡತಿನಾದ್ರೂ ಅನುಭವಿಸುತ್ತಿರುತ್ತಾಳೆ. ಇವತ್ತಂತೂ ಮದುವೆ ಅನ್ನೋ ವ್ಯವಸ್ಥೆ ಎಕ್ಕುಟ್ಹೋಗಿದೆ' ಎಂದು ಖ್ಯಾತ ನಿರೂಪಕಿ, ನಟಿ ಅಪರ್ಣಾ ಹೇಳಿದರು. ಅಷ್ಟಕ್ಕೂ ಅಪರ್ಣಾ ಮದುವೆ ಬಗ್ಗೆ ಈ ರೀತಿಯ ಮಾತೇಕೆ ಆಡಿದ್ರು ಗೊತ್ತಾ?

ಅಪರ್ಣಾ ಸೀರಿಯಸ್‌ ಆಗಿ ಈ ರೀತಿ ಹೇಳಿಲ್ಲ. ಸೆಲೆಬ್ರಿಟಿ ಟಾಕ್‌ ಶೋ 'ಸೂಪರ್‌ ಟಾಕ್‌ ಟೈಮ್‌'ನಲ್ಲಿ ಭಾಗವಹಿಸಿದ್ದ ಪ್ರಖ್ಯಾತ ನಿರೂಪಕಿಗೆ ಕಾರ್ಯಕ್ರಮದ ನಿರೂಪಕ ಅಕುಲ್‌ ಬಾಲಾಜಿ 'ಮದುವೆ' ಎಂಬ ವಿಷಯದ ಕುರಿತು ಋಣಾತ್ಮಕ ಮತ್ತು ಧನಾತ್ಮಕ ಅಂಶಗಳನ್ನು ಹೇಳಲು ಟಾಸ್ಕ್ ನೀಡಿದ್ದರು. ಈ ಟಾಸ್ಕ್ ಅನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ ನಟಿ.

ಕಲರ್ಸ್‌ ಸೂಪರ್‌ ವಾಹಿನಿಯ ಫೇಸ್‌ಬುಕ್‌ ಪೇಜ್‌ನಲ್ಲಿರುವ ಈ ವೀಡಿಯೋದಲ್ಲಿ ಅಪರ್ಣಾ ಅವರ ಕನ್ನಡವಂತೂ ಸೂಪರ್‌ ಬಿಡಿ. ಮದುವೆ ಬಗ್ಗೆ ಮಜವಾಗಿ ಮಾತನಾಡಿರುವ ಈ ವೀಡಿಯೋವನ್ನೂ ನೀವು ನೋಡಿ ಎಂಜಾಯ್‌ ಮಾಡಿ. ಅಂದಹಾಗೆ ಅಪರ್ಣಾ ಜತೆಯಲ್ಲಿ ಮಂಡ್ಯ ರಮೇಶ್‌ ಸಹ ಶೋದಲ್ಲಿ ಭಾಗವಹಿಸಿದ್ದಾರೆ. ಕಳೆದ ದಿನಗಳನ್ನು ಮೆಲುಕು ಹಾಕಿದ್ದಾರೆ.



ಅಕುಲ್‌ ಬಾಲಾಜಿ ನಡೆಸಿಕೊಡುವ 'ಸೂಪರ್‌ ಟಾಕ್‌ ಟೈಮ್‌' ಶೋ ಇತ್ತೀಚೆಗಂತೂ ಎಲ್ಲರ ಗಮನ ಸೆಳೆಯುತ್ತಿದೆ. ಈ ಸೆಲೆಬ್ರಿಟಿ ಟಾಕ್‌ ಶೋನಲ್ಲಿ ಭಾಗವಹಿಸುವ ಕಲಾವಿದರು ಪ್ರೇಕ್ಷಕರಿಗೆ ಸಖತ್‌ ಮನರಂಜನೆ ಕೊಡುತ್ತಾರೆ.