ಎಂಜಿನಿಯರಿಂಗ್‌ ಮುಗಿಸಿ ಕೆಲಸಕ್ಕೆ ಹೋಗಿ ಸೆಟಲ್‌ ಆಗಬೇಕು ಎಂದು ಯೋಚಿಸುವ ಈ ಕಾಲದಲ್ಲಿ ಆಶಿಕಾ ಎಂಬ ಚೆಲುವೆ ಮಾತ್ರ ನಾನು ನಟನೆಯಲ್ಲಿ ಮುಂದುವರೆಯುತ್ತೇನೆ ಎಂದು ಕಿರುತೆರೆಗೆ ಎಂಟ್ರಿ ಕೊಟ್ಟಿದ್ದಾರೆ, ಅದು ಕಿರುತೆರೆಯ ಒಂದು ಉತ್ತಮ ಸೀರಿಯಲ್‌ ಮೂಲಕ.
ಬೆಂಗಳೂರಿನ ಖಾಸಗಿ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಈಗಷ್ಟೇ ಓದು ಮುಗಿಸಿರುವ ಆಶಿಕಾಗೆ ನಟನೆ ಎಂಬುದು ಪ್ಯಾಷನ್‌ ಅಂತೆ. ಚಿಕ್ಕವಯಸ್ಸಿನಿಂದಲೂ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಮುಂದಿದ್ದ ಈಕೆ, ಎಂಜಿನಿಯರಿಂಗ್‌ ಓದುತ್ತಿರುವಾಗಲೇ ನಿಹಾರಿಕಾದಲ್ಲಿ ಒಂದು ಸಣ್ಣ ಪಾತ್ರ ಮಾಡಿದ್ದರು. ಈ ಪಾತ್ರ ಇವರನ್ನು ಇಂದು ನಟನೆಯನ್ನು ಕೆರಿಯರ್‌ ಆಗಿ ತೆಗೆದುಕೊಳ್ಳುವಂತೆ ಮಾಡಿದೆ.
ಎಂಜಿನಿಯರಿಂಗ್‌ನಲ್ಲಿ ಉತ್ತಮ ಅಂಕ ಗಳಿಸಿ, ಖಾಸಗಿ ಕಂಪನಿಯಲ್ಲಿ ಕೆಲಸ ಸಿಕ್ಕಿದ್ದರೂ, ಅಲ್ಲಿಗೆ ಹೋಗದೆ ನಟಿಯಾಗಿಯೇ ಇರುತ್ತೇನೆ ಎನ್ನುತ್ತಾರೆ ಆಶಿಕಾ. ''ನನ್ನ ತಾತ ಪಡುಕೋಣೆಯಲ್ಲಿ, ರಂಗ ಕಲಾವಿದರು. ಬಹುರ್ಷ ನನಗೆ ನಟನೆ ಎಂಬುದು ಅವರಿಂದ ಒಲಿದಿದೆ ಅನಿಸುತ್ತದೆ. ನಿಹಾರಿಕಾದಲ್ಲಿ ಒಂದು ಸಣ್ಣ ಪಾತ್ರ ನಿರ್ವಹಿಸಿದ್ದೆ. ಆಮೆಲೆ ಓದು ಮುಗಿದ ಮೇಲೆ ತ್ರೀವೆಣಿ ಸಂಗಮದ ಆಡಿಷನ್‌ನಲ್ಲಿ ಪಾಲ್ಗೊಂಡು ಆಯ್ಕೆಯಾದೆ. ವಿಚಿತ್ರ ಎಂದರೆ ನಾನು ಆಯ್ಕೆಯಾಗಿದ್ದು ಇತ್ತೀಚೆಗೆ ಮೃತಪಟ್ಟ ರಚನಾ ಅವರ ಪಾತ್ರಕ್ಕೆ. ನಾನು ಮೊದಲಿನಿಂದಲೂ ಅವರ ನಟನೆಯನ್ನು ನೋಡಿ ಇಷ್ಟಪಟ್ಟಿದ್ದವಳು. ಈಗ ಅವರು ನಟಿಸುತ್ತಿದ್ದ ಪಾತ್ರದಲ್ಲಿ ನಾನು ನಟಿಸುತ್ತೇನೆ ಎಂದರೆ ನನಗೆ ಎಲ್ಲಿಲ್ಲದ ಖುಷಿ,'' ಎಂದು ಹೇಳುತ್ತಾರೆ ಆಶಿಕಾ.
ಆಶಿಕಾಗೆ ನಟನೆಯ ಗಂಧ ಗಾಳಿಯೂ ಗೊತ್ತಿರಲಿಲ್ಲವಂತೆ, ನಿರ್ದೇಶಕ ತಿಲಕ್‌ ಮತ್ತು ಸೀರಿಯಲ್‌ನ ಸಹ ಕಲಾವಿದರು ಸಾಕಷ್ಟು ಸಹಾಯ ಮಾಡಿದ್ದಾರೆ. ಹಾಗಾಗಿ ಯಾವುದೇ ತೊಂದರೆ ಇಲ್ಲದೆ ನಟಿಸುತ್ತಿದ್ದೇನೆ ಎನ್ನುತ್ತಾರವರು. ಆ್ಯಕ್ಟಿಂಗ್‌ ಕೆರಿಯರ್‌ ತೆಗೆದುಕೊಂಡಾಗ ಮನೆಯಲ್ಲಿ ಆರಂಭದಲ್ಲಿ ವಿರೋಧ ವ್ಯಕ್ತವಾದರೂ, ಈಗ ಆಶಿಕಾ ಅವರ ನಟನೆ ನೋಡಿ ಖುಷಿಯಾಗಿದ್ದಾರಂತೆ. ಇಲ್ಲಿಯೇ ಉತ್ತಮ ಕಲಾವಿದೆಯಾಗಿ, ಒಳ್ಳೊಳ್ಳೆ ಪಾತ್ರದಲ್ಲಿ ನಟಿಸಬೇಕು ಎಂಬ ಕನಸು ಆಶಿಕಾಗಿದೆ.
'ನನ್ನನ್ನು ಈ ಸೀರಿಯಲ್‌ಗೆ ಆಯ್ಕೆ ಮಾಡಿದ ನಿರ್ದೇಶಕರು ಮತ್ತು ನಿರ್ಮಾಪಕರಿಗೆ ಧನ್ಯವಾದ ಹೇಳುತ್ತೇನೆ. ಈಗಾಗಲೇ ಒಂದಷ್ಟು ಕಲಿತಿದ್ದೇನೆ, ಮುಂದಿನ ದಿನಗಳಲ್ಲಿ ಇನ್ನಷ್ಟು ಕಲಿತು ಉತ್ತಮ ಕಲಾವಿದೆಯಾಗುತ್ತೇನೆ.'
-ಆಶಿಕಾ, ನಟಿ