ಡ್ರಾಮಾ ಜ್ಯೂನಿಯರ್ಸ್‌ ಹೊಸ ಸೀಸನ್ ಆರಂಭ

* ಶರಣು ಹುಲ್ಲೂರು

Vijaya Karnataka Web

ಮಕ್ಕಳ ಕನಸಿಗೆ ಸೂಕ್ತ ವೇದಿಕೆಯಾಗಿರುವ ಜೀ ಕನ್ನಡವಾಹಿನಿಯ ಜನಪ್ರಿಯ ಶೋ 'ಡ್ರಾಮಾ ಜ್ಯೂನಿಯರ್‌' ಈಗ ಮತ್ತೊಂದು ಸೀಸನ್‌ನೊಂದಿಗೆ ತಯಾರಾಗಿದೆ. ಕರ್ನಾಟಕದಾದ್ಯಂತ 30 ಜಿಲ್ಲೆಗಳಿಂದ ಪ್ರತಿಭಾವಂತ ಮಕ್ಕಳನ್ನು ಹುಡುಕಿ, 'ಡ್ರಾಮಾ ಜ್ಯೂನಿಯ್‌ ಸೀಸನ್‌ 3'ರ ವೇದಿಕೆಗೆ ಕರೆತರಲಾಗಿದೆ. ಈ ಮಕ್ಕಳು ಕೂಡ ತಮ್ಮ ತುಂಟ ಮಾತುಗಳಿಂದ, ಕ್ಯೂಟ್‌ ಅಭಿನಯದ ಮೂಲಕ ಪ್ರೇಕ್ಷಕರನ್ನು ರಂಜಿಸಲಿದ್ದಾರೆ. ಇದೇ ಅ.20ರಿಂದ ಶುರುವಾಗಲಿರುವ ಕಾರ್ಯಕ್ರಮ ಪ್ರತಿ ಶನಿವಾರ ಮತ್ತು ಭಾನುವಾರದಂದು ರಾತ್ರಿ 9 ಗಂಟೆಗೆ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದೆ.

ಈ ಕುರಿತು ವಾಹಿನಿ ಹೇಳುವುದು ಹೀಗೆ, 'ಡ್ರಾಮಾ ಜ್ಯೂನಿಯರ್‌ ರಿಯಾಲಿಟಿ ಶೋ ಮುಗ್ಧ ಮನಸ್ಸಿನ ಮಕ್ಕಳ ನಟನಾ ಕೌಶಲ್ಯಕ್ಕೆ ಉತ್ತಮ ವೇದಿಕೆ. ಅವರ ಅಭಿನಯ ಸಾಮರ್ಥ್ಯ‌ಕ್ಕೆ ಪ್ರೋತ್ಸಾಹಿಸುತ್ತಲೇ, ಅವರಿಂದಲೇ ವಿಭಿನ್ನ ಪ್ರಯೋಗಗಳನ್ನು ಮಾಡಿಸುತ್ತದೆ. ಅಭಿನಯದ ಜತೆಗೆ ರಂಗಭೂಮಿಯ ಸಾಧ್ಯತೆಗಳನ್ನು ಮತ್ತು ಮಜಲುಗಳನ್ನು ಪರಿಚಯಿಸುತ್ತದೆ. ಅಲ್ಲದೇ, ಸಮಾಜಕ್ಕೆ ಸಂದೇಶವನ್ನೂ ನೀಡುತ್ತಾ ಮನರಂಜನೆ ನೀಡುತ್ತದೆ. ಹಾಗಾಗಿ ಇದೊಂದು ಭಿನ್ನ ಕಾರ್ಯಕ್ರಮ ಅನಿಸಿಕೊಂಡಿದೆ. ಈಗಾಗಲೇ ಯಶಸ್ವಿ ಎರಡು ಸೀಸನ್‌ ಮುಗಿದಿವೆ. ಪ್ರೇಕ್ಷಕರ ಒತ್ತಾಸೆಯಂತೆ ಸೀಸನ್‌ 3 ಶುರು ಮಾಡುತ್ತಿದ್ದೇವೆ. ಇಲ್ಲಿಯೂ ಹಲವು ವಿಶೇಷಗಳು ಇವೆ' ಎಂದಿದೆ.

ಎರಡು ಸೀಸನ್‌ನಲ್ಲಿ ಭಾಗವಹಿಸಿರುವ ಬಹುತೇಕ ಮಕ್ಕಳು ಈಗಾಗಲೇ ಕನ್ನಡ ಚಿತ್ರ ಜಗತ್ತಿನಲ್ಲಿ ಮಿಂಚುತ್ತಿದ್ದಾರೆ. ಹಾಗಾಗಿ ಡ್ರಾಮಾ ಜ್ಯೂನಿಯರ್‌ ವೇದಿಕೆಗೆ ಸ್ಯಾಂಡಲ್‌ವುಡ್‌ ವಿಶೇಷ ಗೌರವ ಕೂಡ ಸಲ್ಲಿಸಿದೆ. 'ಡ್ರಾಮಾ ಜ್ಯೂನಿಯರ್‌ ಕೇವಲ ನಮ್ಮ ದೇಶದಲ್ಲಿ ಮಾತ್ರವಲ್ಲ, ವಿದೇಶಿಗರನ್ನು ಮೆಚ್ಚಿಸಿದ ಶೋ. ರಾಜ್ಯದ ವಿವಿಧ ಜಿಲ್ಲೆಗಳಿಂದ ಮೂವತ್ತು ಮಕ್ಕಳನ್ನು ಈಗಾಗಲೇ ಆಯ್ಕೆ ಮಾಡಿದ್ದೇವೆ. ಈ 30 ಮಕ್ಕಳೂ ಮೆಗಾ ಆಡಿಷನ್‌ನಲ್ಲಿ ಭಾಗಿಯಾಗಲಿದ್ದಾರೆ. ಅವರ ಮಧ್ಯೆ ಮತ್ತೆ ಪೈಪೋಟಿ ನಡೆಯಲಿದೆ' ಎನ್ನುವುದು ವಾಹಿನಿಯ ಮಾತು.

ಎಂದಿನಂತೆ ತ್ರಿವಳಿ ತೀರ್ಪುಗಾರರಾದ ಹಿರಿಯ ನಟಿ ಲಕ್ಷ್ಮಿ, ನಟರಾದ ಮುಖ್ಯಮಂತ್ರಿ ಚಂದ್ರು ಹಾಗೂ ವಿಜಯ ರಾಘವೇಂದ್ರ ಇರುತ್ತಾರೆ. ನಿರೂಪಕ ಮಾಸ್ಟರ್‌ ಆನಂದ್‌ ಅವರ ಮಾತಿನ ಚಟಾಕಿ ಕೂಡ ಮುಂದುವರಿದಿದೆ.