ಜೀ ಕನ್ನಡದಲ್ಲಿ ಜಗ್ಗೇಶ್‌ ನಟನೆಯ 8 ಎಂಎಂ ಸಿನಿಮಾ

* ಶರಣು ಹುಲ್ಲೂರು

Vijaya Karnataka Web

ಹಾಸ್ಯ ಪ್ರಧಾನ ಸಿನಿಮಾಗಳಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದ ಜಗ್ಗೇಶ್‌ ಮೊದಲ ಬಾರಿಗೆ ಸಸ್ಪೆನ್ಸ್‌ ಥ್ರಿಲ್ಲರ್‌ ಕಥೆಯ 8 ಎಂಎಂ ಸಿನಿಮಾದಲ್ಲಿ ನಟಿಸಿದ್ದು, ಈ ಸಿನಿಮಾ ಭಾನುವಾರ (ಮಾ.24) ಮಧ್ಯಾಹ್ನ 3 ಗಂಟೆಗೆ ಜೀ ಕನ್ನಡದಲ್ಲಿ ಪ್ರಸಾರವಾಗಲಿದೆ.

ಈ ಸಿನಿಮಾದ ಟೀಸರ್‌ ಬಿಡುಗಡೆಯಾದಾಗಲೇ 'ಕಾದವನು ಮೇಧಾವಿ, ನುಗ್ಗಿದವನು ಮೂರ್ಖ' ಎಂಬ ಡೈಲಾಗ್‌ ವೈರಲ್‌ ಆಗಿತ್ತು. 'ಅಧಿಕಾರಶಾಹಿ ವ್ಯವಸ್ಥೆ, ವಯಸ್ಸಾದವರ ಅಸಹಾಯಕತೆ ಕುರಿತು 8 ಎಂಎಂ ಸಿನಿಮಾದಲ್ಲಿ ಬಹಳ ಚೆನ್ನಾಗಿ ಹೇಳಲಾಗಿದೆ. ಸರಣಿ ಕೊಲೆಗಳ ಸುತ್ತ ಸಾಗುವ ಈ ಸಿನಿಮಾದ ಮುಖ್ಯ ಥೀಮ್‌ ಗನ್‌ ಕಳ್ಳತನವಾಗುವುದು. ಗನ್‌ ಕದ್ದವನು,ಪೊಲೀಸ್‌ ಅಧಿಕಾರಿ, ಒಬ್ಬ ಪತ್ರಕರ್ತೆ, ಸರಣಿ ಕೊಲೆಗಾರ, ಇವರ ಸುತ್ತ ಕಥೆ ನಡೆಯುತ್ತದೆ. ಕುತೂಹಲದಿಂದ ಸಿನಿಮಾವನ್ನು ನೋಡಿಕೊಂಡು ಹೋಗುವ 8 ಎಂಎಂ ವೀಕ್ಷಕರಿಗೆ ಖಂಡಿತಾ ಇಷ್ಟವಾಗುತ್ತದೆ'ಎನ್ನುತ್ತಾರೆ ಜೀ ಕನ್ನಡದ ಮುಖ್ಯಸ್ಥ ರಾಘವೇಂದ್ರ ಹುಣಸೂರು.

8ಎಂಎಂ ಸಿನಿಮಾವನ್ನು ಹರಿಕೃಷ್ಣ ನಿರ್ದೇಶನ ಮಾಡಿದ್ದಾರೆ. ಜಗ್ಗೇಶ್‌ ನೆಗೆಟಿವ್‌ ಇಮೇಜ್‌ ಇರುವ ಪಾತ್ರದಲ್ಲಿ ನಟಿಸಿದ್ದಾರೆ. ವಸಿಷ್ಠ ಸಿಂಹ ಪೊಲೀಸ್‌ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ. ನಟಿ ಮಯೂರಿ ಪತ್ರಕರ್ತೆಯಾಗಿದ್ದಾರೆ. ಆದಿ ಲೊಕೇಶ್‌, ರಾಕ್‌ಲೈನ್‌ ವೆಂಕಟೇಶ್‌ ಸೇರಿದಂತೆ ಸಾಕಷ್ಟು ಮಂದಿ ಸಿನಿಮಾದಲ್ಲಿ ನಟಿಸಿದ್ದಾರೆ.

ಜಗ್ಗೇಶ್‌ ಅವರು ಡಿಫರೆಂಟ್‌ ಲುಕ್‌ನಲ್ಲಿ, ಬೇರೆ ಥರಹದ ಪಾತ್ರದಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡಿದ್ದಾರೆ. ಅದೇ ಈ ಚಿತ್ರದ ವಿಶೇಷತೆ. ಮನೆ ಮಂದಿಗೆಲ್ಲ ಇಷ್ಟವಾಗುವ ಸಿನಿಮಾ ಇದು.

-ರಾಘವೇಂದ್ರ ಹುಣಸೂರು, ಜೀ ಕನ್ನಡ ಮುಖ್ಯಸ್ಥ