ವೀಕೆಂಡ್ ವಿತ್ ರಮೇಶ್: ವೈವಾಹಿಕ ಜೀವನದ ಕುರಿತ ಪ್ರಶ್ನೆಗೆ ಪ್ರೇಮಾ ಹೇಳಿದ್ದೇನು?

ಬರೋಬ್ಬರಿ ದಶಕಗಳಿಗೂ ಹೆಚ್ಚು ಕಾಲ ಕನ್ನಡ ಚಿತ್ರರಂಗದಲ್ಲಿ ಮಿಂಚಿದ್ದ ನಟಿ ಪ್ರೇಮಾ ಈ ವಾರದ (ಮೇ 04, 2019) 'ವೀಕೆಂಡ್‌ ವಿತ್ ರಮೇಶ್ ಕಾರ್ಯಕ್ರಮಕ್ಕೆ ಬಂದಿದ್ದರು. 'ವೀಕೆಂಡ್ ವಿತ್ ರಮೇಶ್ ಸೀಸನ್ 4' ಕಾರ್ಯಕ್ರಮದ ಮೂರನೇ ಸಂಚಿಕೆಗೆ ಆಗಮಿಸಿದ್ದ ನಟಿ ಪ್ರೇಮಾ ತಮ್ಮ ಜೀವನದ ಏಳು-ಬೀಳುಗಳ ಬಗ್ಗೆ ಶೋದಲ್ಲಿ ಹಲವು ವಿಷಯಗಳನ್ನು ಹಂಚಿಕೊಂಡರು. ಹೀಗಾಗಿ, ಪ್ರೇಮಾ ಜೀವನದ ಅನೇಕ ವಿಷಯಗಳು ಈ ಕಾರ್ಯಕ್ರಮದ ಮೂಲಕ ಹೊರಜಗತ್ತಿಗೆ ತಿಳಿಯಿತು.

ಪ್ರೇಮಾ ಜೀವನದ ಬಗ್ಗೆ ಅನೇಕ ಊಹಾಪೋಹಗಳು ಹರಿದಾಡುತ್ತಿದ್ದವು. ಅವರ ವೈವಾಹಿಕ ಜೀವನ ಹಾಗೂ ಆರೋಗ್ಯದ ಬಗ್ಗೆ ಅನೇಕ ಗಾಸಿಪ್‌ಗಳು ಇದ್ದವು. ಈ ಬಗ್ಗೆ ತಮ್ಮ ಕಾರ್ಯಕ್ರಮದಲ್ಲಿ ರಮೇಶ್ ಪ್ರಶ್ನೆಗಳನ್ನು ಕೇಳಿದ್ದಾರೆ. ಪ್ರೇಮಾ ಈ ಶೋಗೆ ಬಂದಿದ್ದಾರೆ ಎಂದಾಗಲೇ ಅವರ ವೈವಾಹಿಕ ಜೀವನದ ಬಗ್ಗೆ ಏನು ಮಾತನಾಡಬಹುದು ಎನ್ನುವ ಕುತೂಹಲ ಬಹಳಷ್ಟು ಮಂದಿಗೆ ಇತ್ತು. ಆದರೆ, ತಮ್ಮ ಮದುವೆ, ವೈವಾಹಿಕ ಜೀವನದ ನೇರ ಪ್ರಶ್ನೆಗಳಿಗೆ ಪ್ರೇಮಾ ಉತ್ತರಿಸಲಿಲ್ಲ, 'ಮೌನ' ವಹಿಸಿದರು. ಕೊನೆಗೆ 'ನೋ ಕಾಮೆಂಟ್ಸ್‌' ಎಂದಷ್ಟೇ ಉತ್ತರಿಸಿ ಸುಮ್ಮನಾದರು.

ಅಂದಹಾಗೆ, ನಟಿ ಪ್ರೇಮಾ 2006ರಲ್ಲಿ ಉದ್ಯಮಿ ಜೀವನ್ ಅವರನ್ನು ವಿವಾಹ ಆಗಿದ್ದರು. ಮದುವೆ ಕಾರಣದಿಂದ ಸಿನಿಮಾ ನಟನೆಯಿಂದ ಬ್ರೇಕ್ ಪಡೆದುಕೊಂಡಿದ್ದರು. ಆದರೆ, ಹಿಂದು ವಿವಾಹ ಕಾಯ್ದೆ ಸೆಕ್ಷನ್ 13 ಅಡಿಯಲ್ಲಿ ಪರಸ್ಪರ ಒಪ್ಪಿಗೆ ಮೇರೆಗೆ ನಟಿ ಪ್ರೇಮ 2016ರಲ್ಲಿ ವಿಚ್ಛೇದನ ಕೋರಿ ಅರ್ಜಿ ಸಲ್ಲಿಸಿದ್ದರು. ಪ್ರೇಮ ಹಾಗೂ ಪತಿ ಜೀವನ್ ಅಪ್ಪಚ್ಚು ನಡುವಿನ ವೈಮನಸ್ಯ ವಿಚ್ಛೇದನಕ್ಕೆ ಕಾರಣ ಎನ್ನಲಾಗಿದೆ.

ಒಟ್ಟಿನಲ್ಲಿ, ದರ್ಶಕಗಳ ಕಾಲ ಕನ್ನಡ ಚಿತ್ರ ರಸಿಕರಿಗೆ ತಮ್ಮ ಪ್ರಬುದ್ಧ ಅಭಿನಯದ ಮೂಲಕ ಮನರಂಜನೆ ನೀಡಿದ್ದ ನಟಿ ಪ್ರೇಮಾ ಅವರು ಇದೀಗ ನಟನೆಯಿಂದ ಸ್ವಲ್ಪ ದೂರವೇ ಉಳಿದಿದ್ದಾರೆ. ಪಾತ್ರಗಳ ಆಯ್ಕೆಯಲ್ಲಿ ಚೂಸಿಯಾಗಿದ್ದಾರೋ ಅಥವಾ ಬೇರೆ ಯಾವುದೋ ಕಾರಣವಿರಬಹುದು, ಒಟ್ಟಿನಲ್ಲಿ ಪ್ರೇಮಾ ಇತ್ತೀಚೆಗೆ ಯಾವುದೇ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿಲ್ಲ.