'ಶೂಟಿಂಗ್‌ನಲ್ಲಿ ಪಾಲ್ಗೊಳ್ಳೋಕೆ ಕಾತರದ ಜೊತೆಗೆ ಹೆದರಿಕೆಯೂ ಇದೆ' ಎಂದ 'ಲಕ್ಷ್ಮೀ ಬಾರಮ್ಮ' ನಟಿ ಕವಿತಾ ಗೌಡ

ಕವಿತಾ ಗೌಡ ಆರಂಭದಲ್ಲಿ ಕಿರುತೆರೆಯಲ್ಲಿ ಗಮನಸೆಳೆದು ನಂತರ ಬೆಳ್ಳಿತೆರೆಯಲ್ಲಿಯೂ ಮಿಂಚಿದ ನಟಿ. 'ಲಕ್ಷ್ಮೀ ಬಾರಮ್ಮ' ಧಾರಾವಾಹಿ ಅವರಿಗೆ ಬಹಳ ಜನಪ್ರಿಯತೆಯನ್ನು ತಂದುಕೊಟ್ಟಿತ್ತು. ಈ ಮಧ್ಯೆ ಬಿಗ್ ಬಾಸ್‌ಗೂ ಹೋಗಿಬಂದರು ಕವಿತಾ. ಸದ್ಯ ಅವರ ಕೈಯಲ್ಲಿ ಸಾಕಷ್ಟು ಸಿನಿಮಾಗಳಿವೆ. ಆದರೆ, ಕೊರೊನಾ ಲಾಕ್‌ಡೌನ್‌ ಸಂಕಷ್ಟದಿಂದ ಶೂಟಿಂಗ್‌ನಿಂದ ಇಷ್ಟು ದಿನ ದೂರ ಉಳಿದಿದ್ದರು. ಈಗ ಪುನಃ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳಲು ಸಜ್ಜಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರು ಒಂದಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಲಾಕ್‌ಡೌನ್‌ನಿಂದಾಗಿ ಏನೆಲ್ಲ ಮಿಸ್ ಮಾಡಿಕೊಂಡರು ಎಂಬುದರ ಕುರಿತಾಗಿಯೂ ಅವರು ಮಾತನಾಡಿದ್ದಾರೆ.

ಶೂಟಿಂಗ್‌ಗಾಗಿ ನಾನು ಕಾದಿದ್ದೇನೆ
ಶೂಟಿಂಗ್‌ ಮಾಡೋಕೆ ಸರ್ಕಾರ ಏನೋ ಅನುಮತಿ ನೀಡಿದೆ. ಆದರೆ, ಇಂತಹ ಪರಿಸ್ಥಿತಿಯಲ್ಲಿ ಶೂಟಿಂಗ್ ಮಾಡುವುದು ಅಷ್ಟು ಸುಲಭವೇ? 'ಸರ್ಕಾರ ಶೂಟಿಂಗ್‌ಗೆ ಅನುಮತಿ ನೀಡಿದ್ದರೂ, ಜನರು ಇನ್ನೂ ಭಯದಲ್ಲೇ ಇದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ, ರಸ್ತೆಗಳಲ್ಲಿ ಶೂಟಿಂಗ್ ಮಾಡುವಾಗ, ಎಲ್ಲಿ ಕೊರೊನಾ ಹಬ್ಬುತ್ತದೆಯೋ ಎಂಬ ಆತಂಕ ಅವರಲ್ಲಿ ಇದೆ. ಸದ್ಯ ಒಳಾಂಗಣ ಚಿತ್ರೀಕರಣಕ್ಕೆ ಮೊದಲು ಪ್ಲ್ಯಾನ್ ಮಾಡಿಕೊಂಡಿದ್ದೇವೆ. ನಾನು ಚಿತ್ರೀಕರಣ ಆರಂಭವಾಗುವುದನ್ನೇ ಕಾತುರದಿಂದ ಕಾಯುತ್ತಿದ್ದೇನೆ. ಕೊಂಚ ಹೆದರಿಕೆ ಕೂಡ ಇದೆ. ಕ್ಯಾಮರಾ ಮುಂದೆ ಚಿತ್ರೀಕರಣ ಮಾಡುವಾಗ ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವುದು ತುಸು ಕಷ್ಟ' ಎಂದು ಅವರು ಹೇಳುತ್ತಾರೆ.

ನಟನೆಗೆ ಹಿರಿತೆರೆ-ಕಿರುತೆರೆ ಎಂಬ ವ್ಯತ್ಯಾಸ ಇಲ್ಲ
'ನಾನು ನಟನೆಯನ್ನು ಪ್ರೀತಿ ಮಾಡುತ್ತೇನೆ. ನನ್ನ ವೃತ್ತಿಜೀವನದಲ್ಲಿ ನಾನು ಮಾಡಿರುವ ಕೆಲಸದ ಬಗ್ಗೆ ಖುಷಿ ಇದೆ. ಇದೊಂದು ಅದ್ಭುತ ಜರ್ನಿಯಾಗಿದೆ. ಹಿರಿತೆರೆಯಾಗಲಿ, ಕಿರುತೆರೆಯಾಗಲಿ ನಟನೆ ಎಂಬುದು ಯಾವಾಗಲೂ ಒಂದೇ. ಆದರೆ, ಪಾತ್ರಗಳು ಬೇರೆ ಬೇರೆಯಾಗಿರುತ್ತವೆ. ಧಾರಾವಾಹಿಯಲ್ಲಿ ಕೆಲಸ ಮಾಡುವಾಗ ತಿಂಗಳು ಪೂರ್ತಿ ಶೂಟಿಂಗ್ ಮಾಡುತ್ತಿದ್ದೆವು. ಸಿನಿಮಾಗಳಲ್ಲಿ ವಿಭಿನ್ನ ಪಾತ್ರಗಳನ್ನು ಮಾಡುವುದಕ್ಕೆ ಅವಕಾಶ ಸಿಗುತ್ತಿತ್ತು. ಆದರೆ, ಧಾರಾವಾಹಿಯಲ್ಲಿ ಒಂದೇ ಪಾತ್ರವನ್ನು ತುಂಬ ಸಮಯದವರೆಗೂ ನಿಭಾಯಿಸಬೇಕಿತ್ತು' ಎಂದಿದ್ದಾರೆ ಅವರು.

ಮೇಕಪ್ ವಿಚಾರವಾಗಿ ಬೇಸರ ಹೊರಹಾಕಿದ 'ಲಕ್ಷ್ಮೀ ಬಾರಮ್ಮ' ಧಾರಾವಾಹಿ ನಟಿ, ಬಿಗ್ ಬಾಸ್ ಸ್ಪರ್ಧಿ ಕವಿತಾ ಗೌಡ!

ಜಿಮ್ ಮಿಸ್ ಮಾಡಿಕೊಂಡ ಕವಿತಾಕೊರೊನಾ ಕಾರಣದಿಂದ ಅವರ ಎರಡು ಸಿನಿಮಾಗಳ ಕೆಲಸಗಳು ಸದ್ಯಕ್ಕೆ ನಿಂತಿವೆ. ಅದರಲ್ಲಿ ಒಂದು 'ಹುಟ್ಟುಹಬ್ಬದ ಶುಭಾಶಯಗಳು', ಮತ್ತೊಂದು 'ಗೋವಿಂದ ಗೋವಿಂದ'. ಆ ಸಿನಿಮಾಗಳ ಕುರಿತು ಮಾತನಾಡುವ ಅವರು, 'ಹುಟ್ಟುಹಬ್ಬದ ಶುಭಾಶಯಗಳು ಚಿತ್ರವು ಸಸ್ಪೆನ್ಸ್ ಮಾದರಿಯ ಸಿನಿಮಾವಾಗಿದೆ. 'ಗೋವಿಂದ ಗೋವಿಂದ' ಚಿತ್ರವು ರೊಮ್ಯಾಂಟಿಕ್ ಕಾಮಿಡಿ ಮಾದರಿಯಲ್ಲಿದೆ. ಎರಡು ಸಿನಿಮಾಗಳು ಸಂಪೂರ್ಣವಾಗಿ ಬೇರೆ ಬೇರೆ ಶೈಲಿಯಲ್ಲಿವೆ. ಇನ್ನು, ಕೊರೊನಾ ಕಾರಣದಿಂದ ಟ್ರೆಕ್ಕಿಂಗ್, ಸೈಕ್ಲಿಂಗ್‌ ಹಾಗೂ ಜಿಮ್ ಅನ್ನು ಸಖತ್ ಮಿಸ್ ಮಾಡಿಕೊಳ್ಳುತ್ತಿದ್ದೇನೆ' ಎನ್ನುತ್ತಾರೆ ಕವಿತಾ.