'ನಂ.1 ಯಾರೀ ವಿತ್ ಶಿವಣ್ಣ' ಶೋಗೆ ಶೀಘ್ರದಲ್ಲೇ ತೆರೆ

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ನಡೆಸಿಕೊಡುತ್ತಿರುವ ವೀಕೆಂಡ್ ಚಾಟ್ ಶೋ 'ನಂ.1 ಯಾರೀ ವಿತ್ ಶಿವಣ್ಣ' ಕಾರ್ಯಕ್ರಮಕ್ಕೆ ಶೀಘ್ರದಲ್ಲೇ ತೆರೆಬೀಳುತ್ತಿದೆ. ಫೆಬ್ರವರಿ 25ಕ್ಕೆ ಈ ಶೋ ಆರಂಭವಾಗಿತ್ತು. ಇದುವರೆಗೆ 6 ಸಂಚಿಕೆಗಳು ಮಾತ್ರ ಪ್ರಸಾರವಾಗಿವೆ. ಈ ಭಾನುವಾರ (ಏ.8) ರಾತ್ರಿ 8ಕ್ಕೆ ಹೊಸ ಎಪಿಸೋಡ್ ಪ್ರಸಾರವಾಗುತ್ತಿದೆ.

ಇದುವರೆಗೆ ಈ ಕಾರ್ಯಕ್ರಮದಲ್ಲಿ ತಾರೆಗಳಾದ ಶ್ರುತಿ ಹರಿಹರನ್, ಚಿಕ್ಕಣ್ಣ, ಆರ್ಯ, ಉಪೇಂದ್ರ, ಗುರುಕಿರಣ್, ಶ್ರದ್ಧಾ ಶ್ರೀನಾಥ್, ದಿಗಂತ್, ಯೋಗೀಶ್ ಮತ್ತು ಧನಂಜಯ್ ಭಾಗವಹಿಸಿ ತಮ್ಮ ಬದುಕಿನ ಹಲವಾರು ಸಂಗತಿಗಳನ್ನು ತೆರೆದಿಟ್ಟಿದ್ದಾರೆ.

ಇನ್ನು 7 ಸಂಚಿಕೆಗಳು ಪ್ರಸಾರವಾಗುತ್ತಿದ್ದಂತೆ ಕಾರ್ಯಕ್ರಮಕ್ಕೆ ತೆರೆಬೀಳಲಿದೆ. ಕಾರ್ಯಕ್ರಮ ಇಷ್ಟು ಬೇಗ ಮುಗಿಯಲು ಕಾರಣವೂ ಇಲ್ಲದಿಲ್ಲ. ಇದೊಂದು ಸ್ಪಾನ್ಸರ್ಡ್ ಕಾರ್ಯಕ್ರಮವಾದ ಕಾರಣ 13 ಸಂಚಿಕೆಗಳಿಗೆ ಮಾತ್ರ ಪೂರ್ವನಿರ್ಧಾರ ಮಾಡಲಾಗಿತ್ತು. ಹಾಗಾಗಿ ಕಾರ್ಯಕ್ರಮವನ್ನು 13 ಎಪಿಸೋಡ್‌ಗಳಿಗೆ ಮುಗಿಸಲಾಗುತ್ತಿದೆ ಎಂದಿವೆ ವಾಹಿನಿ ಮೂಲಗಳು.

ಮುಂದಿನ ಸಂಚಿಕೆಗಳಲ್ಲಿ ಪರುಲ್ ಯಾದವ್ ಮತ್ತು ರಮೇಶ್ ಅರವಿಂದ್ ಭಾಗಿಯಾಗಲಿದ್ದಾರೆ. ತಮ್ಮ ಜೀವನದ ಅಮೂಲ್ಯ ಸಂಗತಿಗಳನ್ನು ರಮೇಶ್ ಹಂಚಿಕೊಳ್ಳಲಿದ್ದಾರೆ. ಇದೇ ಸಂಚಿಕೆಯಲ್ಲಿ ಕೆಲವು ಆಟಗಳ ಮೂಲಕವೂ ಅವರು ಕಿರುತೆರೆ ವೀಕ್ಷಕರನ್ನು ರಂಜಿಸಲಿದ್ದಾರೆ.

ಕಿಚ್ಚ ಸುದೀಪ್ ಹಾಗೂ ನಿರ್ದೇಶಕ ಪ್ರೇಮ್ ಸಹ ಭಾಗಿಯಾಗಲಿದ್ದಾರೆ. ಶಿವಣ್ಣ ಮತ್ತು ಸುದೀಪ್ ಒಟ್ಟಿಗೆ 'ವಿಲನ್' ಚಿತ್ರದಲ್ಲಿ ಅಭಿನಯಿಸುತ್ತಿರುವುದು ಗೊತ್ತೇ ಇದೆ. ಈ ಎಪಿಸೋಡ್ ಅಂತೂ ವೀಕ್ಷಕರನ್ನು ನಕ್ಕು ನಗಿಸುವುದರಲ್ಲಿ, ಮನರಂಜನೆಯ ಮಹಾಪೂರ ಹರಿಸುವುದಲ್ಲಿ ಯಾವುದೇ ಅನುಮಾನವಿಲ್ಲ ಎಂದಿವೆ ಮೂಲಗಳು.