ಕಿರುತೆರೆಯಲ್ಲಿ ಆಪರೇಷನ್ ಅಲಮೇಲಮ್ಮ ಪ್ರೀಮಿಯರ್

ಇದೇ ಮೊದಲ ಬಾರಿಗೆ ಸೂಪರ್ ಹಿಟ್ ಚಲನಚಿತ್ರ 'ಆಪರೇಷನ್ ಅಲಮೇಲಮ್ಮ' ಕಿರುತೆರೆಯಲ್ಲಿ ಮೂಡಿಬರುತ್ತಿದೆ. ಇದೇ ಭಾನುವಾರ (ನ.19) ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಸಂಜೆ 5 ಗಂಟೆಗೆ ಪ್ರಸಾರವಾಗಲಿದೆ 'ಅಲಮೇಲಮ್ಮ'.

'ಸಿಂಪಲ್ ಆಗಿ ಒಂದು ಲವ್ ಸ್ಟೋರಿ' ಖ್ಯಾತಿಯ ಸುನಿ ನಿರ್ದೇಶನದಲ್ಲಿ ಮೂಡಿಬಂದಿರುವ ಸಿನಿಮಾ ಇದು. ರಿಷಿ, ಶ್ರದ್ಧಾ ಶ್ರೀನಾಥ್, ರಾಜೇಶ್ ನಟರಂಗ ಚಿತ್ರದ ಪಾತ್ರವರ್ಗದಲ್ಲಿದ್ದಾರೆ. ಈ ಸಿನಿಮಾ ಮೂಲಕ ರಿಷಿ ಸ್ಯಾಂಡಲ್‌ವುಡ್‌ಗೆ ಪರಿಚಿತರಾಗಿದ್ದಾರೆ.

ಈ ಚಿತ್ರದಲ್ಲಿ ನಾಯಕ ಪರಮೇಶ್‌ ಅಲಿಯಾಸ್‌ ಪರ್ಮಿ ( ರಿಷಿ) ಬ್ರಾಂಡೆಡ್‌ ವಸ್ತುಗಳ ಅತೀ ಮೋಹಿ. ಆದರೆ ಅವನೊಬ್ಬ ತರಕಾರಿ ಹರಾಜು ಹಾಕುವ ಸಾಮಾನ್ಯಯುವಕ. ಹೇಗೋ ನಕಲಿ ಬ್ರಾಂಡೆಡ್‌ ವಸ್ತುಗಳನ್ನು ಧರಿಸಿಕೊಂಡು ನಾಯಕಿ ಅನನ್ಯ ಟೀಚರ್‌ (ಶ್ರದ್ಧಾ ಶ್ರೀನಾಥ್‌)ಳನ್ನು ಲವ್ವನಲ್ಲಿ ಬೀಳಿಸಿಕೊಂಡಿರುತ್ತಾನೆ. ಈ ಲವ್‌, ಕೆಲಸ, ಬ್ರಾಂಡೆಡ್‌ ವಸ್ತುಗಳ ಮೋಹ ಇದೆಲ್ಲದರ ಜತೆ ಉದ್ಯಮಿಯ ಮಗನ ಅಪಹರಣ ಪ್ರಕರಣದೊಳಗೆ ಸಿಲುಕಿ, ತನ್ನನ್ನು ನಿರಪರಾಧಿ ಎಂದು ಸಾಬೀತುಪಡಿಸಿಕೊಳ್ಳಲು ಒದ್ದಾಡುವುದೇ ಈ ಸಿನಿಮಾದ ಕತೆ.