ಕಿರುತೆರೆಯ ಅದೃಷ್ಟ ಪರೀಕ್ಷೆಯಲ್ಲಿ ಪಾಸ್ ಆದ 'ಪಾರು' ಧಾರಾವಾಹಿ ನಟಿ ಮಾನ್ಸಿ ಜೋಶಿ!

ಪ್ರಸ್ತುತ 'ಪಾರು' ಧಾರಾವಾಹಿಯಲ್ಲಿ ಅನುಷ್ಕಾ ಪಾತ್ರದಲ್ಲಿ ನಟಿಸುತ್ತಿರುವ ನಟಿ ಮಾನ್ಸಿ ಜೋಶಿ ಈಗ ತೆಲುಗಿನ ಧಾರಾವಾಹಿಯೊಂದರಲ್ಲಿ ಅಭಿನಯಿಸುತ್ತಿದ್ದಾರೆ. ಇದು ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತಿರುವ 'ಕಸ್ತೂರಿ ನಿವಾಸ' ಸೀರಿಯಲ್‌ನ ರಿಮೇಕ್ ಆಗಿದೆ. ಈ ಧಾರಾವಾಹಿಯಲ್ಲಿ ಮಾನ್ಸಿ ಲೀಡ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಮಾನ್ಸಿ ಜೋಶಿ ತಂಗಿ ಕೂಡ ನಟಿ!
ಈಗಾಗಲೇ 250ಕ್ಕೂ ಅಧಿಕ ಡಾನ್ಸ್ ಶೋ ನೀಡಿರುವ ಮಾನ್ಸಿ ಜೋಶಿ ಅವರ ತಂಗಿ ಇಂಚರಾ ಜೋಶಿ ಕೂಡ ನಟಿ. ತಂಗಿ ನಟಿಸುತ್ತಿದ್ದರಿಂದ ಅವರಿಗೂ ಕೂಡ ನಟಿಸಲು ಅವಕಾಶ ಬಂತು. ಅದೃಷ್ಟ ಪರೀಕ್ಷೆ ಮಾಡೋಣ ಎಂದುಕೊಂಡು ಕಿರುತೆರೆಗೆ ಬಂದ ಮಾನ್ಸಿ ಅವರು ಈಗ ಕನ್ನಡದಲ್ಲಿ ಮನೆ ಮಾತಾಗಿದ್ದಾರೆ.

ಮಾನ್ಸಿ ಜೋಶಿ ಕಿರುತೆರೆಗೆ ಕಾಲಿಟ್ಟು 2 ವರ್ಷ
'ಬಿಳಿ ಹೆಂಡ್ತಿ ಧಾರಾವಾಹಿಯಲ್ಲಿ ಮೊದಲು ನಟಿಸಿದೆ, ಆಮೇಲೆ 'ರಾಧಾ ರಮಣ', 'ನಾಯಕಿ', 'ಪಾರು' ತಮಿಳಿನ ಒಂದು ಧಾರಾವಾಹಿಯಲ್ಲಿ ನಟಿಸಿದ್ದೇನೆ. ಕೊರೊನಾ ವೈರಸ್ ಇರೋದರಿಂದ ತಮಿಳಿನ ಸೀರಿಯಲ್‌ನ್ನು ಅರ್ಧದಲ್ಲೇ ಬಿಡುವಂತಾಯಿತು. ಪಾರು ಧಾರಾವಾಹಿಯಲ್ಲಿ ಒಂದಷ್ಟು ದಿನ ಶೂಟಿಂಗ್, ಆಮೇಲೆ ತಮಿಳಿನಲ್ಲಿ ಶೂಟಿಂಗ್ ಮಾಡೋದು ಕಷ್ಟವಾಗುತ್ತಿತ್ತು. ಆಗ ತಮಿಳುನಾಡಿನಲ್ಲಿ ಕೊರೊನಾ ಜಾಸ್ತಿ ಇದ್ದಿದ್ದರಿಂದ ನಾನು ನನ್ನ ಮನೆಯವರಿಗೂ ಸಮಸ್ಯೆ ತಂದಿಡಲು ಇಷ್ಟವಿರಲಿಲ್ಲ. ಹೀಗಾಗಿ ಅದನ್ನು ಅರ್ಧದಲ್ಲಿಯೇ ಬಿಟ್ಟೆ. ನಾನು ಕಿರುತೆರೆಗೆ ಕಾಲಿಟ್ಟು 2 ವರ್ಷಗಳಾಗುತ್ತ ಬಂತು' ಎಂದು ಮಾನ್ಸಿ ಜೋಶಿ ಹೇಳಿದ್ದಾರೆ.

ಏಕಕಾಲಕ್ಕೆ 2 ಧಾರಾವಾಹಿಯಲ್ಲಿ ಮಾನ್ಸಿ ಜೋಶಿ
'ಏಕಕಾಲಕ್ಕೆ ಕನ್ನಡದಲ್ಲಿ ವಿಲನ್ ಪಾತ್ರ, ತೆಲುಗಿನಲ್ಲಿ ಹೀರೋಯಿನ್ ಆಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ಇನ್ನು ಹೀರೋಯಿನ್ ಪಾತ್ರ ಅಂದರೆ ಅಳುಮುಂಜಿ ಅಂತ ಹೇಳೋದುಂಟು. ಆದರೆ ತೆಲುಗಿನಲ್ಲಿ ಎಲ್ಲೆಲ್ಲಿ ತಪ್ಪು ನಡೆಯುತ್ತದೆಯೋ ಅಲ್ಲಿಯೇ ಸರಿಯಾಗಿ ತಿರುಗಿಸುವ ಕೊಡುವ ಹಾಗೆ, ತಪ್ಪು ತಿದ್ದುವ ರೀತಿಯಲ್ಲಿ ನನ್ನ ಪಾತ್ರವಿದೆ. ಹೀಗಾಗಿ ಇದು ನನಗೆ ತುಂಬ ಖುಷಿಯಾಯ್ತು. ಕಿರುತೆರೆಗೆ ಬಂದಾಗಿನಿಂದ ಒಂದಾದ ಮೇಲೆ ಒಂದರಂತೆ ಪ್ರಾಜೆಕ್ಟ್ ಮಾಡುತ್ತಿದ್ದೇನೆ. ನಿಜಕ್ಕೂ ನಾನು ಪುಣ್ಯ ಮಾಡಿದ್ದೇನೆ ಎಂದುಕೊಳ್ತೀನಿ. ಜನರ ಪ್ರೀತಿ-ವಿಶ್ವಾಸ, ದೇವರ ದಯೆಯಿಂದ ಇದೆಲ್ಲ ಸಾಧ್ಯವಾಗಿದೆ' ಎಂದು ಮಾನ್ಸಿ ಜೋಶಿ ಖುಷಿ ಹಂಚಿಕೊಂಡಿದ್ದಾರೆ.

Also Read-ಸಮಸ್ಯೆ ಪರಿಹರಿಸಿಕೊಳ್ಳಲು ಪೊಲೀಸರ ಮೊರೆ ಹೋದ 'ಪಾರು' ಧಾರಾವಾಹಿ ನಟಿ ಮಾನಸಿ ಜೋಶಿ!

ಯಶಸ್ಸಿನ ಬಗ್ಗೆ ಮಾನ್ಸಿ ಮಾತು!
'ನಾವು ಹೇಗಿರುತ್ತವೆಯೋ ಅದರ ಮೇಲೆ ಬದುಕು ನಿರ್ಧಾರವಾಗುತ್ತದೆ. ನಾವು ವಿಧೇಯ, ಪ್ರಾಮಾಣಿಕತೆಯಿಂದ ಇದ್ದರೆ ಯಶಸ್ಸು, ಅವಕಾಶಗಳು ಸಿಕ್ಕೇ ಸಿಗುತ್ತವೆ. ನನ್ನನ್ನು ಧಾರಾವಾಹಿಯಲ್ಲಿ ಹಾಕಿಕೊಳ್ಳಿ ಅಂತ ಅನೇಕ ತಂತ್ರಜ್ಞರು ಹೇಳಿದ್ದಾರೆ. ಇದನ್ನೆಲ್ಲ ನೋಡಿದಾಗ ತುಂಬ ಖುಷಿಯಾಗುತ್ತದೆ. ನನಗೆ ತೆಲುಗು ತಮಿಳು ಭಾಷೆ ಬರುತ್ತಿರಲಿಲ್ಲ. ಹೀಗಿದ್ದಾಗ ಅವರು ತುಂಬ ಮುತುವರ್ಜಿ ವಹಿಸಿ ನನ್ನನ್ನು ಕೂರಿಸಿಕೊಂಡು ಸೀನ್ ಏನು ಅಂತ ಹೇಳುತ್ತಿದ್ದರು. ನನಗೆ ಎಲ್ಲ ಕಡೆಯಿಂದ ಒಳ್ಳೆಯ ಸಹಕಾರ ಇದೆ' ಎಂದು ಮಾನ್ಸಿ ಜೋಶಿ ಹೇಳಿದ್ದಾರೆ.