ಪ್ರಸಾರವಾಗಲಿದೆ 'ರಾಮ ಭಕ್ತ ಹನುಮಂತ' ಧಾರಾವಾಹಿ, ಯಾವಾಗ? ಎಲ್ಲಿ?

ಪೌರಾಣಿಕ ಧಾರಾವಾಹಿಗಳನ್ನು ಇಷ್ಟಪಡುವ ವೀಕ್ಷಕರಿಗೆ ಇದೀಗ ಮತ್ತೊಂದು 'ರಾಮಭಕ್ತ ಹನುಮಂತ' ನೋಡುವ ಅವಕಾಶ ಸಿಕ್ಕಿದೆ. ಇದೇ ಅಕ್ಟೋಬರ್ 5, ಸೋಮವಾರ ದಿಂದ ಸಂಜೆ 5.30 ಕ್ಕೆ ಪ್ರಸಾರವಾಗಲಿರುವ ಈ ಧಾರಾವಾಹಿ ಬಾಲ ಹನುಮಂತನು ರಾಮಭಕ್ತನಾಗಿ ಪರಿವರ್ತನೆಯಾಗುವ ಕತೆಯನ್ನು ಹೇಳಲಿದೆ.

ಹನುಮಂತ ತನ್ನ ಅಪಾರ ಶಕ್ತಿ, ರಾಮನ ಭಕ್ತಿಯಿಂದಾಗಿ ಭಾರತೀಯರ ಮನೆ ಮನದ ಆರಾಧ್ಯ ದೈವವಾಗಿದ್ದಾನೆ. ಹನುಮನೆಂದರೆ ಸ್ಫೂರ್ತಿ. ಹನುಮನ ಲೀಲೆಗಳು ಹೊಸ ಸಾಹಸಗಳಿಗೆ ಪ್ರೇರಣೆ. ಬಾಲ ಹನುಮಂತನು ಬಹಳ ಮುಗ್ಧ, ಅವನ ನಡೆ ನುಡಿಗಳು ಆಕರ್ಷಕ, ಗಾಳಿಯಷ್ಟೇ ವೇಗವಾಗಿ ಹಾರಬಲ್ಲ ಶಕ್ತಿಶಾಲಿ. ಬಾಲ ಹನುಮಂತನ ಮೇಲೆ ಆತನ ತಾಯಿ ಅಂಜನಿಯ ಅತ್ಯಂತ ಪ್ರಭಾವ ಗಾಢವಾದುದು. ಹನುಮಂತನ ವ್ಯಕ್ತಿತ್ವ ರೂಪಿಸುವಲ್ಲಿ ತಾಯಿಯದು ಅತ್ಯಂತ ಪ್ರಮುಖ ಪಾತ್ರ.

ಹನುಮಂತನ ಎಲ್ಲ ಲೀಲೆಗಳನ್ನೂ, ವಾಲಿ ಸುಗ್ರೀವ, ರಾಮರೊಂದಿಗೆ ಹನುಮಂತನ ಜೀವನ ಪ್ರಯಾಣವನ್ನೂ ಈ ಧಾರಾವಾಹಿ ಶಕ್ತಿಯುತವಾಗಿ ಬಿಂಬಿಸುತ್ತದೆ. ಹಲವು ಐತಿಹಾಸಿಕ ಮತ್ತು ಪೌರಾಣಿಕ ಧಾರಾವಾಹಿಗಳನ್ನು ಆನಂದಿಸುತ್ತಿರುವ ಜೀ ಕನ್ನಡ ವೀಕ್ಷಕರಿಗೆ ಇದೀಗ ಈ ಧಾರಾವಾಹಿ ಮತ್ತಷ್ಟು ಮನರಂಜನೆ ನೀಡುವುದರಲ್ಲಿ ಸಂಶಯವಿಲ್ಲ.

ರಾಮಭಕ್ತ ಹನುಮಂತ ಧಾರಾವಾಹಿ ಪ್ರಾರಂಭ ಕುರಿತು ಜೀ ಕನ್ನಡ ಬ್ಯುಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರು, “ಜೀ ಕನ್ನಡ ಕಿರುತೆರೆಯಲ್ಲಿ ಹಲವು ಪ್ರಥಮಗಳನ್ನು ಸಾಧಿಸಿದೆ. ಜನರ ಅಭಿರುಚಿಗೆ ಅನುಗುಣವಾಗಿ ಫಿಕ್ಷನ್ ಹಾಗೂ ನಾನ್-ಫಿಕ್ಷನ್ ಕಾರ್ಯಕ್ರಮಗಳನ್ನು ರೂಪಿಸಿದ್ದು ಹಲವು ದಾಖಲೆಗಳನ್ನು ನಿರ್ಮಿಸಿದೆ. ಈ ನಿಟ್ಟಿನಲ್ಲಿ ರಾಮಭಕ್ತ ಹನುಮಂತ ಧಾರಾವಾಹಿ ಕೂಡಾ ಜನರನ್ನು ರಂಜಿಸುತ್ತದೆ ಎಂಬ ಭರವಸೆ ನಮ್ಮದು” ಎಂದರು.

Also Read-ವೀಕ್ಷಣೆಯಲ್ಲಿ ವಿಶ್ವ ದಾಖಲೆ ಸೃಷ್ಟಿಸಿದ ಪೌರಾಣಿಕ ಧಾರಾವಾಹಿ ‘ರಾಮಾಯಣ’