ಭಾರತಿ ವಿಷ್ಣುವರ್ಧನ್
1966ರಿಂದಲೇ ಅಭಿನಯ ಆರಂಭಿಸಿದ್ದ ಭಾರತಿ ವಿಷ್ಣುವರ್ಧನ್ ಕಿರುತೆರೆ ಮತ್ತು ಹಿರಿತೆರೆ ಎರಡರಲ್ಲೂ ಮಿಂಚಿದ್ದರು. 50 ವರ್ಷಗಳ ಸಿನಿಪಯಣದಲ್ಲಿ 150 ಸಿನಿಮಾಗಳಲ್ಲಿ ನಟಿಸಿದ ಕೀರ್ತಿ ಭಾರತಿ ಅವರದ್ದು. 100 ಕನ್ನಡ ಸಿನಿಮಾಗಳ ಹೊರತಾಗಿ ಹಿಂದಿ, ತಮಿಳು, ತೆಲುಗು, ಮಲಯಾಳಂ ಸಿನಿಮಾಗಳಲ್ಲೂ ಕಾಣಿಸಿಕೊಂಡಿದ್ದಾರೆ. ಐತಿಹಾಸಿಕ, ಪೌರಾಣಿಕ, ರೋಮ್ಯಾಂಟಿಕ್, ವಿದ್ಯಾರ್ಥಿಯಾಗಿಯೂ ಕೂಡ ವಿಧ ವಿಧದ ಪಾತ್ರಗಳಿಗೆ ಬಣ್ಣ ಹಚ್ಚಿದ್ದಾರೆ ಭಾರತಿ. ಭಾರತ ಸರ್ಕಾರದಿಂದ 2017ರಲ್ಲಿ ಭಾರತಿ ಅವರು ಪದ್ಮಶ್ರೀ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. 2019ರಲ್ಲಿ 'ಸೇವಂತಿ' ಧಾರಾವಾಹಿ ಮೂಲಕ ಮತ್ತೆ ಕಿರುತೆರೆಗೆ ಮರಳಿದ್ದಾರೆ ಭಾರತಿ.
ವಿನಯಾ ಪ್ರಸಾದ್
ದಕ್ಷಿಣ ಭಾರತದ ಪ್ರಖ್ಯಾತ ನಟಿಯರಲ್ಲಿ ವಿನಯಾ ಪ್ರಸಾದ್ ಕೂಡ ಒಬ್ಬರು. ಅತಿ ಹೆಚ್ಚು ಕನ್ನಡ ಮತ್ತು ಮಲಯಾಳಂ ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. ಕೆಲ ತಮಿಳು, ತೆಲುಗು ಸಿನಿಮಾಗಳಿಗೂ ಇವರು ಬಣ್ಣ ಹಚ್ಚಿದ್ದಾರೆ. 1993ರಲ್ಲಿಯೇ 'ಆತಂಕ' ಸಿನಿಮಾಗೆ ಉತ್ತಮ ನಟಿ ವಿಭಾಗದಲ್ಲಿ ರಾಜ್ಯ ಪ್ರಶಸ್ತಿ ಪಡೆದಿದ್ದಾರೆ. ಚಿರಂಜೀವಿ, ವಿಷ್ಣುವರ್ಧನ್, ರಜನಿಕಾಂತ್, ವಿ.ರವಿಚಂದ್ರನ್, ಶಿವರಾಜ್‌ಕುಮಾರ್, ಮಹೇಶ್ ಬಾಬು, ಎನ್‌.ಟಿ.ರಾಮ್‌ರಾವ್ ಅವರ ಜೊತೆ ತೆರೆ ಹಂಚಿಕೊಂಡಿದ್ದಾರೆ ವಿನಯಾ. 'ಪಾರು' ಧಾರಾವಾಹಿ ಮೂಲಕ ಅವರು ಕಿರುತೆರೆಗೆ ಕಂಬ್ಯಾಕ್ ಮಾಡಿದ್ದಾರೆ.
ಎಸ್.ನಾರಾಯಣ್
'ಕಲಾ ಸಾಮ್ರಾಟ್' ಎಂದು ಬಿರುದು ಪಡೆದಿರುವ ಎಸ್.ನಾರಾಯಣ್ ಡಾ.ರಾಜ್‌ಕುಮಾರ್ ಮತ್ತು ವಿಷ್ಣುವರ್ಧನ್ ಜೊತೆಗೆ ಸಿನಿಮಾಗಳನ್ನು ಮಾಡಿದ್ದಾರೆ. 'ಪಾರು' ಧಾರಾವಾಹಿ ಮೂಲಕ ಅವರು ಕಿರುತೆರೆಗೆ ಮರಳಿದ್ದಾರೆ.
ಪದ್ಮಜಾ ರಾವ್
93ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿರುವ ಪದ್ಮಜಾ ರಾವ್ 'ಮುಂಗಾರು ಮಳೆ, ಹಠವಾದಿ' ಸಿನಿಮಾಗಳ ಮೂಲಕ ಹೆಸರು ಪಡೆದಿದ್ದಾರೆ. 'ಅರಮನೆ ಗಿಳಿ' ಧಾರಾವಾಹಿಯಲ್ಲಿ ಪ್ರಸ್ತುತ ನಟಿಸುತ್ತಿದ್ದಾರೆ ಪದ್ಮಜಾ ರಾವ್.