ಇದೇ ಶುಕ್ರವಾರ 'ಸರಯೂ' ಕೊನೆಯ ಎಪಿಸೋಡ್

ಉದಯ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ಧಾರಾವಾಹಿ 'ಸರಯೂ' ಅಂತಿಮ ಘಟ್ಟಕ್ಕೆ ಬಂದು ನಿಂತಿದೆ. ಇದೇ ಶುಕ್ರವಾರ ಅಂತಿಮ ಎಪಿಸೋಡ್ ಪ್ರಸಾರವಾಗಲಿದೆ. ಮೊಟ್ಟಮೊದಲ ಬಾರಿಗೆ ಕನ್ನಡ ಕಿರುತೆರೆಯಲ್ಲಿ ಬ್ಯಾಂಕಾಕ್ ನಲ್ಲಿ ಚಿತ್ರೀಕರಣಗೊಂಡ ಹೆಗ್ಗಳಿಕೆ ಈ ಧಾರಾವಾಹಿಯದ್ದು. ಅಭಿಷೇಕ್ ದಾಸ್ ಹಾಗೂ ಶ್ವೇತಾ ಹೆಗಡೆ ಈ ಧಾರಾವಾಹಿಯ ಮುಖ್ಯಪಾತ್ರಧಾರಿಗಳು.

ಸರಯೂ ಧಾರಾವಾಹಿಯ ಬಗ್ಗೆ ಶ್ವೇತಾ ತಮ್ಮ ಫೇಸ್‌ಬುಕ್ ಪುಟದಲ್ಲಿ ಈ ರೀತಿ ಬರೆದುಕೊಂಡಿದ್ದು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. 'ಸರಯೂ ಅದ್ಭುತ ಧಾರಾವಾಹಿ. ಇದು ನನಗೆ ಮಗು ಇದ್ದಂತೆ. ಇದರ ಮೂಲಕ ನಾನು ಧಾರಾವಾಹಿ ಲೋಕಕ್ಕೆ ಅಡಿಯಿಟ್ಟೆ. ಈ ಧಾರಾವಾಹಿ ಮುಕ್ತಾಯವಾಗುತ್ತಿದೆ ಎಂದು ಹೇಳಲು ದುಃಖವಾಗುತ್ತಿದೆ' ಎಂದಿದ್ದಾರೆ.



ಸರಯೂ ಒಬ್ಬ ಬಡ ಆರ್ಚಕನ ಮುಗ್ಧ ಮಗಳು. ಅಪ್ಪನ ಆದರ್ಶವನ್ನೆ ಪಾಲಿಸೋ ಈಕೆಗೆ ಎದುರಾಗೋ ಕ್ರೂರತನದಲ್ಲಿರೋ ದೇಶಪಾಂಡೆ ಮನೆ ಹುಡುಗ ಎಬಿಡಿ (ಅಭಿರಾಮ್ ದೇಶಪಾಂಡೆ) ಇವನು ಮಾಡೊ ಕ್ರೂರತೆಯನ್ನು ಕಣ್ಣಾರೆ ನೋಡೋ ಸರಯೂ, ಅವನ ಮೇಲೆ ದೂರು ನೀಡುತ್ತಾಳೆ. ಅದಕ್ಕೆ ಸೇಡು ತೀರಿಸಿಕೊಳ್ಳಲು ಎಬಿಡಿ ಅವಳನ್ನ ಪ್ರೀತಿಸೊ ನಾಟಕವಾಡಿ ಅವಳನ್ನ ಮದುವೆಯಾಗುತ್ತಾನೆ. ಮದುವೆಯಾದ ಮೇಲೂ ಇವನ ದ್ವೇಷ ಇನ್ನೂ ಹೆಚ್ಚಾಗಿ ಹೋಗುವುದು. ಸರಯೂಳಿಗೆ ದಿನೇದಿನೆ ನರಕಯಾತನೆ ಅನುಭವಿಸುವಂತೆ ಮಾಡೊ ಎಬಿಡಿ ಆಕೆಯನ್ನ ಕಾಡುತ್ತಲೇ ಹೋಗುತ್ತಾನೆ.