​ಬಿಗ್‌ಬಾಸ್‌ ಮನೆಗೆ ವಿದಾಯ ಹೇಳಿದ ಸುಮಾ

ಬಿಗ್‌ ಮನೆಯಿಂದ ಮೊದಲ ವಾರ ಯಾವ ಸ್ಪರ್ಧಿಗೆ ಗೇಟ್‌ ಪಾಸ್‌ ಸಿಗುತ್ತದೆ ಎಂಬ ಪ್ರಶ್ನೆ ಎಲ್ಲರನ್ನು ಕಾಡುತ್ತಿತ್ತು. ಶನಿವಾರ ನಡೆದ ಬಿಗ್‌ಬಾಸ್‌ ಕಾರ್ಯಕ್ರಮದಲ್ಲಿ ಈ ಕುತೂಹಲಕ್ಕೆ ತೆರೆ ಬಿದ್ದಿತು. ಸಾಮಾನ್ಯ ಸ್ಪರ್ಧಿಗಳಲ್ಲಿ ಒಬ್ಬರಾದ ಸುಮಾ, ಬಿಗ್‌ಬಾಸ್‌ ಮನೆಯಿಂದ ಹೊರಬಂದರು.

ಬಿಗ್‌ಬಾಸ್‌ ಸೀಸನ್‌ 5ರ ಮೊದಲ ದಿನವೇ ನಾಮಿನೇಶನ್ ಪ್ರಕ್ರಿಯೆ ನಡೆದಿತ್ತು. ಕ್ಯಾಪ್ಟನ್ ಅನುಪಮಾ ಹೊರತುಪಡಿಸಿ ಉಳಿದ ಸದಸ್ಯರ ಹೆಸರನ್ನು ನಾಮಿನೇಟ್ ಮಾಡಬಹುದಾಗಿತ್ತು. ಮನೆಯ ಸದಸ್ಯರು ನೀಡಿದ ವೋಟ್ ಪ್ರಕಾರ ದಿವಾಕರ್, ಜಗನ್ನಾಥ್, ಜಯರಾಮ್ ಕಾರ್ತಿಕ್, ಮೇಘಾ, ಜಯ ಶ್ರೀನಿವಾಸನ್ ಮತ್ತು ಸುಮಾ ಎಲಿಮಿನೇಷನ್‌ಗೆ ನಾಮಿನೇಟ್ ಆಗಿದ್ದರು. ಇನ್ನು ಮೈಸೂರಿನ ನಿವೇದಿತಾ ಗೌಡ ಅವರನ್ನ ಕ್ಯಾಪ್ಟನ್ ಅನುಪಮಾ ನೇರವಾಗಿ ನಾಮಿನೇಟ್ ಮಾಡಿದ್ದು, ನಿಮಗೆಲ್ಲ ಗೊತ್ತೇ ಇದೆ.

ಎಲಿಮಿನೇಷನ್‌ಗೆ ನಾಮಿನೇಟ್‌ ಆದ ಏಳು ಸ್ಪರ್ಧಿಗಳಲ್ಲಿ ಸುಮಾ ಬಿಗ್‌ಬಾಸ್‌ ಮನೆಗೆ ಭಾರವಾದ ಹೃದಯದಿಂದ ವಿದಾಯ ಹೇಳಿದ್ದಾರೆ. ಇನ್ನು ಮನೆಯಿಂದ ಹೊರ ಹೋಗುತ್ತಿದ್ದ ಸಮಯದಲ್ಲಿ ಬಿಗ್‌ಬಾಸ್‌ ನೀಡಿದ ಆದೇಶದಂತೆ ಸಿಹಿ ಕಹಿ ಚಂದ್ರು ಅವರಿಗೆ 'ಸೂಪರ್‌ ಅಧಿಕಾರ'ವೊಂದನ್ನು ನೀಡಿದರು ಸುಮಾ. ಇದರ ಪ್ರಕಾರ ಮುಂದಿನ ನಾಮಿನೇಷನ್‌ ಪ್ರಕ್ರಿಯೆಯಲ್ಲಿ ಬಿಗ್‌ಬಾಸ್‌ ಸೂಚನೆಯಂತೆ ಈ ಸೂಪರ್‌ ಅಧಿಕಾರವನ್ನು ಸಿಹಿ ಕಹಿ ಚಂದ್ರು ಬಳಸಿಕೊಳ್ಳಬಹುದಾಗಿದೆ.