ಕಳೆದ 3 ವರ್ಷಗಳಿಂದ ಪ್ರಸಾರವಾಗುತ್ತಿರುವ 'ಯಾರೇ ನೀ ಮೋಹಿನಿ' ಧಾರಾವಾಹಿ ಅಂತ್ಯ?

ಈಗಾಗಲೇ ಕಳೆದ ಮಾರ್ಚ್‌ನಿಂದ ಸಾಕಷ್ಟು ಧಾರಾವಾಹಿಗಳು ಅಂತ್ಯವಾಗಿವೆ. ಟಿಆರ್‌ಪಿ ಕಡಿಮೆಯಾದರೆ ಧಾರಾವಾಹಿ ಅಂತ್ಯವಾಗೋದು ಸಹಜ. ಇನ್ನು ಕಳೆದ ಮೂರು ವರ್ಷಗಳಿಂದ ಪ್ರಸಾರವಾಗುತ್ತಿರುವ 'ಯಾರೇ ನೀ ಮೋಹಿನಿ' ಧಾರಾವಾಹಿ ಅಂತ್ಯವಾಗುತ್ತಿದೆ ಎಂಬ ಮಾಹಿತಿ ಸಿಕ್ಕಿದೆ. ಇದರ ಜೊತೆಗೆ ನಟಿ ಸುಷ್ಮಾ ಶೇಖರ್ ಅವರ ಇನ್‌ಸ್ಟಾಗ್ರಾಮ್ ಪೋಸ್ಟ್ ಈ ವಿಷಯಕ್ಕೆ ಪುಷ್ಟಿ ನೀಡಿದೆ.

ಟಾಪ್ 5 ಧಾರಾವಾಹಿಗಳಲ್ಲಿ ಒಂದಾಗಿತ್ತು!
'ಯಾರೇ ನೀ ಮೋಹಿನಿ' ಧಾರಾವಾಹಿ ಟಿಆರ್‌ಪಿಯಲ್ಲಿ ಅನೇಕ ಬಾರಿ ಟಾಪ್ 5 ಸ್ಥಾನಗಳಲ್ಲಿತ್ತು. ಶ್ರುತಿ ನಾಯ್ಡು ನಿರ್ದೇಶನ ಹಾಗೂ ನಿರ್ಮಾಣದ ಈ ಸೀರಿಯಲ್‌ಗೆ ಒಳ್ಳೆಯ ಪ್ರಖ್ಯಾತಿ ಕೂಡ ಇತ್ತು. ಆದರೆ ಕಥೆ ಮುಂದೆ ಸಾಗುವುದಿಲ್ಲ ಎಂಬ ಬೇಸರ ಪ್ರೇಕ್ಷಕರಿಗಿತ್ತು ಎಂಬುದನ್ನು ಮಾತ್ರ ಮರೆಯುವಂತಿಲ್ಲ. ಇನ್ನು ಈ ಸೀರಿಯಲ್ ಮುಕ್ತಾಯ ಹಂತಕ್ಕೆ ಬಂದಿದೆ ಎಂದು ಹೇಳಲಾಗುತ್ತಿದೆ. ಆದರೆ ಈ ಬಗ್ಗೆ ವಾಹಿನಿ ಅಥವಾ ಧಾರಾವಾಹಿ ತಂಡ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಯಾರೇ ನೀ ಮೋಹಿನಿ ಧಾರಾವಾಹಿ ಕಥೆ ಏನು?
ಕಥಾನಾಯಕಿ ಬೆಳ್ಳಿ ಹಾಗೂ ನಾಯಕ ಮುತ್ತು ಮದುವೆಗೆ ಸಾಕಷ್ಟು ಅಡೆತಡೆಗಳು ಉಂಟಾಗುತ್ತವೆ. ಕೊನೆಗೂ ಈ ಜೋಡಿ ಮದುವೆಯಾದ ನಂತರ ಜೀವನ ಚೆನ್ನಾಗಿರೋದಿಲ್ಲ. ಮಲತಾಯಿಯ ಕುತಂತ್ರ, ವಿಲನ್ ಮಾಯಾಳಿಂದಾಗಿ ಮುತ್ತು ಹಾಗೂ ಬೆಳ್ಳಿ ಏನೆಲ್ಲ ಸಮಸ್ಯೆಗಳನ್ನು ಎದುರಿಸುತ್ತಾರೆ? ಮುತ್ತು ಮೊದಲ ಪತ್ನಿ ಚಿತ್ರಾಳ ಆತ್ಮ ಹೇಗೆ ಈ ಜೋಡಿಯನ್ನು ಕಾಪಾಡುತ್ತದೆ ಎಂಬುದೇ ಈ ಸೀರಿಯಲ್‌ನ ಸ್ಟೋರಿ ಆಗಿತ್ತು. ನಟಿ ಸುಷ್ಮಾ ಶೇಖರ್, ಸೂರಜ್ ಹೊಳ್ಳ ಮುಂತಾದವರು ಈ ಧಾರಾವಾಹಿಯಲ್ಲಿ ನಟಿಸಿದ್ದರು.

Also Read-ಯಾರೇ ನೀ ಮೋಹಿನಿ: ಧಾರಾವಾಹಿ ಇಷ್ಟಇಲ್ಲದವರಿಗೆ, ಇಷ್ಟಪಡುವವರಿಗೆ ಮೂರು ವರ್ಷದಿಂದ ಕಾಯುತ್ತಿದ್ದ ಕ್ಷಣ ಬಂತಪ್ಪಾ!

ಸುಷ್ಮಾ ಶೇಖರ್ ಹೇಳಿದ್ದೇನು?
'ಯಾರೇ ನೀ ಮೋಹಿನಿ ಧಾರಾವಾಹಿ ತಂಡದ ಜೊತೆ ಕೆಲಸ ಮಾಡಲು ಆರಂಭಿಸಿ ಮೂರು ವರ್ಷಗಳು ಕಳೆದಿವೆ. ಈ ಅವಕಾಶ ಕೊಟ್ಟಿದ್ದಕ್ಕಾಗಿ ಧನ್ಯವಾದಗಳು. ಮೊದಲ ದಿನ ಅಮ್ಮನ ಜೊತೆ ನಿಮ್ಮ ಕಚೇರಿಗೆ ಬಟ್ಟೆ ಚೆಕ್ ಮಾಡಲು ಬಂದಿದ್ದೆ. ನಾನು ಪದವಿ ಮುಗಿಸಿ ಇನ್ನೇನು ಎಂಎನ್‌ಸಿ ಕಂಪನಿಯಲ್ಲಿ ಕೆಲಸ ಮಾಡಲು ರೆಡಿಯಿದ್ದಾಗ ನೀವು ನನ್ನ ಬದುಕು ಇನ್ನಷ್ಟು ಕಲರ್‌ಫುಲ್ ಹಾಗೂ ಯಶಸ್ವಿ ಆಗುವಂತೆ ಮಾಡಲು ಈ ಅವಕಾಶ ನೀಡಿದಿರಿ. ನೀವು ನನಗೆ ಏನು ನೀಡಿದ್ದೀರೋ ಅದಕ್ಕೆ ಧನ್ಯವಾದಗಳು. ಈ ಮೂರು ವರ್ಷ ನನ್ನ ಬದುಕಿಗೆ ಒಂದು ಮೈಲಿಗಲ್ಲು ಆಗುವುದು ಎಂದು ಭಾವಿಸುತ್ತೇನೆ. ನನ್ನನ್ನು ಸಹಿಸಿಕೊಂಡಿದ್ದಕ್ಕಾಗಿ ಧನ್ಯವಾದಗಳು. ನೀವು ನನಗೊಂದೇ ಅಲ್ಲದೆ ಅನೇಕರಿಗೆ ಪ್ರೇರಣೆ' ಎಂದು ನಟಿ ಸುಷ್ಮಾ ಶೇಖರ್ ಅವರು ಶ್ರುತಿ ನಾಯ್ಡು ಜೊತೆಗಿನ ಸಂಬಂಧದ ಬಗ್ಗೆ ಇನ್‌ಸ್ಟಾಗ್ರಾಮ್ ಪೋಸ್ಟ್ ಹಾಕಿದ್ದಾರೆ.