ಯೋಗ ಗುರು ಬಾಬಾ ರಾಮ್‌ದೇವ್‌ ಜೀವನ ಕಥೆ ಧಾರಾವಾಹಿಯಾಗಿ ಮೂಡಿ ಬರಲಿದೆ. ಸಾಮಾನ್ಯ ವ್ಯಕ್ತಿಯಿಂದ ಯೋಗ ಗುರು, ಎಫ್‌ಎಂಸಿಜಿಯವರೆಗಿನ ಅವರ ಯಶೋಗಾಥೆ ಕುರಿತ ಧಾರಾವಾಹಿಯನ್ನು ಅಭಿನವ್‌ ಶುಕ್ಲ ನಿರ್ಮಿಸುತ್ತಿದ್ದು, ಇದಕ್ಕೆ ಬಾಲಿವುಡ್‌ ನಟ ಅಜಯ್‌ ದೇವಗನ್‌ ಕೂಡ ಕೈಜೋಡಿಸಿದ್ದಾರೆ ಎಂದು ತಿಳಿದು ಬಂದಿದೆ.
'ಸ್ವಾಮಿ ಬಾಬಾ ರಾಮ್‌ದೇವ್‌' ಹೆಸರಿನ ಈ ಟಿವಿ ಸೀರಿಯಲ್‌, ಯೋಗ ಗುರು ಕುರಿತ ಇದುವರೆಗೆ ಗೊತ್ತಿರದ ವಿಷಯಗಳನ್ನು ತಿಳಿಸಲಿದೆ. ಜೊತೆಗೆ ಅವರ ಪಾಲುದಾರ ಬಾಲಕೃಷ್ಣ ಕುರಿತು ವಿವರಗಳಿರಲಿವೆ. ಹರ್ಯಾಣದ ಹಝರಿಭಾಗ್‌ನ ಅಲಿ ಸೈಯದ್‌ ಪುರ್‌ ಗ್ರಾಮದಲ್ಲಿ 1965ರಲ್ಲಿ ಹುಟ್ಟಿದ ರಾಮ್‌ದೇವ್‌, ಯೋಗ ಮತ್ತು ಸಂಸ್ಕೃತವನ್ನು ಹಲವಾರು ಗುರು ಕುಲದಲ್ಲಿ ಕಲಿತಿದ್ದರು. ಬಳಿಕ ಸನ್ಯಾಸ ಸ್ವೀಕರಿಸಿದ್ದರು.
ಪ್ರಸಕ್ತ ತಾರಾಗಣದ ಆಯ್ಕೆಯಾಗುತ್ತಿದ್ದು, ದಿಲ್‌ ದಡ್‌ಕನ್‌ ದೋ ನಟ ವಿಕ್ರಾಂತ್‌ ಮೆಸ್ಸಿ ರಾಮ್‌ದೇವ್‌ ಪಾತ್ರ ಮಾಡುವುದೆಂದು ಹೇಳಲಾಗಿತ್ತು. ಆದರೆ, ಈಗ ಅವರು ಪ್ರಾಜೆಕ್ಟ್ನಿಂದ ಹೊರ ಬಿದ್ದಿದ್ದಾರೆ. ಈ ಬಗ್ಗೆ ಸ್ವತಃ ವಿಕ್ರಮ್‌ ಸ್ಪಷ್ಟಪಡಿಸಿದ್ದು, 'ನಾನು ರಾಮ್‌ದೇವ್‌ ಪಾತ್ರಕ್ಕಾಗಿ ತಯಾರಿ ನಡೆಸಿದ್ದು ನಿಜ. ಆದರೆ ಕೊನೆಯ ಕ್ಷಣದಲ್ಲಿ ಕೆಲವು ಕಾರಣಗಳಿಂದ ಅದರಿಂದ ಹೊರಗುಳಿಯಬೇಕಾಗಿದೆ. ತಂಡಕ್ಕೆ ಶುಭವನ್ನು ಹಾರೈಸುತ್ತೇನೆ' ಎಂದವರು ಟ್ವಿಟ್‌ ಮಾಡಿದ್ದಾರೆ.