ಬಿಗ್‌ ಮನೆಯಲ್ಲಿ ತ್ರಿಕೋನ ಪ್ರೇಮಕಥೆ?

ಹಿಂದಿನ ಎಪಿಸೋಡ್‌ನಲ್ಲಿ ಕನ್ನಡ ರ‍್ಯಾಪರ್‌ ಚಂದನ್‌ ಶೆಟ್ಟಿ ತಮಗೆ ಲವ್‌ ಆಗ್ತಿದೆ ಎಂದು ಆಶಿತಾ, ಜಗನ್‌ ಮತ್ತು ಕೃಷಿ ಮುಂದೆ ಹೇಳಿಕೊಂಡಿದ್ದರು. ಆದರೆ ಯಾರ ಮೇಲೆ ಲವ್‌ ಆಗಿದೆ ಎಂಬ ವಿಚಾರ ಮಾತ್ರ ಬಹಿರಂಗಪಡಿಸಿರಲಿಲ್ಲ. ಇದೀಗ ಅದಕ್ಕೆ ಉತ್ತರ ಸಿಕ್ಕಂತಾಗಿದೆ.

ಅಷ್ಟಕ್ಕೂ ಚಂದನ್‌ ಕಾಳು ಹಾಕುತ್ತಿರುವ ಹುಡುಗಿ ಬೆಳಗಾವಿ ಬೆಡಗಿ ಶ್ರುತಿನಾ? ಹೀಗೊಂದು ಸಂಶಯ ಬಂದಿದ್ದು ಅನುಪಮಾ ಗೌಡ ಅವರ ಮಾತಿನಿಂದ. ಎಲ್ಲರ ಜತೆ ಕುಳಿತುಕೊಂಡು ಹರಟೆ ಹೊಡೆಯುತ್ತಿದ್ದ ಸಂದರ್ಭದಲ್ಲಿ ಲವ್‌ ಕುರಿತು ಪ್ರಸ್ತಾಪಿಸಿದ ಅನುಪಮಾ, ಚಂದನ್‌ಗೆ ಶ್ರುತಿ ಎಂದರೆ ಇಷ್ಟ ಎಂದು ಹೇಳಿದರು. ಅಷ್ಟಕ್ಕೆ ಸುಮ್ಮನಾಗದ ಅನುಪಮಾ, ಆದರೆ ಶ್ರುತಿಗೆ ಜೆಕೆ ಇಷ್ಟವಾಗುತ್ತಾರೆ ಎಂದು ಕಾಲೆಳೆದರು.

ಅನುಪಮಾರ ಈ ಮಾತಿಗೆ ಪ್ರತಿಕ್ರಿಯಿಸಿದ ಶ್ರುತಿ, ಇಷ್ಟಪಡುವುದು ಹಾಗೂ ಲವ್‌ ಮಾಡುವುದಕ್ಕೆ ವ್ಯತ್ಯಾಸವಿದೆ, ಅವೆರಡೂ ಒಂದೇ ಅಲ್ಲ ಎಂದು ತತ್ವಜ್ಞಾನ ಹೇಳಿ ಜಾರಿಕೊಂಡರು. ಇದರಿಂದ ಪ್ರೇಕ್ಷಕರಿಗೆ ಚಂದನ್‌ ಲವ್‌ ಸ್ಪಷ್ಟವಾಯಿತು. ಒಟ್ಟಾರೆ ಬಿಗ್‌ಬಾಸ್‌ ಮನೆಯಲ್ಲಿ ತ್ರಿಕೋನ ಪ್ರೇಮವೊಂದು ನಡೆಯುತ್ತಿದೆ ಎಂಬ ಸುಳಿವು ಸಿಕ್ಕಿದೆ. ಈ ಪ್ರೇಮ ಕಥೆ ಮುಂದಿನ ದಿನಗಳಲ್ಲಿ ಯಾವ ರೀತಿ ತಿರುವು ಪಡೆದುಕೊಳ್ಳುತ್ತದೆ ಎಂಬುವುದನ್ನು ಕಾದು ನೋಡಬೇಕು.