ಚಂದನ್‌ ಕೊರಳಿನ ಕೆಳಗಿರುವ ಹಚ್ಚೆಯ ರಹಸ್ಯವೇನು?

ದಿನ ಕಳೆದಂತೆ ಬಿಗ್‌ಬಾಸ್‌ ಮತ್ತಷ್ಟು ಕುತೂಹಲ ಹುಟ್ಟುಹಾಕುತ್ತಿದೆ. ಅದರಲ್ಲೂ 'ಕಿರಿಕ್‌ ಪಾರ್ಟಿ' ಬೆಡಗಿ ಸಂಯುಕ್ತಾ ಹೆಗಡೆ ಬಿಗ್‌ ಮನೆಯೊಳಗೆ ಎಂಟ್ರಿ ನೀಡಿದ ಮೇಲೆ ಹಲವಾರು ಇಂಟ್ರೆಸ್ಟಿಂಗ್‌ ವಿಚಾರಗಳು ಸ್ಪರ್ಧಿಗಳ ಬಾಯಿಂದ ಹೊರಬರುತ್ತಿವೆ. ಸ್ಪರ್ಧಿಗಳ ಪರ್ಸನಲ್‌ ವಿಚಾರಗಳನ್ನು ಕೆದಕುತ್ತಿರುವ ಸಂಯುಕ್ತಾ, ಪ್ರೇಕ್ಷಕರಲ್ಲಿದ್ದ ಕೆಲ ಗೊಂದಲಗಳನ್ನು ದೂರವಾಗಿಸುತ್ತಿದ್ದಾರೆ ಎಂದರೆ ತಪ್ಪಾಗದು.

ನೀವು ಗಮನಿಸಿರಬಹುದು ಕನ್ನಡ ರ‍್ಯಾಪರ್‌ ಚಂದನ್‌ ಶೆಟ್ಟಿ ಕೊರಳಿನ ಕೆಳ ಭಾಗದಲ್ಲಿ ರೋಮನ್‌ ಸಂಖ್ಯೆಯ ಹಚ್ಚೆ ಇದೆ. ರೋಮನ್‌ ಸಂಖ್ಯೆಯಲ್ಲಿ '14' ಎಂದು ಬರೆದಿರುವ ಹಚ್ಚೆ ಹಿಂದಿನ ರಹಸ್ಯವೇನು ಎಂಬುದು ಕೆಲ ಪ್ರೇಕ್ಷಕರನ್ನು ಕಾಡುತ್ತಿತ್ತು. ಬಹುಶಃ ಸಂಯುಕ್ತಾ ಹೆಗಡೆ ಅವರಿಗೂ ಅದನ್ನು ತಿಳಿದುಕೊಳ್ಳುವ ಕುತೂಹಲವಿತ್ತು ಅನಿಸುತ್ತೆ. ಹಾಗಾಗಿ ಚಂದನ್‌ ಅವರನ್ನು ಹಚ್ಚೆ ಕುರಿತು ಪ್ರಶ್ನಿಸಿದರು ಕಿರಿಕ್‌ ಬೆಡಗಿ.

ಸಂಯುಕ್ತಾ ಕೇಳಿದ ಪ್ರಶ್ನೆಗೆ ಸ್ವಾಭಾವಿಕವಾಗಿ ಉತ್ತರಿಸಿದ ಚಂದನ್‌ ಪರಿಪೂರ್ಣವಾದ ಉತ್ತರ ನೀಡಲಿಲ್ಲ. 'ನನ್ನ ತಂದೆ-ತಾಯಿಗೆ ನಾನು 14ನೇ ಮಗ. ಹಾಗಾಗಿ ಈ ರೀತಿ ಹಚ್ಚೆ ಹಾಕಿಸಿಕೊಂಡಿದ್ದೇನೆ ಎಂದು ಉತ್ತರಿಸಿದರು. ಇದರಿಂದ ಸಂತೃಪ್ತಳಾಗದ ಸಂಯುಕ್ತಾ, ನೀವು ಸುಳ್ಳು ಹೇಳುತ್ತಿದ್ದೀರಾ. ಬೇರೆ ಏನೋ ಇದೆ ಎಂದು ಸತಾಯಿಸಿದರು. ಆದರೆ ಚಂದನ್‌ ಮಾತ್ರ ಹಚ್ಚೆ ಬಗ್ಗೆ ಹೆಚ್ಚು ಮಾತನಾಡದೇ ಹೊರ ಹೋದರು.