ಬೈಕ್ ಓಡಿಸಿದ 8ರ ಪೋರ : ವೀಡಿಯೋ ವೈರಲ್ ಆಗುತ್ತಿದ್ದಂತೆಯೇ ತಂದೆಗೆ ಬಿತ್ತು ಬರೋಬ್ಬರಿ 30 ಸಾವಿರ ದಂಡ...!

ಲಕ್ನೋ : ಆ ಪೋರನಿಗೆ ಬರೀ 8 ವರ್ಷ. ಆಗಲೇ ಬೈಕನ್ನು ಸರಾಗವಾಗಿ ಚಲಾಯಿಸಿ ಈತ ಅಚ್ಚರಿ ಮೂಡಿಸಿದ್ದ. ಅಪಾಯಕಾರಿ, ಕಾನೂನು ಉಲ್ಲಂಘನೆ ಎಂದು ಗೊತ್ತಿದ್ದರೂ ಹೆತ್ತವರು ಮಗನಿಗೆ ಬೈಕ್ ಚಲಾಯಿಸಲು ಅವಕಾಶ ಕೊಟ್ಟಿದ್ದರು. ಈ ವೀಡಿಯೋವೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಜೊತೆಜೊತೆಗೆ, ಬಾಲಕನ ತಂದೆಗೂ ಸಂಕಷ್ಟ ತಂದಿದೆ.

ನಿಜ... ಈ ಬಾಲಕನ ವೀಡಿಯೋ ವೈರಲ್ ಆಗುತ್ತಿದ್ದಂತೆಯೇ ದಂಗಾಗುವ ಸರದಿ ಬಾಲಕನ ತಂದೆಯದ್ದಾಗಿತ್ತು...! ಯಾಕೆಂದರೆ, ಸಂಚಾರಿ ಪೊಲೀಸರು ಬಾಲಕನ ತಂದೆಗೆ ಬರೋಬ್ಬರಿ 30 ಸಾವಿರ ರೂಪಾಯಿ ದಂಡ ವಿಧಿಸಿದ್ದಾರೆ. ಈ ಮೂಲಕ ಮಗ ಮಾಡಿದ ಸಾಹಸ ತಂದೆಯ ಜೇಬಿಗೆ ಕತ್ತರಿ ಹಾಕಿದೆ. ಲಕ್ನೋದ ಕಕೋರಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಘಟನೆಯಿದು.

ಸಾನೂ ಎಂಬ ಬಾಲಕ ಈ ಸಾಹಸ ಮಾಡಿದ್ದ. ತುಂಬಾ ಆತ್ಮವಿಶ್ವಾಸದಿಂದಲೇ ಸಾನೂ ಬೈಕ್ ಬಿಟ್ಟಿದ್ದ. ಆದರೆ, ಬಾಲಕನ ಕಾಲು ನೆಲದಿಂದ ತುಂಬಾ ಮೇಲಕ್ಕಿತ್ತು. ಒಂದೊಮ್ಮೆ ಬೈಕ್ ನಿಯಂತ್ರಣ ತಪ್ಪಿದರೆ ಬಾಲಕನೂ ಕೆಳಗೆ ಬಿದ್ದು ಗಾಯಗೊಳ್ಳುವ ಸಂಭವವೇ ಇಲ್ಲಿ ಹೆಚ್ಚು. ಅದೂ ಅಲ್ಲದೆ, ಸಾರ್ವಜನಿಕ ರಸ್ತೆಯಲ್ಲಿ ಇಂತಹ ಅಪಾಯಕಾರಿ ಚಾಲನೆ ಮಾಡುವುದು ಯಾರಿಗೂ ಒಳ್ಳೆಯದಲ್ಲ. ಹೀಗಾಗಿ, ಇದನ್ನು ಸ್ಥಳೀಯರು ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಾಕಿದ್ದರು. ಇದು ಸಂಚಾರಿ ಪೊಲೀಸರ ಗಮನಕ್ಕೂ ಬಂದಿತ್ತು. ಹೀಗಾಗಿ, ವಾಹನ ನಂಬರ್ ಟ್ರೇಸ್ ಮಾಡಿದ ಪೊಲೀಸರು ಸಾನೂ ತಂದೆಗೆ ದಂಡ ವಿಧಿಸಿದ್ದಾರೆ.

ಭಾರತದಲ್ಲಿ ಅಪ್ರಾಪ್ತರೂ ದ್ವಿಚಕ್ರ ವಾಹನ ಚಲಾಯಿಸುವುದು ಸಾಮಾನ್ಯ. ಇದು ಕಾನೂನು ಬಾಹಿರ ಎಂದು ಗೊತ್ತಿದ್ದರೂ ಅದೆಷ್ಟೋ ಅಪ್ರಾಪ್ತರು ವಾಹನ ಚಲಾಯಿಸಿಕೊಂಡು ಹೋಗಿ ಸಂಕಷ್ಟಕ್ಕೆ ಎದುರಾಗಿದ್ದೂ ಇದೆ. ಆದರೆ, ಹೀಗೆ ಅಪ್ರಾಪ್ತರು ಬೈಕ್ ಚಲಾಯಿಸಿದರೆ ಈ ಹಿಂದೆ 500 ರೂ ದಂಡ ವಿಧಿಸಲಾಗಿತ್ತು. ಆದರೆ, ಹೊಸ ಮೋಟಾರು ವಾಹನ ತಿದ್ದುಪಡಿ ಕಾಯ್ದೆ ಜಾರಿಗೆ ಬಂದ ಮೇಲಂತೂ ಈ ದಂಡದ ಮೊತ್ತ 25 ಸಾವಿರ ರೂಪಾಯಿಗೆ ಏರಿಸಲಾಗಿದೆ. ಅಲ್ಲದೆ, ಅಪ್ರಾಪ್ತರಿಗೆ ವಾಹನ ಕೊಟ್ಟರೆ ಪೋಷಕರಿಗೆ ಮೂರು ವರ್ಷ ಜೈಲು ಶಿಕ್ಷೆ ವಿಧಿಸುವ ಅವಕಾಶವೂ ಕಾನೂನಿನಲ್ಲಿದೆ.

ಹೀಗಾಗಿ, ಸಾನೂ ತಂದೆಗೆ ಹೊಸ ಕಾನೂನಿನ ಪ್ರಕಾರ 25 ಸಾವಿರ ರೂಪಾಯಿ ಮತ್ತು ಅಪ್ರಾಪ್ತನಿಗೆ ವಾಹನ ಕೊಟ್ಟಿದ್ದಕ್ಕೆ 5,000 ರೂಪಾಯಿ ಸೇರಿ ಒಟ್ಟು 30 ಸಾವಿರ ರೂಪಾಯಿ ಫೈನ್ ಹಾಕಲಾಗಿದೆ. ಸದ್ಯ ಈ ಪ್ರಕರಣ ಕೋರ್ಟಿನಲ್ಲಿದ್ದು, ಕೋರ್ಟ್ ಅಂತಿಮ ದಂಡದ ಮೊತ್ತ ಮತ್ತು ಜೈಲು ಶಿಕ್ಷೆಯ ಬಗ್ಗೆ ನಿರ್ಧಾರ ಕೈಗೊಳ್ಳಲಿದೆ.

ಸಾನೂ ಪ್ರಕರಣ ಎಲ್ಲಾ ತಂದೆ ತಾಯಂದಿರಿಗೂ ಒಂದು ಪಾಠವಾಗಿದೆ. ಹೀಗಾಗಿ, ಅಪ್ರಾಪ್ತರಿಗೆ ವಾಹನ ಕೊಡುವ ಮುನ್ನ ಎಲ್ಲರೂ ಒಂದು ಕ್ಷಣ ಯೋಚಿಸುವುದು ನಿಮಗೇ ಒಳ್ಳೆಯದು.