`ನಾನು ಕೊರೊನಾ ವೈರಸ್ ಪೀಡಿತ'ನೆಂದು ವಿಮಾನದಲ್ಲಿ ಯುವಕನ ಕುಚೇಷ್ಟೆ : ಮುಂದೇನಾಯ್ತು ಗೊತ್ತಾ...?

`ಚಿತೆಯಲ್ಲಿ ಚಳಿ ಕಾಯುಸುವುದು' ಎಂಬ ಒಂದು ಮಾತಿದೆ. ಈ ಮಾತನ್ನು ಇಂತಹವರನ್ನು ನೋಡಿಯೇ ಹೇಳಿರಬೇಕು. ಪ್ರಸಿದ್ಧಿ ಪಡೆಯಬೇಕೆಂಬ ಆಸೆ ಕೆಲವೊಮ್ಮೆ ಕೆಲವರನ್ನು ಹುಚ್ಚು ವರ್ತನೆಗೆ ಪ್ರೇರೇಪಿಸುತ್ತದೆ. ಈಗ ಆಗಿರುವುದೂ ಅದೇ. ಜಗತ್ತೇ ಕೊರೊನಾ ವೈರಸ್ ಭಯದಲ್ಲಿದೆ. ಈ ಬಗ್ಗೆ ಎಲ್ಲೆಲ್ಲೂ ಎಚ್ಚರಿಕೆ ವಹಿಸಲಾಗಿದೆ. ಆದರೆ, ಇಲ್ಲೊಬ್ಬ ಭೂಪ ಇದೇ ಭಯವನ್ನು ತನ್ನ ಪ್ರಚಾರದ ಬಂಡವಾಳವನ್ನಾಗಿಸಲು ಹೋಗಿ ಸಂಕಷ್ಟಕ್ಕೆ ಸಿಲುಕಿದ್ದಾನೆ.

Also Read : Coronavirus : ಬಿಯರ್ ತಯಾರಿಕಾ ಕಂಪನಿಗೆ ಟೆನ್ಷನ್ ತಂದ ಡೆಡ್ಲಿ ಕೊರೊನಾ ವೈರಸ್...! ಯಾಕೆ ಗೊತ್ತಾ...?

ಈತನ ಹೆಸರು ಪೊಟೊಕ್ ಫಿಲಿಪ್. ಈತ ಗಾಯಕ ಕೂಡಾ ಹೌದು. ಇನ್‌ಸ್ಟ್ರಾಗ್ರಾಂನಲ್ಲಿ ಸುಮಾರು 34 ಸಾವಿರ ಫಾಲೋವರ್ಸ್‌ಗಳನ್ನು ಹೊಂದಿರುವ ಈತ ತಮಾಷೆಯ ವಿಡಿಯೋಗಳನ್ನು ಮಾಡಿ ಸಾಮಾಜಿಕ ಜಾಲತಾಣಗಳಿಗೆ ಹರಿಬಿಡುತ್ತಿದ್ದ. ಇದೇ ಕಾರಣದಿಂದ ಈತ ಸ್ವಲ್ಪ ಹೆಸರು ಕೂಡಾ ಮಾಡಿದ್ದ. ಆದರೆ, ಬಹುದೊಡ್ಡ ವೈರಲ್ ವಿಡಿಯೋವೊಂದನ್ನು ಈತ ಎದುರು ನೋಡುತ್ತಿದ್ದ. ಯಾವುದಾದರೊಂದು ವಿಡಿಯೋವನ್ನು ವೈರಲ್ ಮಾಡಿ ದೊಡ್ಡ ಹೆಸರು ಗಳಿಸಬೇಕು ಎಂಬುದು ಈತನ ಕನಸಾಗಿತ್ತು. ದೊಡ್ಡ ಹೆಸರು ಮಾಡಬೇಕು ಎನ್ನುವುದು ತಪ್ಪಲ್ಲ. ಆದರೆ, ಅದಕ್ಕೆ ಈತ ಹಿಡಿದ ದಾರಿ ಮತ್ತು ಮಾಡಿಕೊಂಡ ಆಯ್ಕೆ ಮಾತ್ರ ಯಾರೂ ಮೆಚ್ಚುವಂತಹದ್ದಲ್ಲ.

ಈ ಫಿಲಿಪ್ ಟೊರಂಟೋದಿಂದ ಜಮೈಕಾಗೆ ವಿಮಾನದಲ್ಲಿ ಹೋಗುತ್ತಿದ್ದ. ಈ ವೇಳೆ, ಈತನ ತಲೆಯಲ್ಲೊಂದು ಖತರ್ನಾಕ್ ಐಡಿಯಾ ಹೊಳೆದಿತ್ತು. ಅದೇನೆಂದರೆ, ತಾನು ಕೊರೊನಾ ವೈರಸ್ ಪೀಡಿತ ಎಂದು ಜೋರಾಗಿ ಹೇಳಿ ಎಲ್ಲ ಪ್ರಯಾಣಿಕರನ್ನು ಭಯಗೊಳಿಸುವುದು. ಈ ವಿಡಿಯೋವನ್ನು ಸೆರೆ ಹಿಡಿದು ಸಾಮಾಜಿಕ ಮಾಧ್ಯಮಗಳಲ್ಲಿ ಹಾಕುವುದು... ಹೀಗೆ ತನ್ನ ತಲೆಯಲ್ಲಿ ಯೋಚನೆ ಹೊಳೆದದ್ದೇ ತಡ ಈತ ತಾನೊಬ್ಬ ಕೊರೊನಾ ವೈರಸ್ ಪೀಡಿತ ಎಂದು ಜೋರಾಗಿ ಕಿರುಚಾಡಲು ಆರಂಭಿಸಿದ್ದ.

Also Read : Coronavirus : ಆಸ್ಪತ್ರೆ ಬೆಡ್‌ನಲ್ಲಿ ಕೈಕೈ ಹಿಡಿದು ಮಲಗಿರುವ ಈ ವೃದ್ಧ ದಂಪತಿಯ ವಿಡಿಯೋ ಕಣ್ಣೀರು ತರಿಸುವುದು ಪಕ್ಕಾ

ಇದನ್ನು ಕೇಳಿ ಪ್ರಯಾಣಿಕರೆಲ್ಲಾ ಒಂದು ಕ್ಷಣ ಭಯಗೊಂಡಿದ್ದರು. ವಿಮಾನ ಸಿಬ್ಬಂದಿಗೂ ಆತಂಕ ಎದುರಾಗಿತ್ತು. ಹೀಗಾಗಿ, ವಿಮಾನವನ್ನು ಟೊರಂಟೋ ವಿಮಾನ ನಿಲ್ದಾಣಕ್ಕೆ ಹಿಂತಿರುಗಿಸಲಾಗಿತ್ತು. ಈ ಪ್ರಕರಣದಿಂದ ಟೊರಂಟೋ ವಿಮಾನ ನಿಲ್ದಾಣದಿಂದ ಹೊರಡಬೇಕಾಗಿದ್ದ ಇನ್ನೊಂದು ವಿಮಾನದ ಪ್ರಯಾಣವೂ ರದ್ದಾಗಿತ್ತು. ಏರ್‌ಪೋರ್ಟಿಗೆ ಬಂದ ತಕ್ಷಣ ಈತನ ವೈದ್ಯಕೀಯ ಪರೀಕ್ಷೆ ಕೂಡಾ ನಡೆಸಲಾಯಿತು. ಈ ವೇಳೆ, ಈತ ಕೊರೊನಾ ಸೋಂಕಿತನಲ್ಲ ಎಂಬುದು ದೃಢಪಟ್ಟಿತ್ತು. ಆದರೆ, ಇಷ್ಟೆಲ್ಲಾ ಅವಾಂತರ ಆದ ಮೇಲೆ ಈತ ತಾನು ತಮಾಷೆ ಮಾಡುತ್ತಿದ್ದೆ ಎಂದು ಹೇಳಿದ್ದ...! ಇದನ್ನು ಕೇಳಿ ಎಲ್ಲರಿಗೂ ನಖಶಿಖಾಂತ ಉರಿದುಹೋಗಿದ್ದರು.

Also Read : ಕೊರೊನಾ ವೈರಸ್ ಹೆಸರೇಳಿ ಮನೆಗೆ ನುಗ್ಗಿದ್ದ ಕಳ್ಳನಿಂದ ಪಾರಾದ ಮಹಿಳೆ...!

ಬಳಿಕ ಈತನನ್ನು ಪೊಲೀಸರು ವಶಕ್ಕೆ ಪಡೆದು ಸೆರೆಗಟ್ಟಿದ್ದಾರೆ. ಜೊತೆಗೆ, ಈತನ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ಕೂಡಾ ಹೂಡಿದ್ದಾರೆ. ಸದ್ಯ ತನ್ನ ತಪ್ಪಿನ ಬಗ್ಗೆ ಪಶ್ಚಾತ್ತಾಪಪಡುತ್ತಿರುವ ಫಿಲಿಪ್‌, ತಾನು ಮಾಡಿದ್ದು ತಪ್ಪು. ನಾನು ಈ ರೀತಿ ಮಾಡಬಾರದಿತ್ತು. ನನ್ನಿಂದಾಗಿ ಇತರ ಪ್ರಯಾಣಿಕರಿಗೆ ತೊಂದರೆಯಾಗಿದೆ ಎಂದು ಹೇಳಿಕೊಂಡಿದ್ದಾನೆ. ತಪ್ಪು ಮಾಡಿದ ಮೇಲೆ ಪಶ್ಚಾತ್ತಾಪ ಆಗುವುದು ಸಹಜವೇ. ಆದರೆ, ಗೊತ್ತಿದ್ದು ಗೊತ್ತಿದ್ದು ತಪ್ಪು ಮಾಡುವ ಮೊದಲು ಸ್ವಲ್ಪ ಯೋಚಿಸಿದ್ದರೆ ಈತನಿಗೆ ಈ ಸ್ಥಿತಿ ಬರುತ್ತಿರಲಿಲಿಲ್ಲ...