ಶೌಚಾಲಯದ ಬಾಗಿಲಿನಲ್ಲೂ ಡಿಜಿಟಲ್ ಟೈಮರ್ ಫಿಕ್ಸ್‌ ಮಾಡಿದ ಚೀನೀ ಕಂಪನಿ...!

ತಮ್ಮ ಸಿಬ್ಬಂದಿ ಸಮಯ ವ್ಯರ್ಥ ಮಾಡದೆ ಕೆಲಸ ಮಾಡಬೇಕೆಂಬುದು ಎಲ್ಲಾ ಸಂಸ್ಥೆಯ ಬಯಕೆ. ಇದಕ್ಕಾಗಿ ಕೆಲ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ. ಈ ಮೂಲಕ ಅನಗತ್ಯ ಸಮಯ ವ್ಯರ್ಥವನ್ನು ತಡೆಯಲಾಗುತ್ತದೆ. ಆದರೆ, ಎಲ್ಲಾದರೂ ಶೌಚಾಲಯಕ್ಕೂ ಹೋಗುವ ಸಮಯವನ್ನೂ ಲೆಕ್ಕ ಹಾಕುವುದನ್ನು ನೋಡಿದ್ದೀರಾ...? ಚೀನಾದ ಕಂಪನಿಯೊಂದು ಈಗ ಇದೇ ಕಾರಣಕ್ಕೆ ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ.

ಬೀಜಿಂಗ್ ಮೂಲಕ ತಂತ್ರಜ್ಞಾನ ಕಂಪನಿಯೊಂದು ಈ ವಿಚಿತ್ರ ಹೆಜ್ಜೆ ಇಟ್ಟಿದೆ. ಈ ಸಂಸ್ಥೆ ತಮ್ಮ ಕಚೇರಿಯ ಶೌಚಾಲಯದ ಬಾಗಿಲಿನಲ್ಲಿಯೇ ಡಿಜಿಟಲ್ ಟೈಮರ್ ಫಿಕ್ಸ್‌ ಮಾಡಿದೆ. ಈ ಫೋಟೋಗಳು ಈಗ ಚೀನಾದ ಸಾಮಾಜಿಕ ಮಾಧ್ಯಮಗಳಲ್ಲಿ ಭರ್ಜರಿಯಾಗಿ ವೈರಲ್ ಆಗುತ್ತಿದೆ. ಸಂಸ್ಥೆಯ ಈ ನಡೆ ಬಹುತೇಕ ನೆಟ್ಟಿಗರ ಆಕ್ರೋಶಕ್ಕೆ ತುತ್ತಾಗಿದೆ. ತಮ್ಮ ಉತ್ಪಾದಕತೆ ಮತ್ತು ಲಾಭವನ್ನು ಹೆಚ್ಚಿಸುವ ಸಲುವಾಗಿ ಹೀಗೆ ಸಿಬ್ಬಂದಿ ಶೌಚಾಲಯಕ್ಕೆ ಹೋಗುವ ಅವಧಿಯನ್ನೂ ಲೆಕ್ಕ ಹಾಕುವುದು ಸರಿಯಲ್ಲ ಎಂಬುದು ಹಲವರ ಅಭಿಪ್ರಾಯ. ಕೆಲವರು ಇದು ಮಾನವ ಹಕ್ಕುಗಳು ಮತ್ತು ಗೌಪ್ಯತೆಯ ಉಲ್ಲಂಘನೆ ಎಂದು ಹೇಳಿಕೊಂಡಿದ್ದಾರೆ.

Also Read : ಅಗಲಿದ ಬೆಕ್ಕಿಗಾಗಿ ಚರ್ಚ್‌ನಲ್ಲಿ ಕೃತಜ್ಞತಾ ಸಮಾರಂಭ : ಇದರ ಹಿಂದಿದೆ ಹೃದಯಸ್ಪರ್ಶಿ ಕತೆ

ಹಾಗಂತ ಎಲ್ಲರೂ ಈ ನಡೆಯನ್ನು ವಿರೋಧಿಸಿದ್ದಾರೆ ಎಂದಲ್ಲ. ಕೆಲವರು ಸಂಸ್ಥೆಯ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ. ಕೆಲವು ಉದ್ಯೋಗಿಗಳು ಶೌಚಾಲಯದೊಳಗೆ ಕುಳಿತು ಫೋನಿನಲ್ಲಿ ಸುಮ್ಮನೆ ಕಾಲ ಕಳೆಯುತ್ತಿರುತ್ತಾರೆ ಎಂಬುದು ಇವರ ಆರೋಪ.

Also Read : ಕ್ಯಾನ್ಸರ್ ಪೀಡಿತ ಕಂದನ ಖುಷಿಗಾಗಿ ವೈದ್ಯರ ಬ್ಯಾಲೆ ಡಾನ್ಸ್‌ : ಕಲ್ಲುಹೃದಯವನ್ನೂ ಕರಗಿಸುವ ದೃಶ್ಯವಿದು

ಯಾವಾಗ ತಮ್ಮ ಸಂಸ್ಥೆ ಫೋಟೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿ ಪರ ವಿರೋಧ ಚರ್ಚೆಗೆ ಕಾರಣವಾಯಿತೋ ತಕ್ಷಣ ಎಚ್ಚೆತ್ತ ಕಂಪನಿ ಇದಕ್ಕೆ ಸ್ಪಷ್ಟನೆಯನ್ನೂ ನೀಡಿದೆ. `ಈ ಟೈಮರ್‌ಗಳು ನೌಕರರ ಶೌಚಾಲಯ ಬಳಕೆಯನ್ನು ಮಿತಿಗೊಳಿಸುವ ಉದ್ದೇಶದಿಂದ ಹಾಕಿಲ್ಲ. ಶೌಚಾಲಯದ `ಕೊರತೆ'ಯ ಗಂಭೀರತೆಗೆ ಪರಿಹಾರ ಕಂಡುಕೊಳ್ಳಲು ಹೀಗೆ ಮಾಡಲಾಗಿದೆ. ಈ ಕಚೇರಿ ಕಟ್ಟಡದಲ್ಲಿ ಶೌಚಾಲಯಗಳ ಸಂಖ್ಯೆ ಕಡಿಮೆ ಇದೆ. ಕಟ್ಟಡದ ವಿನ್ಯಾಸದ ಕಾರಣದಿಂದ ಹೊಸ ಶೌಚಾಲಯ ನಿರ್ಮಾಣ ಮಾಡಲೂ ಸಾಧ್ಯವಾಗುತ್ತಿಲ್ಲ. ಹೀಗಾಗಿ, ಎಷ್ಟು ಪೋರ್ಟಬಲ್ ಶೌಚಾಲಯಗಳನ್ನು ಅಳವಡಿಸಬೇಕೆಂದು ನಿರ್ಧರಿಸಲು ಎಷ್ಟು ಜನ, ಎಷ್ಟು ಅವಧಿಗೆ ಒಂದು ಕ್ಯುಬಿಕಲ್ ಅನ್ನು ಬಳಸಿದ್ದಾರೆ ಎಂದು ತಿಳಿದುಕೊಳ್ಳಲು ಈ ಟೈಮರ್ ಹಾಕಲಾಗಿದೆ' ಎಂದು ಸಂಸ್ಥೆ ಹೇಳಿಕೊಂಡಿದೆ.

Also Read : ಆನೆಗಳೊಂದಿಗೆ ಯಾವತ್ತೂ ಹೀಗೆ ವರ್ತಿಸಬೇಡಿ : ತಿರುಗಿ ಬಿದ್ದರೆ ಅಪಾಯ ಕಟ್ಟಿಟ್ಟಬುತ್ತಿ!

ಸಂಸ್ಥೆಯೇನೋ ತನ್ನ ಕಡೆಯ ವಾದವನ್ನು ಮಂಡಿಸಿದೆ. ಆದರೆ, ಈ ಸಮರ್ಥನೆ ಪೂರ್ಣ ಪ್ರಮಾಣದಲ್ಲಿ ನೆಟ್ಟಿಗರಿಗೆ ಸಮ್ಮತ ಎನಿಸಿಲ್ಲ. ಹೀಗಾಗಿ, ಕೆಲವರು ಇನ್ನೂ ಸಂಸ್ಥೆಯ ನಡೆಯನ್ನು ಟೀಕಿಸುತ್ತಿದ್ದಾರೆ. ಹೀಗಾಗಿ, ಪರ ವಿರೋಧದ ಚರ್ಚೆಯೊಂದಿಗೆ ಈ ಫೋಟೋಗಳು ಚೀನಾದ ಸೋಶಿಯಲ್ ಮೀಡಿಯಾದಲ್ಲಿ ಈಗ ಹರಿದಾಡುತ್ತಿದೆ.