ಝೂಗೆ ಬರುವವರಿಗೆ ಕೆಟ್ಟದಾಗಿ ಬೈಯುವ ಗಿಳಿಗಳು! : ಮೃಗಾಲಯದವರಿಗೆ ಶುರು ಹೊಸ ಪೀಕಲಾಟ!

ಎರಡು ಗಿಳಿಗಳ ನೀತಿ ಕತೆಯನ್ನು ನೀವು ಶಾಲಾ ದಿನಗಳಲ್ಲಿ ಕೇಳಿರಬಹುದು... ಎರಡು ಗಿಳಿ ಮರಿಗಳಲ್ಲಿ ಒಂದನ್ನು ಬೇಟೆಗಾರನೂ ಇನ್ನೊಂದನ್ನು ಸಂತನೂ ಕೊಂಡೊಯ್ದು ಸಾಕುತ್ತಾರೆ. ಇದಲ್ಲಿ ಬೇಟೆಗಾರನ ಬಳಿ ಇದ್ದ ಗಿಳಿ ಬೆಳೆದು ದೊಡ್ಡದಾದ ಮೇಲೆ ಯಾರಾದರೂ ಅತಿಥಿಗಳು ಮನೆಗೆ ಬಂದರೆ `ಹೊಡಿಯಿರಿ, ಕಡಿಯಿರಿ' ಎಂದು ಕಿರುಚಾಡಿದರೆ, ಸಂತ ಸಾಕಿದ್ದ ಗಿಳಿ `ಬನ್ನಿ ಕುಳಿತುಕೊಳ್ಳಿ, ಹಣ್ಣು ತಿನ್ನಿ, ನೀರು ಕುಡಿಯಿರಿ' ಎಂದು ಸತ್ಕಾರದ ಮಾತುಗಳನ್ನಾಡುತ್ತಿತ್ತು. ಅಂದರೆ, ಸಂಸ್ಕಾರದಿಂದ ಬದುಕು ಬದಲಾಗುತ್ತದೆ ಎಂಬುದು ಈ ಕತೆಯ ತಾತ್ಪರ್ಯ.

ಮನೆಗೆ ಬಂದವರಿಗೆ ಗಿಳಿಗಳು ಬೈದರೆ ಖಂಡಿತಾ ಮುಜುಗರವಾಗುತ್ತದೆ. ಮನಸ್ಸಿಗೆ ನೋವಾಗುತ್ತದೆ. ಸದ್ಯ ಇಲ್ಲೊಂದು ಮೃಗಾಲಯದಲ್ಲಿ ಅಧಿಕಾರಿಗಳು ಇದೇ `ನೋವಿನ' ಪರಿಸ್ಥಿತಿಯನ್ನು ಎದುರಿಸುತ್ತಿದ್ದಾರೆ. ಯಾಕೆಂದರೆ, ಇಲ್ಲಿ ಐದು ಗಿಳಿಗಳು ಮೃಗಾಲಯಕ್ಕೆ ಬರುವ ಜನರನ್ನು ಕಂಡು ಅತ್ಯಂತ ಕೆಟ್ಟದಾಗಿ ಬೈಯುವುದನ್ನು ಕಲಿತಿವೆ...! ಹೀಗಾಗಿ, ಈ ಗಿಳಿಗಳನ್ನು ಐಸೋಲೇಷನ್ ಅಥವಾ ಪ್ರತ್ಯೇಕ ವಾಸಕ್ಕೆ ಕಳುಹಿಸಲಾಗಿದೆ.

ಇದು ಯುಕೆಯ ಲಿಂಕನ್ಶೈರ್ ವನ್ಯಜೀವಿ ಉದ್ಯಾನವನದ ಕತೆ. ಆಗಸ್ಟ್‌ 15ರಂದು ಈ ಮೃಗಾಲಯಕ್ಕೆ ಐದು ಆಫ್ರಿಕನ್ ಗಿಳಿಗಳನ್ನು ತರಲಾಗಿತ್ತು. ಇದಾದ ಬಳಿಕ ಈ ಐದು ಗಿಳಿಗಳನ್ನೂ ಒಂದೇ ಕೋಣೆಯಲ್ಲಿ ಇಡಲಾಗಿತ್ತು. ಆದರೆ, ಈ ವೇಳೆ, ಅದ್ಹೇಗೋ ಈ ಎಲ್ಲಾ ಗಿಳಿಗಳು ಒಂದಷ್ಟು ಕೆಟ್ಟ ಶಬ್ದಗಳನ್ನು ಪರಸ್ಪರ ಕಲಿತುಕೊಂಡಿದ್ದವು...! ಮೊದಲು ಮೊದಲು ವನ್ಯಪಾಲಕರು, ಮೃಗಾಲಯದ ಸಿಬ್ಬಂದಿ ಗಿಳಿಗಳ ಈ ಅಸಭ್ಯ ಮಾತುಗಳನ್ನು ತಮಾಷೆಯಂತೆಯೇ ತೆಗೆದುಕೊಳ್ಳುತ್ತಿದ್ದರು. ಆದರೆ, ಕ್ರಮೇಣ ಈ ಗಿಳಿಗಳು ಮೃಗಾಲಯಕ್ಕೆ ಬರುವ ಜನರಿಗೆ ಕೆಟ್ಟದಾಗಿ ಬೈಯ್ಯುವುದಕ್ಕೆ ಶುರು ಮಾಡಿದ್ದವು. ಹೀಗಾಗಿ, ಮೃಗಾಲಯಕ್ಕೆ ಕ್ರಮ ಕೈಗೊಳ್ಳದೆ ವಿಧಿ ಇರಲಿಲ್ಲ.

Also Read : ಮೊದಲ ಬಾರಿಗೆ ತನ್ನದೇ ಹೆಸರು ಹೇಳಿ ಖುಷಿ ಪಟ್ಟ 5 ವರ್ಷದ ಬಾಲಕ! : ಹೇಗಿತ್ತು ಗೊತ್ತಾ ಆ ಸಡಗರ?

`ಒಂದೇ ವಾರದಲ್ಲಿ ಬೇರೆ ಬೇರೆ ದಿನ ಈ ಗಿಳಿಗಳನ್ನು ತಂದಿದ್ದರೂ ಕಾಕತಾಳೀಯವೆಂಬಂತೆ ಈಗಾಗಲೇ ಕೆಲವೊಂದು ಕೆಟ್ಟ ಶಬ್ದಗಳನ್ನು ಕಲಿತಿದ್ದ ಗಿಳಿಗಳನ್ನು ಒಂದೇ ಕೋಣೆಯಲ್ಲಿ ಇಡಲಾಗಿತ್ತು. ಇಲ್ಲಿ ಇವುಗಳು ಪರಸ್ಪರ ಕೆಟ್ಟ ಶಬ್ದಗಳನ್ನು ಮತ್ತಷ್ಟು ಕಲಿತುಕೊಂಡಿದ್ದವು' ಎಂದು ವನ್ಯಜೀವಿ ಉದ್ಯಾನದ ಸಿಇಒ ಸ್ಟೀವ್ ನಿಕೋಲ್ಸ್ ಹೇಳಿದ್ದಾರೆ.

Also Read : ಅಸ್ಥಿಪಂಜರದೊಂದಿಗೆ ಮುದ್ದು ಕಂದನ ಸ್ನೇಹ...! : ಅಚ್ಚರಿಯ ವಿಡಿಯೋ ವೈರಲ್

ಈ ಐದು ಗಿಳಿಗಳನ್ನು ಕೇವಲ 20 ನಿಮಿಷ ಪ್ರಮುಖ ಪ್ರದರ್ಶನದ ಗೂಡಿನಲ್ಲಿ ಇಡಲಾಗಿತ್ತು. ಈ ಸಂದರ್ಭದಲ್ಲಿಯೇ ಇವುಗಳು ಸಾಕಷ್ಟು ಕೆಟ್ಟ ಶಬ್ದಗಳನ್ನು ಜನರ ಮೇಲೆ ಪ್ರಯೋಗಿಸಿದ್ದವು. ಹೀಗಾಗಿ, ಇವುಗಳನ್ನು ಮತ್ತೆ ಪ್ರತ್ಯೇಕವಾಗಿ ಇಡಲಾಗಿದೆ. ಜೊತೆಗೆ ಈ ಐದು ಗಿಳಿಗಳನ್ನು ಬೇರೆ ಬೇರೆ ವಿಭಾಗಗಳೊಂದಿಗೆ ಬಿಡುವ ಯೋಚನೆಯೂ ಅಧಿಕಾರಿಗಳಿಗೆ ಇದೆ. ಹೀಗಾದಾಗ ಈ ಗಿಳಿಗಳು ಪರಸ್ಪರ ಅಶ್ಲೀಲ ಪದಗಳನ್ನು ಕಲಿಯುವ ಸಾಧ್ಯತೆ ಇಲ್ಲ ಎಂಬುದು ಇಲ್ಲಿನ ಅಧಿಕಾರಿಗಳ ಮಾತು.

Also Read : ಉತ್ತರ ಪ್ರದೇಶ ಯುವಕನ `ಕಪಲ್ ಚಾಲೆಂಜ್‌ಗೆ' ಬಂತು ಹಾಲಿವುಡ್ ನಟಿಯಿಂದ ಪ್ರತಿಕ್ರಿಯೆ...!

ಹಾಗಂತ ಗಿಳಿಗಳು ಹೀಗೆ `ಅಸಭ್ಯ' ವರ್ತನೆ ತೋರುವುದು ಇದೇ ಮೊದಲೇನು ಅಲ್ಲ. 2018ರಲ್ಲಿ ಜೆಸ್ಸಿಯಾ ಎಂಬ ಸಾಕುಗಿಳಿ ತನ್ನ `ಅಶ್ಲೀಲ' ಪದ ಬಳಕೆಯ ಕಾರಣದಿಂದಲೇ ಸುದ್ದಿಯಾಗಿತ್ತು. ಲಂಡನ್‌ನ ತನ್ನ ಮನೆಯಿಂದ ಹಾರಿದ ಈ ಗಿಳಿ ಪಕ್ಕದ ಕಟ್ಟಡವೊಂದರ ಛಾವಣಿಯಲ್ಲಿ ಮೂರು ದಿನ ಕುಳಿತಿತ್ತು. ಈ ವೇಳೆ, ಮಾಲಿಕರಿಗೆ ಇದನ್ನು ಹಿಡಿಯಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ, ಅವರು ಅಗ್ನಿಶಾಮಕ ದಳದ ಸಹಾಯ ಪಡೆದಿದ್ದರು. ಇತ್ತ, ಗಿಳಿಯ ರಕ್ಷಣೆಗೆ ಅಗ್ನಿಶಾಮಕ ದಳದ ಸಿಬ್ಬಂದಿಯೊಬ್ಬರು ತೆರಳಿದ್ದ ಸಂದರ್ಭದಲ್ಲಿ ಈ ಗಿಳಿ ಇವರನ್ನು ಅತ್ಯಂತ ಕೆಟ್ಟ ಶಬ್ದಗಳಿಂದ ದಬಾಯಿಸಿತ್ತು...! ಇದು ಸಾಕಷ್ಟು ಸುದ್ದಿಯಾಗಿತ್ತು.