17 ವರ್ಷದ ಹುಡುಗಿಯೊಬ್ಬಳ ಹೊಟ್ಟೆಯಲ್ಲಿತ್ತು 6.8 ಕೆಜಿಯಷ್ಟು ಕೂದಲಿನ ಗಡ್ಡೆ...!

17 ವರ್ಷದ ಹುಡುಗಿಯ ಹೊಟ್ಟೆಯಲ್ಲಿತ್ತು 6.8 ಕೆಜಿಯಷ್ಟು ತೂಕದ ಕೂದಲಿನ ಗಡ್ಡೆ...! ಇದು ಜಾರ್ಖಂಡ್‌ನಲ್ಲಿ ನಡೆದ ಘಟನೆ. ಆ ಹುಡುಗಿ ಹೊಟ್ಟೆ ನೋವಿನಿಂದ ಬಳಲುತ್ತಿದ್ದಳು. ಹೀಗಾಗಿ, ಭಯದಿಂದ ಮನೆಯವರು ವೈದ್ಯರಲ್ಲಿಗೆ ಕರೆದೊಯ್ದಿದ್ದರು. ಈ ವೇಳೆ, ಗೊತ್ತಾಗಿದ್ದು ಅಚ್ಚರಿಯ ವಿಷಯ. ಅದೇನೆಂದರೆ, ಈ ಹುಡುಗಿಯ ಹೊಟ್ಟೆಯೊಳಗೆ ಬೃಹತ್ ಗಾತ್ರದ ಕೂದಲಿನ ಗಡ್ಡೆ ಇತ್ತು...!

ಇಷ್ಟಕ್ಕೂ ಹುಡುಗಿಯ ಹೊಟ್ಟೆಯಲ್ಲಿ ಹೀಗೆ ಕೇಜಿಗಟ್ಟಲೆ ಕೂದಲಿನ ರಾಶಿ ಇರಲು ಕಾರಣ ಆಕೆಯ ವಿಚಿತ್ರ ಅಭ್ಯಾಸ. ಹೌದು, ಈ ಹುಡುಗಿ ತನ್ನ ಕೂದಲನ್ನು ಜಗಿಯುವ ಅಭ್ಯಾಸ ಹೊಂದಿದ್ದಳು...! ಹಲವಾರು ವರ್ಷಗಳಿಂದ ಈಕೆಗೆ ಈ ಅಭ್ಯಾಸ ರೂಢಿಯಾಗಿತ್ತು. ಕ್ರಮೇಣ ಇದು ದೊಡ್ಡ ಸಮಸ್ಯೆಯ ರೂಪ ಪಡೆದಿತ್ತು.

Also Read : ಬಾಲಕಿಯ ಹೊಟ್ಟೆಯಲ್ಲಿತ್ತು ಅರ್ಧ ಕೆ.ಜಿ ತಲೆಕೂದಲು, ಖಾಲಿ ಶ್ಯಾಂಪೂ ಪ್ಯಾಕೇಟ್ ಚೂರು...!

ಹೀಗಾಗಿ, ಮೂರು ವರ್ಷಗಳ ಹಿಂದೆ ಅಲ್ಟ್ರಾಸೌಂಡ್ ಪರೀಕ್ಷೆಯಲ್ಲಿ ಈ ಹುಡುಗಿಯ ಹೊಟ್ಟೆಯಲ್ಲಿ ಗಡ್ಡೆ ಇದೆ ಎಂದು ವೈದ್ಯರು ಅಂದಾಜಿಸಿದ್ದರು. ಬಳಿಕ ಈಕೆಯ ಹೊಟ್ಟೆಯಲ್ಲಿ ಇರುವುದು ಕೂದಲಿನ ರಾಶಿಯ ಚೆಂಡು ಎಂದು ವೈದ್ಯರು ತಿಳಿದುಕೊಂಡಿದ್ದರು.

Also Read : ಮಹಿಳೆಯ ಅಂಡಾಶಯದೊಳಗೆ ಬೆಳೆಯುತ್ತಿತ್ತು ಕೂದಲು...!

ಹೀಗೆ ಹುಡುಗಿಯ ಹೊಟ್ಟೆಯಲ್ಲಿ ಕೂದಲಿನ ಗಡ್ಡೆ ಇದೆ ಎಂದು ಗೊತ್ತಾಗುತ್ತಿದ್ದಂತೆಯೇ ವೈದ್ಯರು ಶಸ್ತ್ರಚಿಕಿತ್ಸೆ ನಡೆಸಿದ್ದಾರೆ. ಬೊಕಾರೊ ಜಿಲ್ಲೆಯ ಖಾಸಗಿ ಆಸ್ಪತ್ರೆಯ ವೈದ್ಯರ ತಂಡ ಸತತ ಆರು ಗಂಟೆಗಳ ಶಸ್ತ್ರಚಿಕಿತ್ಸೆಯ ಬಳಿಕ ಈ ಗಡ್ಡೆಯನ್ನು ಹೊರತೆಗೆದಿದ್ದಾರೆ. ಇದೊಂದು ಸೂಕ್ಷ್ಮ ಶಸ್ತ್ರಚಿಕಿತ್ಸೆಯಾಗಿತ್ತು. ಈ ಶಸ್ತ್ರಚಿಕಿತ್ಸೆಯನ್ನು ನೆರವೇರಿಸಿದ್ದ ಡಾ.ಜಿ.ಎನ್ ಸಾಹು, ತನ್ನ 40 ವರ್ಷಗಳ ವೃತ್ತಿಜೀವನದಲ್ಲಿ ಎಂದಿಗೂ ರೋಗಿಯ ಹೊಟ್ಟೆಯಲ್ಲಿ ಇಷ್ಟು ದೊಡ್ಡ ಪ್ರಮಾಣದ ಕೂದಲಿನ ಗಡ್ಡೆಯನ್ನು ಕಂಡಿಲ್ಲ ಎಂದು ಹೇಳಿದ್ದಾರೆ. ಸದ್ಯ ಈ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿದ್ದು, ಯುವತಿ ಚೇತರಿಸಿಕೊಳ್ಳುತ್ತಿದ್ದಾಳೆ.

Also Read : ಸೆಲ್ಫಿ ಕ್ರೇಜ್ : ಪ್ಯಾರಾಗ್ಲೈಡಿಂಗ್ ವೇಳೆ 5,000 ಅಡಿಯಿಂದ ಕೆಳಗೆ ಬಿತ್ತು ಹೊಸ ದುಬಾರಿ ಮೊಬೈಲ್ ಫೋನ್!

ಹಾಗಂತ, ಹೀಗೆ ಕೂದಲಿನ ಗಡ್ಡೆಯ ಸಮಸ್ಯೆ ಎದುರಿಸುತ್ತಿರುವ ಪ್ರಕರಣ ಇದೇ ಮೊದಲೇನು ಅಲ್ಲ. ಸಾಕಷ್ಟು ಸಂದರ್ಭದಲ್ಲಿ ಇಂತಹ ಘಟನೆಗಳು ಬೆಳಕಿಗೆ ಬರುತ್ತಲಿದೆ. ವೈದ್ಯಕೀಯ ಪರಿಭಾಷೆಯಲ್ಲಿ ಇದನ್ನು ರಾಪುಂಜೆಲ್ ಸಿಂಡ್ರೋಮ್ ಎಂದು ಕರೆಯಲಾಗುತ್ತದೆ. 2019ರ ಮಾರ್ಚ್‌ನಲ್ಲಿ ಚೀನಾದ ಡೊನ್‌ಘುವಾ ಆಸ್ಪತ್ರೆಯ ವೈದ್ಯರು 8 ವರ್ಷದ ಮಗುವಿನ ಹೊಟ್ಟೆಯೊಳಗೆ 1.5 ಕಿಲೋಗ್ರಾಂಗಳಷ್ಟು ತೂಕದ ಕೂದಲಿನ ಬೃಹತ್ ಉಂಡೆಯನ್ನು ಹೊರತೆಗೆದಿದ್ದರು. ಇದಾಗಿ ಎರಡು ತಿಂಗಳ ನಂತರ ರಷ್ಯಾದ ಆಸ್ಪತ್ರೆಯ ವೈದ್ಯರು 10 ವರ್ಷಗಳಿಂದ ತನ್ನ ಕೂದಲು ತಿನ್ನುತ್ತಿದ್ದ 16 ವರ್ಷದ ಹುಡುಗಿಯ ಹೊಟ್ಟೆಯಿಂದ ಇಂತಹದ್ದೇ ಗಡ್ಡೆಯನ್ನು ಶಸ್ತ್ರಚಿಕಿತ್ಸೆ ಮೂಲಕ ತೆಗೆದಿದ್ದರು. 2019ರ ಸೆಪ್ಟೆಂಬರ್‌ನಲ್ಲಿ ಲುಧಿಯಾನಾದ ಮಹಾವೀರ ಸಿವಿಲ್ ಆಸ್ಪತ್ರೆಯ ವೈದ್ಯರ ತಂಡವು ಇದೇ ಸಮಸ್ಯೆ ಎದುರಿಸುತ್ತಿದ್ದ ಹದಿಹರೆಯದ ಇನ್ನೊಬ್ಬ ರೋಗಿಯ ಹೊಟ್ಟೆಯಿಂದ 22 ಸೆಂ.ಮೀ ನಿಂದ 8 ಸೆಂ.ಮೀ ಅಳತೆಯ ಕೂದಲಿನ ಗಡ್ಡೆಯನ್ನು ಹೊರತೆಗೆದಿದ್ದರು.