ನಡುರಸ್ತೆಯಲ್ಲಿ ಕರಡಿಗಳ ಕಾದಾಟ...! : ಇಲ್ಲಿದೆ ಅಪರೂಪದ ವೀಡಿಯೋ

ಅದೊಂದು ಭಯಾನಕ ಕಾಳಗ. ಸಮರಕ್ಕೆ ನಿಂತ ಎರಡು ಬಲಶಾಲಿಗಳು ಸೋಲೊಪ್ಪಿಕೊಳ್ಳಲೇ ಸಿದ್ಧವಾಗಿಲ್ಲ. ಭಯಾನಕ ಆರ್ಭಟ ಬೇರೆ. ಈ ಆರ್ಭಟ ಕೇಳಿದರೆನೇ ಎದೆ ಧಗ್ ಎನ್ನುತ್ತದೆ.

ಇದು ಬ್ರಿಟಿಷ್ ಕೊಲಂಬಿಯಾ ಹೈವೇಯಲ್ಲಿ ಕ್ಯಾಮೆರಾ ಕಣ್ಣಿಗೆ ಬಿದ್ದ ಅಪರೂಪದ ವೀಡಿಯೋ. ದೈತ್ಯ ಕರಡಿಗಳೆರಡು ಇಲ್ಲಿ ಪರಸ್ಪರ ಯುದ್ಧಕ್ಕೆ ನಿಂತಿದ್ದವು. ಯಾವ ಕರಡಿಗೂ ಹಿಮ್ಮೆಟ್ಟುವ ಮನಸ್ಸಿಲ್ಲ. ಒಂದು ಸಲ ಬಿದ್ದರೆ ಮತ್ತೆ ಎದ್ದು ಎದುರಾಳಿಯನ್ನು ಹೊಡೆದುರುಳಿಸುವಂತಹ ತಾಕತ್ತು. ನೋಡುವುದಕ್ಕೆ ಕೊಂಚ ಭಯವಾದರೂ ದೂರದಲ್ಲಿ ನಿಂತು ವೀಕ್ಷಿಸಿದರೆ ಕಣ್ಣಿಗಂತೂ ಹಬ್ಬ.


ಕೆನಡಾ ಮೂಲದ ಕ್ಯಾರಿ ಮೆಕ್‌ಗಿಲ್ಲಿವ್ರೇ ಸ್ಟೀವರ್ಟ್ ಕ್ಯಾಸಿಯರ್ ಹೈವೇಯಲ್ಲಿ ಸಾಗುತ್ತಿದ್ದಾಗ ಈ ಅಪರೂಪದ ದೃಶ್ಯ ಇವರ ಕಣ್ಣಿಗೆ ಬಿದ್ದಿದೆ. ತಕ್ಷಣ ಇವರು ತಮ್ಮ ಕ್ಯಾಮೆರಾದಲ್ಲಿ ಈ ದೃಶ್ಯ ಸೆರೆ ಹಿಡಿದಿದ್ದು, ತಮ್ಮ ಫೇಸ್‌ಬುಕ್ ಅಕೌಂಟಿನಲ್ಲೂ ಶೇರ್ ಮಾಡಿಕೊಂಡಿದ್ದಾರೆ. ಹೋರಾಡಿ ಸುಸ್ತಾದ ಒಂದು ಕರಡಿ ಓಡುವ ದೃಶ್ಯದೊಂದಿಗೆ ಈ ವೀಡಿಯೋ ಕೊನೆಗೊಳ್ಳುತ್ತದೆ. `ತಾನು ನಿಮಗಾಗಿ ಅದ್ಭುತ ಮತ್ತು ಅಪರೂಪದ ವೀಡಿಯೋ ಶೇರ್ ಮಾಡುತ್ತಿದ್ದೇನೆ' ಎಂದು ಕ್ಯಾರಿ ಬರೆದುಕೊಂಡಿದ್ದಾರೆ.

ಸದ್ಯ ಕ್ಯಾರಿ ಮೆಕ್‌ಗಿಲ್ಲಿವ್ರೇ ಸೆರೆ ಹಿಡಿದ ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲೂ ವೈರಲ್ ಆಗುತ್ತಿದೆ. ಇದುವರೆಗೆ ಸುಮಾರು 15 ಲಕ್ಷಕ್ಕೂ ಅಧಿಕ ಬಾರಿ ಈ ವೀಡಿಯೋ ವೀಕ್ಷಿಸಲಾಗಿದೆ. ಹಲವರು ಇದನ್ನು ಶೇರ್ ಮಾಡಿಕೊಂಡಿದ್ದು, ಬಗೆಬಗೆ ಕಮೆಂಟ್ಸ್ ಕೂಡಾ ಬರುತ್ತಿದೆ.