ರೈಲು ಬರುತ್ತಿದ್ದಾಗಲೇ ಹಳಿಯಲ್ಲಿ ಸಿಕ್ಕಾಕಿಕೊಂಡ ವ್ಹೀಲ್‌ಚೇರ್! : ಸಿನೆಮಾಕ್ಕಿಂತ ಭಿನ್ನವಾಗಿಲ್ಲ ಈ ದೃಶ್ಯ!

ಇದು ಅದೃಷ್ಟವೂ ಹೌದು, ದುರಾದೃಷ್ಟವೂ ಹೌದು...! ಅರೆಕ್ಷಣದಲ್ಲಿ ಒಬ್ಬ ವ್ಯಕ್ತಿಗೆ ಈ ಎರಡರ ಅನುಭವವೂ ಆಗಿದೆ. ಒಂದೊಮ್ಮೆ ಆ ಮಹಿಳಾ ಅಧಿಕಾರಿ ಅಲ್ಲಿಗೆ ಬರದೇ ಇರುತ್ತಿದ್ದರೆ ಅಲ್ಲಿ ಏನಾಗುತ್ತಿತ್ತು ಎಂದು ಊಹಿಸುವುದಕ್ಕೇ ಸಾಧ್ಯವಿಲ್ಲ. ಅಷ್ಟು ಭಯಾನಕವಾಗಿದೆ ಈ ದೃಶ್ಯ.

ಇದು ಕ್ಯಾಲಿಫೋರ್ನಿಯಾದಲ್ಲಿ ನಡೆದಿರುವ ಘಟನೆ. 66 ವರ್ಷದ ವೃದ್ಧರೊಬ್ಬರು ತಮ್ಮ ವ್ಹೀಲ್‌ಚೇರ್‌ನಲ್ಲಿ ಸಾಗುತ್ತಿದ್ದರು. ಆಗ ಅಲ್ಲೇ ರೈಲ್ವೇ ಹಳಿಯೂ ಇತ್ತು. ಈ ಹಳಿಯನ್ನೂ ಬಹುಬೇಗ ದಾಟುವ ಎಂದು ಇವರು ಮುಂದೆ ಸಾಗುತ್ತಿದ್ದರು. ಪಾಪ ಆ ವ್ಯಕ್ತಿಗೆ ಬಹುಶಃ ಅದು ರೈಲು ಬರುವ ಸಮಯವಿದೆಂದು ಗೊತ್ತಿರಲಿಲ್ಲ. ಹೀಗಾಗಿ, ಸರಾಗವಾಗಿ ಸಾಗುತ್ತಿದ್ದರು. ಆದರೆ, ಇವರ ದುರಾದೃಷ್ಟಕ್ಕೆ ಇವರ ವ್ಹೀಲ್‌ಚೇರ್ ಹಳಿಯಲ್ಲಿ ಸಿಕ್ಕಿಬಿದ್ದಿತ್ತು. ಅತ್ತ ರೈಲು ಬರುತ್ತಿರುವುದೂ, ಇತ್ತ ವ್ಹೀಲ್‌ಚೇರ್ ಸಿಕ್ಕಿ ಬೀಳುವುದಕ್ಕೂ ಹೆಚ್ಚು ಹೊತ್ತಿನ ಅಂತರ ಇರಲಿಲ್ಲ. ಆದರೆ, ಈ ವ್ಯಕ್ತಿಯ ಅದೃಷ್ಟ ಚೆನ್ನಾಗಿತ್ತು. ಯಾಕೆಂದರೆ, ಇದೇ ದಾರಿಯಲ್ಲಿ ಒಬ್ಬರು ಹೃದಯವಂತ ಮತ್ತು ಸಾಹಸಿ ಮಹಿಳಾ ಪೊಲೀಸ್ ಅಧಿಕಾರಿಯೊಬ್ಬರು ತಮ್ಮ ಕಾರಿನಲ್ಲಿ ಬರುತ್ತಿದ್ದರು. ಈ ದೃಶ್ಯ ಕಂಡೊಡನೆ ಈ ಅಧಿಕಾರಿ ತಮ್ಮ ಜೀವದ ಹಂಗನ್ನೂ ತೊರೆದು ಓಡಿ ಹೋಗಿ ಆ ವೃದ್ಧನನ್ನು ವ್ಹೀಲ್‌ಚೇರ್‌ನಿಂದ ಎಳೆದಿದ್ದಾರೆ. ಅಧಿಕಾರಿ ವೃದ್ಧನನ್ನು ಎಳೆಯುವುದೂ, ರೈಲು ಅದೇ ಕ್ಷಣಕ್ಕೆ ಹಳಿಯಲ್ಲಿ ಸಾಗುವ ಸಮಯವೂ ಒಂದೇ ಆಗಿತ್ತು...! ಎಳೆದ ರಭಸಕ್ಕೆ ಇಬ್ಬರೂ ನೆಲಕ್ಕೆ ಬಿದ್ದಿದ್ದರು. ಕೂದಳೆಲೆ ಅಂತರದಲ್ಲಿ ಆ ವೃದ್ಧ ಪ್ರಾಣಾಪಾಯದಿಂದ ಪಾರಾಗಿದ್ದರು...!

Also Read : ದೇಹದ ತೂಕದ ಕಾರಣದಿಂದಲೇ ಉಳಿಯಿತು ಯುವಕನ ಜೀವ! : ಇಲ್ಲಿದೆ ವಿಡಿಯೋ

ಈ ಅಧಿಕಾರಿ ತನ್ನ ವಾಹನದಿಂದ ಇಳಿದು ವ್ಯಕ್ತಿಯನ್ನು ಎಳೆಯುವ ಆ ಅವಧಿಯಲ್ಲಿ ನಡುವೆ ಇದ್ದದ್ದು ಬರೀ 15 ಸೆಕೆಂಡುಗಳು ಮಾತ್ರ...! ಇಷ್ಟು ಚಿಕ್ಕ ಅವಧಿಯಲ್ಲಿ ಈ ಅಧಿಕಾರಿ ಒಬ್ಬರ ಪ್ರಾಣವನ್ನೇ ಉಳಿಸಿ ಶಹಬ್ಬಾಸ್ ಎನಿಸಿಕೊಂಡಿದ್ದಾರೆ. ಈ ಅಷ್ಟೂ ದೃಶ್ಯ ಪೊಲೀಸ್ ಅಧಿಕಾರಿಯ ಬಾಡಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಈ ವಿಡಿಯೋವನ್ನು ಪೊಲೀಸ್ ಇಲಾಖೆ ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ಹಂಚಿಕೊಂಡಿದೆ.

Also Read : 114 ದಿನ ದೂರ ದೂರ, ಪತಿಯ ಆರೈಕೆಗೆ ಆಸ್ಪತ್ರೆಯಲ್ಲೇ ಕೆಲಸಕ್ಕೆ ಸೇರಿದ ಪತ್ನಿ! : ಇದು ಅಪೂರ್ವ ಪ್ರೀತಿಯ ಕತೆ


ಈ ಹೃದಯವಂತ ಪೊಲೀಸ್ ಅಧಿಕಾರಿಯನ್ನು ಎರಿಕಾ ಉರ್ರಿಯಾ ಎಂದು ಗುರುತಿಸಲಾಗಿದೆ. ಬೆಳಗ್ಗೆ 8: 44ರ ಸುಮಾರಿಗೆ ಲೋಡಿ ಅವೆನ್ಯೂದಲ್ಲಿ ರೈಲು ಹಳಿಗಳ ಬಳಿ ಇವರು ಗಸ್ತು ತಿರುಗುತ್ತಿದ್ದಾಗ ಈ ಘಟನೆ ನಡೆದಿದೆ. ಘಟನೆ ವೇಳೆ ವೃದ್ಧನ ಕಾಲಿಗೆ ಗಾಯಗಳಾಗಿದೆ. ಬಳಿಕ ತಕ್ಷಣ ಆ ವೃದ್ಧನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಎರಿಕಾ ತಮ್ಮ ಪ್ರಾಣದ ಹಂಗು ತೊರೆದು ಈ ವೃದ್ಧನನ್ನು ರಕ್ಷಿಸಿದ್ದಕ್ಕೆ ಪೊಲೀಸ್ ಇಲಾಖೆ ಬಹಳ ಮೆಚ್ಚುಗೆ ವ್ಯಕ್ತಪಡಿಸಿದೆ.

Also Read : ಫ್ಲೈಓವರ್ ನಡುವೆ ಇದೆ ಮನೆ...! : ಎಲ್ಲರೂ ಜಾಗ ಬಿಟ್ಟು ಕೊಟ್ಟರೂ ಈಕೆ ಬಿಡಲಿಲ್ಲ!


ಸದ್ಯ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದು, ಎಲ್ಲರೂ ಎರಿಕಾ ಅವರ ಶೌರ್ಯವನ್ನು ಕೊಂಡಾಡಿದ್ದಾರೆ. ನಿಜಕ್ಕೂ ಎರಿಕಾ ಅವರ ಸಾಹಸ ಮೆಚ್ಚುವಂತಹದ್ದೇ. ಬರೀ ಹದಿನೈದು ಸೆಕೆಂಡುಗಳ ಅಂತರದಲ್ಲಿ ಇವರು ತೋರಿದ ಸಮಯಪ್ರಜ್ಞೆ ಒಬ್ಬರ ಪ್ರಾಣವನ್ನೇ ಉಳಿಸಿದೆ.