Super Dad : ಸಾವಿಗೂ ಹೆದರದೆ ಮಗಳ ರಕ್ಷಣೆಗೆ ನಿಂತ ಅಪ್ಪ : ಕಲ್ಲುಹೃದಯವನ್ನೇ ಕರಗಿಸುವಂತಹ ವಿಡಿಯೋ ಇದು

ಹೆತ್ತವರು ಎಂದರೆ ದೇವರು... ಪ್ರತೀಕ್ಷಣವೂ ಮಕ್ಕಳ ಬಗ್ಗೆಯೇ ಯೋಚಿಸುವ ಜೀವಗಳೆಂದರೆ ಅದು ಅಪ್ಪ ಅಮ್ಮ ಮಾತ್ರ... ಮಕ್ಕಳ ರಕ್ಷಣೆ, ಒಳಿತಿನ ವಿಚಾರದಲ್ಲಿ ಹೆತ್ತವರು ಜೀವ ಕೊಡಲೂ ಸಿದ್ಧ. ಇದಕ್ಕೆ ಈ ವಿಡಿಯೋಕ್ಕಿಂತ ಬೇರೆ ಸಾಕ್ಷಿ ಬೇಕಾಗಿಲ್ಲ...


ಸೂಪರ್ ತಂದೆಯೊಬ್ಬರು ತನ್ನ ಮಗಳನ್ನು ರೈಲಿನಡಿಗೆ ಬೀಳುವುದನ್ನು ತಪ್ಪಿಸಿದ್ದಾರೆ. ಅದೂ ತನ್ನ ಜೀವದ ಹಂಗು ತೊರೆದು...! ಅಪ್ಪ ಅಂದರೇನೆ ಹಾಗೆ. ತನ್ನ ಬದುಕಿನ ಬಗ್ಗೆ ಇವರು ಅರೆಕ್ಷಣವೂ ಇಲ್ಲಿ ಯೋಚಿಸಲಿಲ್ಲ... ತನ್ನ ಪ್ರಾಣವನ್ನೂ ಲೆಕ್ಕಿಸಲಿಲ್ಲ...

Also Read : 4 ಕಿಲೋ ಮೀಟರ್ ನಡೆದೇ ವಧುವಿನ ಮನೆಗೆ ಹೋದ ವರ...! : ಯಾಕೆ ಗೊತ್ತಾ...?

ಇದು ಈಜಿಪ್ಟಿನ ಇಸ್ಮಾಯಿಲಿಯಾದಲ್ಲಿ ನಡೆದ ಘಟನೆ. ಹೆಣ್ಣು ಮಗಳು ರೈಲು ಹಳಿ ದಾಟುವಾಗ ಆಯತಪ್ಪಿ ಹಳಿ ಮೇಲೆ ಬಿದ್ದಿದ್ದಾಳೆ. ಇದೇ ಸಂದರ್ಭದಲ್ಲಿ ಗೂಡ್ಸ್‌ ರೈಲು ಕೂಡಾ ಬಂದಿದೆ. ಈ ವೇಳೆ, ಒಂದಿನಿತೂ ಯೋಚಿಸದ ತಂದೆ ತಾನೂ ಹಳಿ ಪಕ್ಕ ಹಾರಿ ಮಗಳನ್ನು ಬಿಗಿದಪ್ಪಿ ರಕ್ಷಿಸಿದ್ದಾರೆ. ಈ ವಿಡಿಯೋವನ್ನು ಅಲ್ಲೇ ಇದ್ದವರು ತಮ್ಮ ಮೊಬೈಲ್ ಫೋನಿನಲ್ಲಿ ಸೆರೆ ಹಿಡಿದಿದ್ದು, ಇದು ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದೆ.

Also Read : ಶಾಪಗ್ರಸ್ತ ದ್ವೀಪ : ದಿವಾಳಿಯಾಗುತ್ತಿದ್ದ ಸಿರಿವಂತರು, ನಿಗೂಢವಾಗಿ ಜೀವ ಬಿಡುತ್ತಿದ್ದ ಮಾಲೀಕರು...!

ಒಂದು ಕ್ಷಣ ಹೃದಯವೇ ಭಾರವಾಗುವಂತಹ ದೃಶ್ಯವಿದು. ಈ ಘಟನೆ ನಡೆಯುವಾಗ ರೈಲು ನಿಲ್ದಾಣದಲ್ಲಿ ಇದ್ದವರು ಭಯಭೀತರಾಗಿ ನಿಂತಿದ್ದರು. ಇಬ್ಬರಿಗೂ ಏನೂ ಆಗದಿರಲಿ ಎಂದು ಮನಸ್ಸಿನಲ್ಲೇ ಪ್ರಾರ್ಥಿಸುತ್ತಿದ್ದರು. ನಿಜಕ್ಕೂ ತಂದೆಯ ಈ ಪ್ರೀತಿ ನೋಡಿದಾಗ ಹೆಮ್ಮೆ ಎನಿಸುತ್ತದೆ. ಹೀಗಾಗಿ, ಈ ತಂದೆಯನ್ನು ನೆಟ್ಟಿಗರು `ಸೂಪರ್ ಡ್ಯಾಡ್' ಎಂದು ಬಣ್ಣಿಸಿದ್ದಾರೆ.

ಹಾಗಂತ, ಎಲ್ಲರೂ ಈ ತಂದೆಯನ್ನು ಹೊಗಳಿಲ್ಲ. ಕೆಲವರು ಈ ಘಟನೆಗೆ ತಂದೆಯ ನಿರ್ಲಕ್ಷ್ಯವೇ ಕಾರಣ ಎಂದೂ ಬೊಟ್ಟು ಮಾಡಿದ್ದಾರೆ. ಪ್ರಯಾಣಿಕರಿಗೆ ಪಾದಚಾರಿ ಮಾರ್ಗವಿದ್ದರೂ ಇವರು ಮಗಳನ್ನು ಕರೆದುಕೊಂಡು ಒಂದು ಬದಿಯಿಂದ ಇನ್ನೊಂದು ಬದಿಗೆ ಹಳಿ ಮೇಲೆಯೇ ಬಂದಿದ್ದರು ಎಂದು ರೈಲು ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ.

Also Read : Money Trees : ಇಲ್ಲಿರುವ ಮರಗಳಲ್ಲಿ ಎಲೆಗಿಂತ ನಾಣ್ಯಗಳೇ ಹೆಚ್ಚಿವೆ...! ಆದರೆ, ಯಾರೂ ಕೊಂಡೊಯ್ಯುವಂತಿಲ್ಲ...!

ನಿಜ. ಪಾದಚಾರಿ ಮಾರ್ಗವನ್ನು ಬಳಸಿದ್ದರೆ ಮತ್ತು ಮೊದಲೇ ಎಚ್ಚರಿಕೆ ವಹಿಸಿದ್ದರೆ ಈ ಘಟನೆ ನಡೆಯುತ್ತಿರಲಿಲ್ಲ. ತಪ್ಪಾಗಿದೆ ನಿಜ. ಆದರೆ, ಮಗಳ ರಕ್ಷಣೆಗೆ ಈ ತಂದೆಯ ಸಾಹಸವನ್ನು ಮೆಚ್ಚಲೇಬೇಕು. ಜೊತೆಗೆ, ಈ ಘಟನೆ ಹಳಿ ದಾಟುವವರಿಗೆ ಎಚ್ಚರಿಕೆಯ ಗಂಟೆಯೂ ಆಗಿದೆ. ಯಾಕೆಂದರೆ, ಎಲ್ಲಾ ಸಂದರ್ಭದಲ್ಲಿ ಅದೃಷ್ಟ ಕೈ ಹಿಡಿಯುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಹೀಗಾಗಿ, ನಮ್ಮ ಎಚ್ಚರಿಕೆಯಲ್ಲಿ ನಾವು ಇದ್ದರೆ ಒಳಿತು.