ಮಹಿಳೆಯ ಕಾಲಿಗೆ ಸುತ್ತಿಕೊಂಡ ಹೆಬ್ಬಾವು! : ರಕ್ಷಣೆಗೆಂದು ಹೋದಾಕೆಯ ರಕ್ಷಣೆಗೆ ಪೊಲೀಸರೇ ಬರಬೇಕಾಯಿತು!

ಇದೊಂದು ಭಯಾನಕ ವಿಡಿಯೋ... ಆದರೆ, ಅದೃಷ್ಟ ಚೆನ್ನಾಗಿತ್ತು. ಹಾವು ಸೇರಿ ಯಾರಿಗೂ ತೊಂದರೆಯಾಗಿಲ್ಲ. ಸಕಾಲದಲ್ಲಿ ನಡೆದ ರಕ್ಷಣಾ ತಂಡದ ಕಾರ್ಯಾಚರಣೆಯನ್ನು ನಾವು ಮೆಚ್ಚಲೇಬೇಕು.

ಯಾವುದೇ ಹಾವು ಆಗಿರಲಿ, ಅದು ವಿಷಕಾರಿಯಾಗಿರಲಿ, ವಿಷವಿಲ್ಲದ ಹಾವೇ ಆಗಿರಲಿಲ್ಲ. ಹಾವನ್ನು ಕಂಡ ತಕ್ಷಣ ಬಹುತೇಕರು ಒಂದು ಕ್ಷಣ ದಿಗಿಲುಗೊಳ್ಳುವುದಂತೂ ಸತ್ಯ. ಆದರೆ, ಕೆಲವರಿಗೆ ಈ ಭಯ ಇಲ್ಲ. ಹೀಗಾಗಿ, ಕಷ್ಟದಲ್ಲಿದ್ದ ಹಾವುಗಳನ್ನು ರಕ್ಷಿಸುವ ಹೃದಯವಂತಿಕೆ ತೋರಿಸುತ್ತಾರೆ. ಇದರಲ್ಲಿ ಯಶಸ್ವಿ ಕೂಡಾ ಆಗುತ್ತಾರೆ. ಆದರೆ, ಕೆಲವೊಂದು ಸಲ ಪರಿಸ್ಥಿತಿ ಭಿನ್ನವಾಗುತ್ತದೆ. ರಕ್ಷಿಸಬೇಕೆಂದು ಬಂದಿದ್ದ ಹಾವಿನಿಂದಲೇ ಸಂಕಷ್ಟ ಎದುರಾಗುವುದೂ ಇದೆ. ಇದು ಕೂಡಾ ಅಂತಹದ್ದೇ ಒಂದು ಘಟನೆ. ಈ ದೃಶ್ಯವನ್ನು ನೋಡುವಾಗ ಹೃದಯ ಒಂದು ಕ್ಷಣ ಧಗ್ ಎನ್ನುತ್ತದೆ.

Also Read : ಕೊರೊನಾ ಸೋಂಕಿತರ ಖುಷಿಗೆ ವೈದ್ಯರ ಅದ್ಭುತ ಡಾನ್ಸ್‌ : ಡಾಕ್ಟರ್ ಪ್ರತಿಭೆಗೆ ನೆಟ್ಟಿಗರಿಂದ ಶಹಬ್ಬಾಸ್

ಇದು ನಡೆದಿರುವುದು ದಕ್ಷಿಣ ಕ್ವೀನ್ಸ್‌ ಲ್ಯಾಂಡ್‌ನ ವಾಯುವ್ಯ ಬ್ರಿಸ್ಬೇನ್‌ನ ಸ್ಯಾಮ್‌ಫೋರ್ಡ್ ವ್ಯಾಲಿಯಲ್ಲಿ. ಮಹಿಳೆಯೊಬ್ಬರು ಹೆಬ್ಬಾವನ್ನು ರಕ್ಷಿಸಲು ಹೋಗಿ ತಾವೇ ಸಂಕಷ್ಟಕ್ಕೆ ಸಿಲುಕಿದ ಕತೆ ಇದು. ಈ ಮಹಿಳೆ ತನ್ನ ಕಾರಿನೊಳಗೆ ಬೃಹತ್ ಗಾತ್ರದ ಹೆಬ್ಬಾವನ್ನು ಕಂಡಿದ್ದರು. ಹೀಗಾಗಿ, ಈ ಹಾವನ್ನು ರಕ್ಷಿಸಲು ಇವರು ಯತ್ನಿಸಿದ್ದರು. ಆದರೆ, ಪರಿಸ್ಥಿತಿ ಇವರಂದುಕೊಂಡಂತೆ ಇರಲಿಲ್ಲ. ಯಾಕೆಂದರೆ, ಆ ಬೃಹತ್ ಹೆಬ್ಬಾವು ಇವರ ಕಾಲನ್ನೇ ಸುಟ್ಟುವರಿದುಕೊಂಡಿತ್ತು...! ಎಷ್ಟು ಪ್ರಯತ್ನಿಸಿದರೂ ಹಾವಿನ ಹಿಡಿತವನ್ನು ಸಡಿಲಗೊಳಿಸಲು ಸಾಧ್ಯವಾಗಲೇ ಇಲ್ಲ. ಪರಿಣಾಮ, ಅನಿವಾರ್ಯವಾಗಿ ಇವರು ಕ್ವೀನ್ಸ್‌ಲ್ಯಾಂಡ್ ಪೊಲೀಸರಿಗೆ ಮಾಹಿತಿ ನೀಡಿದ್ದರು.

Also Read : ತಾಯಿಯನ್ನು ರಕ್ಷಿಸಲು ಶಸ್ತ್ರಸಜ್ಜಿತ ದರೋಡೆಕೋರರೊಂದಿಗೆ ಹೋರಾಡಿದ ಐದು ವರ್ಷದ ಪೋರ

ಸಂಕಷ್ಟದ ಬಗೆಗಿನ ಕರೆ ಸ್ವೀಕರಿಸಿದ ತಕ್ಷಣ ಇಬ್ಬರು ಪೊಲೀಸ್ ಅಧಿಕಾರಿಗಳು ಸ್ಥಳಕ್ಕೆ ಬಂದಿದ್ದರು. ಹೀಗೆ ಬಂದ ಪೊಲೀಸರು ಹಾವನ್ನು ರಕ್ಷಿಸುವ ಕಾರ್ಯಕ್ಕಿಳಿದಿದ್ದರು. ಹಾಗಂತ, ಈ ಕಾರ್ಯಾಚರಣೆ ಸುಲಭದ್ದಾಗಿರಲಿಲ್ಲ. ಈ ಹಾವಿನ ಉದ್ದವೇ 2-3 ಮೀಟರ್ ಇತ್ತು...! ಒಬ್ಬರು ಮಹಿಳಾ ಅಧಿಕಾರಿ ಮಹಿಳೆಯ ಕಾಲಿಗೆ ಸುತ್ತಿಕೊಂಡಿರುವ ಹಾವನ್ನು ಬಿಡಿಸುವ ಯತ್ನ ಮಾಡುತ್ತಿದ್ದರೆ, ಮತ್ತೊಬ್ಬರು ಆ ದೃಶ್ಯವನ್ನು ಸೆರೆ ಹಿಡಿಯುತ್ತಿದ್ದರು. ಸ್ವಲ್ಪ ಹೊತ್ತಿನ ಬಳಿಕ ಹೆಬ್ಬಾವಿನಿಂದ ಸಂಕಷ್ಟಕ್ಕೆ ಗುರಿಯಾಗಿದ್ದ ಮಹಿಳೆ ಹಾವಿನ ತಲೆಯನ್ನು ಹಿಡಿದುಕೊಂಡಿದ್ದರೆ, ಪೊಲೀಸ್ ಅಧಿಕಾರಿ ಹಾವಿನ ಬಾಲ ಹಿಡಿದು ಅದನ್ನು ಬಿಡಿಸುವ ಯತ್ನ ಮಾಡುತ್ತಿದ್ದರು.


Also Read : ಕಟ್ಟಡದಲ್ಲಿ ನೇತಾಡುತ್ತಿದ್ದ ಬಾಲಕನ ಜೀವ ಉಳಿಸಿದ ಬೀದಿ ವ್ಯಾಪಾರಿ : ವಿಡಿಯೋ ವೈರಲ್

ಹೀಗೆ ಒಂದಷ್ಟು ಹೊತ್ತಿನ ಪ್ರಯತ್ನದ ಬಳಿಕ ಹಾವಿನ ಹಿಡಿತವನ್ನು ಮಹಿಳೆಯ ಕಾಲಿನಿಂದ ಸಡಿಲಗೊಳಿಸುವಲ್ಲಿ ಪೊಲೀಸ್ ಅಧಿಕಾರಿ ಯಶಸ್ವಿಯಾಗಿದ್ದರು. ಬಳಿಕ ಆ ಮಹಿಳೆ ಹಾವನ್ನು ಹಿಡಿದು ಹುಲ್ಲುಗಳ ನಡುವೆ ಬಿಟ್ಟಿದ್ದರು. ಸದ್ಯ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಕೆಲವರು ಈ ದೃಶ್ಯವನ್ನು ಕಂಡು ಆಘಾತ ವ್ಯಕ್ತಪಡಿಸಿದರೆ, ಹಲವರು ಹಾವನ್ನು ರಕ್ಷಣೆ ಮಾಡುವ ಎಲ್ಲರ ಪ್ರಯತ್ನವನ್ನೂ ಕೊಂಡಾಡಿದ್ದಾರೆ.