ವರದಿಗಾರರ ಕಣ್ಣಿಗೆ ಬಡಿದು ಸಾಗಿದ ಹಕ್ಕಿ: ನೋವಲ್ಲೂ ವೃತ್ತಿಪರತೆ ಕಾಪಾಡಿಕೊಂಡ ಪತ್ರಕರ್ತರಿಗೆ ನೆಟ್ಟಿಗರ ಮೆಚ್ಚುಗೆ

ವರದಿಗಾರಿಕೆ ಎಂಬುದು ಬಹಳ ಸೂಕ್ಷ್ಮ ಜವಾಬ್ದಾರಿ. ಪತ್ರಕರ್ತರು ಕೆಲವೊಮ್ಮೆ ಕಠಿಣ ಪರಿಸ್ಥಿತಿಗಳನ್ನೂ ಎದುರಿಸಬೇಕಾಗುತ್ತಿದೆ. ಈ ಕಠಿಣ ಪರಿಸ್ಥಿತಿಯಲ್ಲೂ ವೃತ್ತಿಪರತೆಗೆ ಚ್ಯುತಿ ಬಾರದಂತೆ ನಡೆದುಕೊಳ್ಳಬೇಕಾದದ್ದು ಕೂಡಾ ಮುಖ್ಯವಾಗಿದೆ. ಯಾಕೆಂದರೆ, ಯಾವ ಸಂದರ್ಭದಲ್ಲಿ ಅನಿರೀಕ್ಷಿತ ಸವಾಲುಗಳು ಎದುರಾಗುತ್ತದೆ ಎಂದು ಹೇಳುವುದಕ್ಕೆ ಸಾಧ್ಯವಿಲ್ಲ.

ಇತ್ತೀಚೆಗೆ ನೇರ ಪ್ರಸಾರಕ್ಕೆ ಸಜ್ಜಾಗುತ್ತಿದ್ದ ಅರ್ಜೆಂಟೀನಾದ ಸುದ್ದಿವಾಹಿನಿಯ ವರದಿಗಾರರೊಬ್ಬರು ಕಳ್ಳನಿಂದ ಕೆಲ ಕಾಲ ಸಂಕಷ್ಟ ಅನುಭವಿಸಿದ್ದರು. ಯಾಕೆಂದರೆ, ನೇರಪ್ರಸಾರಕ್ಕೆ ಸಜ್ಜಾಗುತ್ತಿದ್ದ ಈ ಪತ್ರಕರ್ತನ ಕೈಯಲ್ಲಿದ್ದ ಮೊಬೈಲ್ ಫೋನನ್ನು ಕಸಿದು ಕಳ್ಳನೊಬ್ಬ ಅತೀ ವೇಗದಲ್ಲಿ ಪರಾರಿಯಾಗಿದ್ದ. ಈ ಸಂದರ್ಭದಲ್ಲಿ ಸಹಾಯಕ್ಕೆ ಬಂದ ಸ್ಥಳೀಯರು ಈತನನ್ನು ಬೆನ್ನಟ್ಟಿದ್ದರಿಂದ ಸ್ವಲ್ಪ ಹೊತ್ತಿನಲ್ಲಿಯೇ ಕಳ್ಳನಿಂದ ಮೊಬೈಲ್ ಫೋನ್ ಹಿಂದಕ್ಕೆ ಪಡೆಯುವುದಕ್ಕೆ ಸಾಧ್ಯವಾಗಿತ್ತು. ಈ ದೃಶ್ಯ ಸಾಕಷ್ಟು ವೈರಲ್ ಆಗಿತ್ತು. ಜೊತೆಗೆ, ನೆಟ್ಟಿಗರು ಸ್ಥಳೀಯರ ಕಾರ್ಯವನ್ನು ಕೊಂಡಾಡಿದ್ದರು.

Also Read : ವರದಿಗಾರ ನೇರಪ್ರಸಾರದಲ್ಲಿದ್ದಾಗಲೇ ಮೊಬೈಲ್ ಕಸಿದು ಕಳ್ಳ ಪರಾರಿ...!

ಇದೀಗ ಇದೇ ರೀತಿ ನೇರಪ್ರಸಾರಕ್ಕೆ ಸಜ್ಜಾಗುತ್ತಿದ್ದ ಪತ್ರಕರ್ತರೊಬ್ಬರು ಬೇರೊಂದು ಸವಾಲು ಎದುರಿಸಿದ್ದಾರೆ. ಈ ವಿಡಿಯೋಗಳು ಕೂಡಾ ಈಗ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಈ ಘಟನೆ ನಡೆದಿರುವುದು ಆಸ್ಟ್ರೇಲಿಯಾದಲ್ಲಿ. ಇಲ್ಲಿನ ಸುದ್ದಿವಾಹಿನಿಯ ವರದಿಗಾರರೊಬ್ಬರು ಸಂಜೆಯ ಬುಲೆಟಿನ್‌ಗಾಗಿ ನೇರ ಪ್ರಸಾರಕ್ಕೆ ಸಜ್ಜಾಗುತ್ತಿದ್ದರು. ಈ ವೇಳೆ, ಮ್ಯಾಗ್ಪಿ ಎಂಬ ಹಕ್ಕಿ ರಭಸವಾಗಿ ಬಂದು ಈ ವರದಿಗಾರರ ಕಣ್ಣಿನ ಭಾಗಕ್ಕೆ ಬಡಿದು ಹೋಗಿದೆ.


Also Read : ವರದಿಗಾರಿಕೆ ವೇಳೆ ಆನ್ ಆದ ಫೇಸ್ ಫಿಲ್ಟರ್! : ಈ ವಿಡಿಯೋ ನೋಡಿ ನಗೋದು ಪಕ್ಕಾ

ಮೆಲ್ಬೋರ್ನ್‌ನ ಹಿರಿಯ ಪ್ರತಿನಿಧಿ ಬ್ರೆಟ್ ಮೆಕ್ಲಿಯೋಡ್ ಈ ಪರಿಸ್ಥಿತಿ ಎದುರಿಸಿದ್ದವರು. ಪಾರ್ಟಿಮೆಂಟ್ ಹೌಸ್‌ನ ಹೊರ ಭಾಗದಲ್ಲಿ ಇವರು ನೇರ ಪ್ರಸಾರಕ್ಕೆ ಸಿದ್ಧರಾಗುತ್ತಿದ್ದ ವೇಳೆ ಈ ಘಟನೆ ನಡೆದಿದೆ. ರಭಸವಾಗಿ ಮುಖಕ್ಕೆ ಬಡಿದಿದ್ದರಿಂದ ಬ್ರೆಟ್ ನೋವಿನಲ್ಲಿ ಕಣ್ಣುಜ್ಜಿಕೊಳ್ಳುವುದನ್ನು ಕೂಡಾ ಈ ಕ್ಲಿಪ್‌ನಲ್ಲಿ ಕಾಣಬಹುದು. ಆದರೆ, ಇಂತಹ ಪರಿಸ್ಥಿತಿಯನ್ನು ಎದುರಿಸಿದರೂ ಬ್ರೆಟ್ ತಕ್ಷಣ ಸುಧಾರಿಸಿಕೊಂಡು ತಮ್ಮ ನೇರ ಪ್ರಸಾರವನ್ನು ಮುಂದುವರಿಸಿದ್ದಾರೆ. ಇವರ ಈ ವೃತ್ತಿಪರತೆ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.


Also Read : `ನಾಳೆಯಿಂದ ನಾನು ಕೆಲಸಕ್ಕೆ ಬರುವುದಿಲ್ಲ ' : ನೇರಪ್ರಸಾರದಲ್ಲೇ ಹೇಳಿದ ಟಿವಿ ಪತ್ರಕರ್ತೆ...! : ಕಾರಣ ಸಖತ್ ಇಂಟ್ರೆಸ್ಟಿಂಗ್

ಗೂಡು ಕಟ್ಟಿದ ಸಂದರ್ಭದಲ್ಲಿ ಮ್ಯಾಗ್ಪಿ ಹಕ್ಕಿಗಳು ಜನರ ಮೇಲೆ ಹೀಗೆ ದಾಳಿ ಮಾಡುತ್ತವೆ. ಹೀಗಾಗಿ, ಈ ಅವಧಿಯಲ್ಲಿ ಹಕ್ಕಿಗಳಿಂದ ರಕ್ಷಿಸಿಕೊಳ್ಳಲು ಉದ್ಯಾನವನ ಅಥವಾ ಇನ್ಯಾವುದೇ ಜಾಗಗಳಿಗೆ ಹೋಗುವಾಗ ಕೊಡೆಗಳನ್ನು ಬಳಸಿಕೊಳ್ಳುತ್ತಾರೆ.