Shocking Video : ಯುವತಿ ಆನ್‌ಲೈನ್ ಝೂಮ್ ತರಗತಿಯಲ್ಲಿದ್ದಾಗ ಮನೆಗೆ ನುಗ್ಗಿದ್ದರು ದರೋಡೆಕೋರರು!

ಆನ್‌ಲೈನ್ ಮೀಟಿಂಗ್ ವೇಳೆ ಒಂದಷ್ಟು ಅವಾಂತರಗಳು, ಯಡವಟ್ಟುಗಳು, ಮುಜುಗರಕ್ಕೀಡಾಗುವ ಘಟನೆಗಳು ನಡೆಯುವುದು ಹೊಸದಲ್ಲ. ಇತ್ತೀಚೆಗಂತು ಈ ರೀತಿಯ ಅದೆಷ್ಟೋ ವಿಡಿಯೋಗಳು ವೈರಲ್ ಆಗಿವೆ. ಆದರೆ, ಈಗ ಇನ್ನಷ್ಟು ಆಘಾತಕಾರಿ ದೃಶ್ಯವೊಂದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಅದೇನೆಂದರೆ, ಯುವತಿಯೊಬ್ಬರು ಆನ್‌ಲೈನ್ ತರಗತಿಗೆ ಹಾಜರಾಗಿದ್ದ ಸಂದರ್ಭದಲ್ಲಿ ದರೋಡೆಕೋರರು ಮನೆಗೆ ನುಗ್ಗಿದ್ದಾರೆ. ವಿದ್ಯಾರ್ಥಿಗಳೆಲ್ಲಾ ಝೂಮ್ ತರಗತಿಯಲ್ಲಿ ನೇರಪ್ರಸಾರದಲ್ಲಿ ಇದ್ದಾಗಲೇ ಈ ಘಟನೆ ನಡೆದಿದೆ...!

ಇದು ನಡೆದಿರುವುದು ಈಕ್ವೆಡಾರ್‌ನ ಅಂಬಾಡೋದಲ್ಲಿ. ಸೆಪ್ಟೆಂಬರ್ 4ರಂದು ಮಧ್ಯ ಈಕ್ವೆಡಾರ್‌ನ ತುಂಗುರಾಹುವಾ ಪ್ರಾಂತ್ಯದ ಅಂಬಾಟೊದ ಮನೆಯಲ್ಲಿ ಈ ವಿದ್ಯಾರ್ಥಿನಿ ಆನ್‌ಲೈನ್ ಇಂಗ್ಲೀಷ್ ತರಗತಿಗೆ ಹಾಜರಾಗಿದ್ದರು. ಇವರಂತೆ ಹಲವು ವಿದ್ಯಾರ್ಥಿಗಳು ಶಿಕ್ಷಕರು ಹೇಳಿಕೊಡುವುದರನ್ನು ನೇರಪ್ರಸಾರದಲ್ಲೇ ಕೇಳುತ್ತಿದ್ದರು. ಎಲ್ಲವೂ ಸರಿಯಾಗಿಯೇ ಸಾಗುತ್ತಿತ್ತು. ಆದರೆ, ತರಗತಿಯ ನಡುವೆ ಒಬ್ಬರು ವಿದ್ಯಾರ್ಥಿನಿಯ ಮನೆಗೆ ಕಳ್ಳರು ನುಗ್ಗಿದ್ದರು. ಹೀಗಾಗಿ, ಕೇಳಿದ ಶಬ್ದಕ್ಕೆ ತಿರುಗಿದ ವಿದ್ಯಾರ್ಥಿನಿಗೆ ಕಂಡದ್ದು ಆಗಂತುಕರು. ಪರಿಣಾಮ, ಈಕೆ ಕೂಡಾ ಭಯದಿಂದ ನಡುಗಿದ್ದರು. ಈ ನಡುವೆ, ಕಿರುಚಾಡುತ್ತಿದ್ದ ಚೋರರು ಆಕೆಯ ಬಳಿ ಇದ್ದ ಎಲ್ಲಾ ವಸ್ತುಗಳನ್ನು ಕೊಡುವಂತೆ ಬೆದರಿಸುತ್ತಿದ್ದರು. ಜೊತೆಗೆ, ವಿದ್ಯಾರ್ಥಿನಿಯ ಲ್ಯಾಪ್‌ಟಾಪ್ ಮುಚ್ಚಿ ತಮ್ಮ ಪಾಪಕೃತ್ಯ ಮುಂದುವರಿಸಿದ್ದರು.

Also Read : ಕಿನಾರೆಯತ್ತ ಕೊಚ್ಚಿ ಬಂದ ವಿಲಕ್ಷಣ ಸಮುದ್ರ ಜೀವಿಗಳು...!

ಇದರಿಂದ ಆನ್‌ಲೈನ್ ತರಗತಿಯಲ್ಲಿದ್ದ ಇತರ ವಿದ್ಯಾರ್ಥಿಗಳು ಆಘಾತಕ್ಕೊಳಗಾಗಿದ್ದರು. ಜೊತೆಗೆ, ಈ ವಿದ್ಯಮಾನವನ್ನು ಆ ಕ್ಷಣಕ್ಕೆ ಗಮನಿಸದೇ ಇದ್ದ ಶಿಕ್ಷಕರಿಗೆ ಮಾಹಿತಿ ನೀಡಿದ್ದರು. ಇದಾದ ಬಳಿಕ ಎಲ್ಲರೂ ಈ ವಿದ್ಯಾರ್ಥಿನಿಯರನ್ನು ಹೇಗೆ ರಕ್ಷಿಸುವುದು, ಯಾರಿಗೆ ತಿಳಿಸುವುದು ಎಂಬ ಕುರಿತು ಚರ್ಚಿಸಿದರು. ಒಂದಷ್ಟು ದೂರವಾಣಿ ಸಂಖ್ಯೆಗಳನ್ನೂ ವಿನಿಮಯ ಮಾಡಿಕೊಂಡಿದ್ದರು. ಜೊತೆಗೆ, ಪೊಲೀಸರಿಗೂ ಮಾಹಿತಿ ನೀಡಿದ್ದರು. ಈ ನಡುವೆ, ಬಂದ ಕೆಲಸ ಮುಗಿಸಿ ಕಳ್ಳರು ಕಾರಿನಲ್ಲಿ ಓಡಿದ್ದರು. ಇತ್ತ, ವಿದ್ಯಾರ್ಥಿಗಳಿಂದ ಮಾಹಿತಿ ಪಡೆದ ಪೊಲೀಸರು ತಕ್ಷಣ ಕಾರ್ಯಾಚರಣೆಗೆ ಇಳಿದು ಕಳ್ಳರ ಹೆಡೆಮುರಿ ಕಟ್ಟಿದ್ದಾರೆ.

Also Read : Shocking News : ನೊಣವನ್ನು ಓಡಿಸಲು ಹೋಗಿ ಮನೆಯನ್ನೇ ಸುಟ್ಟ ವೃದ್ಧ...!

Also Read : ತಂದೆಗೆ ಸ್ಕೇಟಿಂಗ್ ಕಲಿಸುವ ಪುಟ್ಟ ಮಗಳು : ಮುದ್ದಾದ ವಿಡಿಯೋಗೆ ನೀವೆಷ್ಟು ಮಾರ್ಕ್ಸ್‌ ಕೊಡ್ತೀರಿ...?

ಈ ದರೋಡೆಕೋರರು 4,000 ಅಮೇರಿಕನ್ ಡಾಲರ್ ಅಂದರೆ ಭಾರತದ ಸುಮಾರು 2.9 ಲಕ್ಷ ರೂಪಾಯಿ ನಗದು, ಎರಡು ಬಂದೂಕುಗಳು, ಎರಡು ಮೊಬೈಲ್ ಫೋನ್, ಒಂದು ಲ್ಯಾಪ್‌ಟಾಪ್ ಮತ್ತು ಒಂದು ವಿಡಿಯೋ ಗೇಮ್ ಕನ್ಸೋಲ್ ಅನ್ನು ಕದ್ದಿದ್ದರು. ಇವೆಲ್ಲವನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಬಂಧಿತ ಆರೋಪಿಗಳನ್ನು ಲೂಯಿಸ್ ಸಿ, ವ್ಯಾಲೆಂಟಿನ್ ಪಿ, ಕಾರ್ಲೋಸ್ ಎ ಮತ್ತು ಡೋರಿಯನ್ ಆರ್ ಎಂದು ಗುರುತಿಸಲಾಗಿದೆ. ಸದ್ಯ ಈ ದರೋಡೆ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಅಲ್ಲದೆ, ಈ ದೃಶ್ಯ ಕಂಡು ಎಲ್ಲರೂ ಒಂದು ಕ್ಷಣ ಹೌಹಾರಿದ್ದಾರೆ.