`ಶಾಲೆ ಮತ್ತೆ ಶುರುವಾಗುವುದು ಬೇಡ' : ಮುಗ್ಧ ಪುಟಾಣಿ ಅಳುವ ಮುದ್ದಾದ ವಿಡಿಯೋ ವೈರಲ್

ಕೊರೊನಾ ವೈರಸ್ ಅಬ್ಬರ ಶುರುವಾದ ಬಳಿಕ ಬಹುತೇಕರು ಮನೆಯೊಳಗೇ ಇದ್ದಾರೆ. ಒಂದಷ್ಟು ಕಚೇರಿಗಳು ಈಗಷ್ಟೇ ಆರಂಭವಾಗಿದೆ. ಆದರೆ, ಬಹುತೇಕ ಉದ್ಯೋಗಿಗಳು ಮನೆಯಿಂದಲೇ ತಮ್ಮ ಕೆಲಸ ಮಾಡುತ್ತಿದ್ದಾರೆ. ಶಾಲಾ, ಕಾಲೇಜುಗಳು ಕೂಡಾ ಇನ್ನೂ ತೆರೆದಿಲ್ಲ. ವಿದ್ಯಾರ್ಥಿಗಳಿಗೆ ಆನ್‌ಲೈನ್ ಕ್ಲಾಸ್ ಮಾಡಲಾಗುತ್ತಿದೆ. ಮಕ್ಕಳು ಕೂಡಾ ಇದಕ್ಕೆ ಈಗ ಒಗ್ಗಿಕೊಳ್ಳುತ್ತಿದ್ದಾರೆ. ಅಲ್ಲದೆ, ಕೆಲ ಮಕ್ಕಳಿಗೆ ಎಲ್ಲಿ ಶಾಲೆ ಆರಂಭವಾಗುತ್ತದೋ ಎಂಬ ಭಯವೂ ಶುರುವಾಗಿದೆ. ಇದು ಸಹಜ ಕೂಡಾ. ಶಾಲೆಗೆ ಹೋಗುವುದೆಂದರೆ ಬಹುತೇಕ ಚಿಣ್ಣರಿಗೆ ಒಂದು ರೀತಿಯ ಕಿರಿಕಿರಿ. ಮನೆಯಲ್ಲಿದ್ದರೆ ಆಟ ಆಡಿಕೊಂಡು ಖುಷಿಯಾಗಿ ಇರಬಹುದೆಂದು ಮನಸ್ಸು ಹಾತೊರೆಯುವ ಸಮಯವದು. ಹೀಗಾಗಿ, ಈಗ ಮನೆಯಲ್ಲಿರುವ ಚಿಣ್ಣರು ಖುಷಿಯಿಂದ ಇದ್ದಾರೆ. `ಶಾಲೆ ಶುರುವಾಗುತ್ತದೆ' ಎಂದು ಸುಳ್ಳು ಹೇಳಿದರೂ ಮಕ್ಕಳ ಕಣ್ಣಲ್ಲಿ ನೀರು ಬರುವಂತಹ ಪರಿಸ್ಥಿತಿ ಈಗ ಇದೆ...! ಇದಕ್ಕೆ ಸಾಕ್ಷಿ ಸದ್ಯ ವೈರಲ್ ಆಗುತ್ತಿರುವ ಕ್ಯೂಟ್ ವಿಡಿಯೋ.

Also Read : ಕಲರ್ ಕಲರ್ ಚಿಲ್ಲಿ...! : ಅಚ್ಚರಿ ಮೂಡಿಸುತ್ತವೆ ಈ ಬಣ್ಣದ ಮೆಣಸಿನಕಾಯಿ...!

ಇದು ಶಾಲೆ ಮತ್ತೆ ಶುರುವಾಗುತ್ತದೆ ಎಂಬ ಭಯದಲ್ಲಿ ಮುದ್ದಾದ ಮುಗ್ಧ ಬಾಲಕ ಕಣ್ಣೀರಿಡುವ ವಿಡಿಯೋ. ಮಾಜಿ ಹಣಕಾಸು ಕಾರ್ಯದರ್ಶಿ ಅರವಿಂದ್ ಮಾಯರಾವ್ ಅವರು ತಮ್ಮ ಟ್ವಿಟ್ಟರ್‌ನಲ್ಲಿ ಈ ಕ್ಯೂಟ್ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. `ಪ್ರಾರ್ಥನೆ ಮಾಡಲು ನಿನ್ನ ಕೈಗಳನ್ನು ಮೇಲಕ್ಕೆತ್ತು' ಎಂದು ಮಹಿಳೆಯೊಬ್ಬರು ಪುಟಾಣಿ ಬಾಲಕನಿಗೆ ಹೇಳುವ ಮೂಲಕ ಈ ವಿಡಿಯೋ ಶುರುವಾಗುತ್ತದೆ. ಬಹುಶಃ ಅವರು ಮಗುವಿನ ತಾಯಿಯಾಗಿರಬಹುದು. ಆ ಮಹಿಳೆ ಹೇಳಿದಂತೆ ಬಾಲಕ ಪ್ರಾರ್ಥಿಸುವ ಸಲುವಾಗಿ ತನ್ನೆರಡು ಕೈಗಳನ್ನು ಜೋಡಿಸಿ ಕುಳಿತುಕೊಳ್ಳುತ್ತಾನೆ. ಬಳಿಕ ತಾನು ಹೇಳುವ ವಾಕ್ಯಗಳನ್ನು ಪುನರಾವರ್ತಿಸುವಂತೆ ಹೇಳುವ ಮಹಿಳೆ, `ಏ ಅಲ್ಲಾ 15ನೇ ತಾರೀಕಿಗೆ ಶಾಲೆಗಳು ಮತ್ತೆ ತೆರೆಯಬೇಕೆಂದು ನಾನು ಪ್ರಾರ್ಥಿಸುತ್ತೇನೆ' ಎಂದು ಹೇಳುತ್ತಾರೆ. ಆಕೆ ಹೇಳಿದಂತೆ ಬಾಲಕನೂ ಹೇಳುತ್ತಾ ಹೋಗುತ್ತಾನೆ. ಆದರೆ, `ಶಾಲೆ ಮತ್ತೆ ಶುರುವಾಗಬೇಕೆಂದು ನಾನು ಪ್ರಾರ್ಥಿಸುತ್ತೇನೆ' ಎಂಬ ವಾಕ್ಯ ಹೇಳಬೇಕೆನ್ನುವಷ್ಟರಲ್ಲಿ ಆ ಪುಟಾಣಿಗೆ ಉಮ್ಮಳಿಸಿ ಬಂದ ದುಃಖವನ್ನು ತಡೆದುಕೊಳ್ಳಲು ಆಗಿರಲಿಲ್ಲ. ಹೀಗಾಗಿ, ಜೋರಾಗಿ ಅತ್ತೇ ಬಿಟ್ಟಿದ್ದ...! `ಬೇಡ... ಶಾಲೆ ಶುರುವಾಗುವುದು ಬೇಡ...' ಎಂದು ಆ ಕಂದಮ್ಮ ಅಳುತ್ತಿದ್ದರೆ ಒಂದು ಕ್ಷಣ ಮನಸ್ಸು ಕರಗಿಸುವಂತಿದೆ.

Also Read : ಸಾವಿರಕ್ಕೂ ಅಧಿಕ ಪ್ರಾಣಿಗಳನ್ನು ರಕ್ಷಿಸಿರುವ ಧೀರೆ : ಇದು ಸಾಧಕಿಯೊಬ್ಬರ ಕತೆ

ಇಲ್ಲಿದೆ ವೈರಲ್ ವಿಡಿಯೋ :

Also Read : ವ್ಹಾವ್... ಬಾತುಕೋಳಿ ಮರಿ ಮತ್ತು ಶ್ವಾನದ ಸ್ನೇಹ : ಮನಸೆಳೆಯದೇ ಇರದು ಈ ಬಾಂಧವ್ಯ

ಸದ್ಯ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಭರ್ಜರಿಯಾಗಿಯೇ ವೈರಲ್ ಆಗುತ್ತಿದೆ. ಈ ಕ್ಯೂಟ್ ವಿಡಿಯೋ ಹಲವರ ಮುಖದಲ್ಲಿ ಮಂದಹಾಸ ಮೂಡಿಸಿದೆ. ಅಲ್ಲದೆ, ಕೆಲವರು ತಮ್ಮ ಬಾಲ್ಯದ ದಿನಗಳನ್ನೂ ನೆನಪಿಸಿಕೊಂಡಿದ್ದಾರೆ.