60 ವರ್ಷದ ದಾಂಪತ್ಯ, ಕೋವಿಡ್-19 ನಿಂದ 7 ತಿಂಗಳು ದೂರ ದೂರ... ದಂಪತಿ ಜೊತೆಯಾಗುವ ದೃಶ್ಯವೇ ಭಾವನಾತ್ಮಕ

ಏಳು ತಿಂಗಳ ಬಳಿಕ ಪ್ರೀತಿಯ ಆಲಿಂಗನ... ಈ ಖುಷಿ ಕಣ್ಣೀರ ರೂಪದಲ್ಲಿ ಪ್ರಕಟವಾಗಿತ್ತು... ಮನಸ್ಸು ಜಗತ್ತನ್ನೇ ಗೆದ್ದ ಸಡಗರದಿಂದ ಕುಣಿಯುತ್ತಿತ್ತು... ದಂಪತಿಗೆ ಈ ಸರ್ಪ್ರೈಸ್ ನೀಡಿ ಅಲ್ಲಿದ್ದವರು ಖುಷಿಪಟ್ಟಿದ್ದರು.

ಜಗತ್ತು ಈಗ ಕಷ್ಟದಲ್ಲಿದೆ. ಕೊರೊನಾ ಲೋಕ ಕಂಟಕವಾಗಿ ಮೆರೆದಾಡುತ್ತಿದೆ. ಅದರಲ್ಲೂ ವೃದ್ಧರು ಈ ಮಹಾಮಾರಿಯಿಂದ ನಲುಗಿ ಹೋಗಿದ್ದಾರೆ. ಎಲ್ಲಾ ಕಡೆ ಕಠಿಣ ಪರಿಸ್ಥಿತಿ ಇದೆ. ವಯೋವೃದ್ಧರನ್ನು ಈ ರಕ್ಕಸ ವೈರಾಣು ಇನ್ನಷ್ಟು ಕಾಡುತ್ತಿದೆ. ಹೀಗಾಗಿ, ಎಲ್ಲೆಡೆ ವೃದ್ಧರ ಬಗ್ಗೆ ಜಾಸ್ತಿ ಆಸ್ಥೆ ವಹಿಸಲಾಗುತ್ತಿದೆ. ಇವರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಇನ್ನೂ ಹೆಚ್ಚಿನ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಪರಿಣಾಮ ಹಲವು ತಿಂಗಳು ಕಾಲ ಈ ವೃದ್ಧರು ಅನಿವಾರ್ಯವಾಗಿ ತಮ್ಮ ಪ್ರೀತಿಪಾತ್ರರನ್ನು ಬಿಟ್ಟು ಪ್ರತ್ಯೇಕವಾಗಿ ವಾಸವಿರಬೇಕಾದ ಪರಿಸ್ಥಿತಿಯೂ ಇದೆ.

ಹೀಗೆ ಬಹುಕಾಲದಿಂದ ಜೊತೆಗಿದ್ದು ದಿಢೀರ್ ಪ್ರತ್ಯೇಕವಾಸದಂತಹ ಪರಿಸ್ಥಿತಿ ಎದುರಾದಾಗ ವೃದ್ಧರು ಇನ್ನಷ್ಟು ಕುಗ್ಗಿ ಹೋಗಿದ್ದರು. ಮಾನಸಿಕವಾಗಿಯೂ ಜರ್ಜರಿತರಾಗಿದ್ದರು. ಇದರ ನಡುವೆ, ಆಸ್ಪತ್ರೆಯ ಹಾಸಿಗೆಯಲ್ಲಿ ಪರಸ್ಪರ ಕೈ ಹಿಡಿದು ಅಂತಿಮ ವಿದಾಯ ಹೇಳಿದ್ದ ಹಲವು ದಂಪತಿಯ ಫೋಟೋ, ವಿಡಿಯೋಗಳೂ ವೈರಲ್ ಆಗಿದ್ದವು. ಈ ಎಲ್ಲಾ ದೃಶ್ಯಗಳು ಎಲ್ಲರ ಕಣ್ಣಾಲಿಗಳಲ್ಲೂ ನೀರು ತರಿಸಿತ್ತು. ಆದರೆ, ಈ ನೋವಿನ ನಡುವೆಯೂ ಕೆಲವೊಮ್ಮೆ ಒಂದಷ್ಟು ಹೃದಯಸ್ಪರ್ಶಿ ಘಟನೆಗಳು ನಡೆದಿದ್ದವು. ಇದು ಕೂಡಾ ಅಂತಹದ್ದೇ ಒಂದು ಹೃದಯಸ್ಪರ್ಶಿ ದೃಶ್ಯ...

Also Read : Robot Dog : ಪ್ರಯಾಣಿಕರ ಬಂಡಿಯನ್ನು ಎಳೆಯುತ್ತದೆ ಈ ರೋಬೋಟ್ ಶ್ವಾನ...!

ಫ್ಲೋರಿಡಾದಲ್ಲಿ ಸೆರೆಯಾದ ಅಪೂರ್ವ ದೃಶ್ಯವಿದು. ಸದ್ಯ ಸುಮಾರು 80ರ ಅಸುಪಾಸಿನಲ್ಲಿರುವ ವೃದ್ಧ ದಂಪತಿ ಇವರು. ಬರೋಬ್ಬರಿ 60 ವರ್ಷಗಳ ಸುಖದಾಂಪತ್ಯ ಇವರದ್ದು... ಇಷ್ಟು ವರ್ಷದಲ್ಲಿ ಒಬ್ಬರನ್ನೊಬ್ಬರು ಬಿಟ್ಟಿರಲಾರದಷ್ಟು ಇವರ ಬಾಂಧವ್ಯ ಗಟ್ಟಿಯಾಗಿತ್ತು. ಆದರೆ, ರಕ್ಕಸ ಕೊರೊನಾ ವೈರಸ್ ಈ ಪ್ರೀತಿಯ ದಂಪತಿಯನ್ನು ಬೇರ್ಪಡಿಸಿತ್ತು. ಯಾಕೆಂದರೆ, ಫ್ಲೋರಿಡಾದಲ್ಲಿ ಕೊರೊನಾ ವೈರಸ್ ಶರವೇಗದಲ್ಲಿ ಹರಡುತ್ತಿದ್ದ ಕಾರಣದಿಂದ ಸುರಕ್ಷತೆಯ ದೃಷ್ಟಿಯಿಂದ ಈ ದಂಪತಿ ಪ್ರತ್ಯೇಕವಾಗಿ ಇರಬೇಕಾಗಿತ್ತು. ಮಾರ್ಚ್‌ನಲ್ಲಿ ಜೋಸೆಫ್ ಶಸ್ತ್ರಚಿಕಿತ್ಸೆಗೆಂದು ಆಸ್ಪತ್ರೆಗೆ ದಾಖಲಾಗಿದ್ದರು. ಆದರೆ, ಹಲವು ದಿನಗಳ ಚಿಕಿತ್ಸೆ ಬಳಿಕ ಪೂರ್ಣ ಪ್ರಮಾಣದಲ್ಲಿ ಚೇತರಿಕೆಗೆ ಸಮಯ ಬೇಕಾಗಿದ್ದರಿಂದ ಇವರು ಆಸ್ಪತ್ರೆಯಲ್ಲಿಯೇ ಇರಬೇಕಾಗಿತ್ತು. ಆದರೆ, ಸುರಕ್ಷತೆಯ ದೃಷ್ಟಿಯಿಂದ ಜೋಸೆಫ್ ಅವರನ್ನು ಭೇಟಿಯಾಗಲು ಪತ್ನಿ ಈವ್‌ಗೆ ಅವಕಾಶ ಇರಲಿಲ್ಲ.

Also Read : ಕಂದನನ್ನು ಬಿಗಿದಪ್ಪಿ ಮುದ್ದಿಸುವ ಶ್ವಾನ : ಈ ಪ್ರೀತಿ, ವಿಶ್ವಾಸವೇ ಸುಂದರ...

ಜೋಸೆಫ್ ಅವರು ಆಸ್ಪತ್ರೆಯಲ್ಲಿದ್ದ ಸುಮಾರು ಏಳು ತಿಂಗಳ ಕಾಲ ಈವ್ ದೂರವಾಣಿಯಲ್ಲಿ ಮಾತನಾಡಿ, ಕಿಟಕಿಯಲ್ಲಿ ನೋಡುತ್ತಾ ಪತಿಗೆ ಸಂತೈಸುತ್ತಿದ್ದರು. ಆದರೆ, ಇದೀಗ ಈ ದಂಪತಿಯ ಕಷ್ಟದ ಕಾಲ ದೂರವಾಗಿದೆ. ಇತ್ತೀಚೆಗೆ ಇವರಿಬ್ಬರಿಗೆ ಪರಸ್ಪರ ಭೇಟಿ ನೀಡುವ ಅವಕಾಶ ನೀಡಲಾಗಿತ್ತು. ಈ ಪುನರ್ಮಿಲನದ ದೃಶ್ಯವೇ ಭಾವನಾತ್ಮಕವಾಗಿದೆ. ಈ ಅಪೂರ್ವ ವಿಡಿಯೋವನ್ನು ಈಗ ಫೇಸ್‌ಬುಕ್‌ನಲ್ಲಿ ಹಂಚಿಕೊಳ್ಳಲಾಗಿದೆ. ಈ ಭೇಟಿಯ ವಿಷಯ ಇಬ್ಬರಿಗೂ ಗೊತ್ತಿರಲಿಲ್ಲ. ಹೀಗಾಗಿ, ಪರಸ್ಪರ ಕಂಡೊಡನೆ ಇಬ್ಬರೂ ಆಶ್ಚರ್ಯಚಕಿತರಾಗಿದ್ದರು. ಖುಷಿ ಕಣ್ಣೀರ ರೂಪ ಪಡೆದಿತ್ತು. ಇಬ್ಬರು ಪರಸ್ಪರ ತಬ್ಬಿಕೊಂಡು ಹಣೆಗೆ ಮುತ್ತಿಕ್ಕಿದರು. ಈ ದೃಶ್ಯವೇ ಮನಮೋಹಕ. ಈ ಪ್ರೀತಿಯೇ ಸುಂದರ...


Also Read : 82 ವರ್ಷದ ಸ್ನೇಹಿತೆ ಮೇಲೆರಗಿದ್ದ ವ್ಯಕ್ತಿಯನ್ನು ಹೊಡೆದು ನೆಲಕ್ಕುರುಳಿಸಿದ 67 ವರ್ಷದ ಧೈರ್ಯವಂತೆ

ಫೇಸ್‌ಬುಕ್‌ನಲ್ಲಿ ಈ ಅದ್ಭುತ ವಿಡಿಯೋವನ್ನು ಕಂಡ ಎಲ್ಲರೂ ಒಂದು ಕ್ಷಣ ಭಾವುಕರಾಗಿದ್ದಾರೆ. ಜೊತೆಗೆ, ಮಾದರಿ ದಾಂಪತ್ಯಕ್ಕೂ ಈ ಜೋಡಿ ಉದಾಹರಣೆಯಾಗಿದ್ದಾರೆ.