ನಿರಂತರ 11 ದಿನಗಳಲ್ಲಿ ಅತೀ ಹೆಚ್ಚು ದೂರ ಸಂಚರಿಸಿ ದಾಖಲೆ ಬರೆದ ಹಕ್ಕಿ!

ಇದು ಬರೋಬ್ಬರಿ 11 ದಿನಗಳ ಪಯಣ. ನಿರಂತರ ಪ್ರಯಾಣದ ಮೂಲಕ ಈ ಹಕ್ಕಿ ಬಹುದೂರ ಕ್ರಮಿಸಿದೆ. ಈ ಹಕ್ಕಿ ಕ್ರಮಿಸಿದ ದೂರದಿಂದಲೇ ಇದು ಈಗ ಹೊಸ ದಾಖಲೆ ಸೃಷ್ಟಿಸಿದೆ. ಅಗೋಡ್ವಿಟ್ ಈ ದಾಖಲೆ ಬರೆದ ಹಕ್ಕಿ. ಇದು 11 ದಿನಗಳಲ್ಲಿ 12,200 ಕಿಲೋಮೀಟರ್ ದೂರ ತಡೆರಹಿತ ಹಾರಾಟದ ಮೂಲಕ ದಾಖಲೆ ನಿರ್ಮಿಸಿದೆ.

ಈ ಹಕ್ಕಿಯ ಕೆಳ ಬೆನ್ನಿನ ಭಾಗದಲ್ಲಿ ವಿಜ್ಞಾನಿಗಳು 5ಗ್ರಾಂನ ಸ್ಯಾಟಲೈಟ್ ಟ್ಯಾಗ್ ಅಳವಡಿಸಿದ್ದರು. ಈ ಟ್ಯಾಗ್‌ನ ಸಹಾಯದಿಂದ ಈ ಹಕ್ಕಿ ಕ್ರಮಿಸಿದ ದೂರದ ಒಟ್ಟು ಲೆಕ್ಕ ಸಿಕ್ಕಿದೆ. ಈ ಅಗೋಡ್ವಿಟ್ ಸೆಪ್ಟೆಂಬರ್ 16ರಂದು ಅಮೇರಿಕಾದ ನೈರುತ್ಯ ಅಲಾಸ್ಕಾದಿಂದ ತನ್ನ ಪ್ರಯಾಣ ಆರಂಭಿಸಿತ್ತು. ಇಲ್ಲಿಂದ 11 ದಿನಗಳಷ್ಟು ಕಾಲ ಸಂಚರಿಸಿದ ಈ ಹಕ್ಕಿ ನ್ಯೂಜಿಲೆಂಡ್‌ನ ಆಕ್ಲೆಂಡ್‌ಗೆ ಬಂದಿತ್ತು ಎಂದು ಪ್ರಮುಖ ಆಂಗ್ಲ ಮಾಧ್ಯಮವೊಂದು ವರದಿ ಮಾಡಿದೆ. ಆಹಾರ, ನೀರು ಇಲ್ಲದೆ ಈ ಹಕ್ಕಿ ಈ ಗುರಿ ಮುಟ್ಟಿದೆ ಎಂಬುದು ಇನ್ನೊಂದು ವಿಶೇಷ.

Also Read : ಈ 100 ವರ್ಷದಲ್ಲಿ ನಾವು ಕಳೆದುಕೊಂಡ ಪ್ರಾಣಿಗಳೆಷ್ಟು ಗೊತ್ತಾ? : ಬೇಸರದ ದೃಶ್ಯವಿದು

4ಬಿಬಿಆರ್‌ಡಬ್ಲ್ಯೂ ಈ ಸಾಧನೆ ಮಾಡಿದ ಗಂಡು ಹಕ್ಕಿ. ಈ ಹಕ್ಕಿಗಳು ಸಾಮಾನ್ಯವಾಗಿ ಗಂಟೆಗೆ ಸರಾಸರಿ 55 ಮೈಲಿ ವೇಗದಲ್ಲಿ ಹಾರುತ್ತವೆ. ಅಲ್ಯೂಟಿಯನ್ ದ್ವೀಪಗಳ ಮೇಲೆ ದಕ್ಷಿಣಕ್ಕೆ ಸಾಗಿ ಸೆಪ್ಟೆಂಬರ್ 27ರಂದು ಈ ಹಕ್ಕಿ ಆಕ್ಲೆಂಡ್‌ಗೆ ತಲುಪಿತ್ತು.

Also Read : ಈ ಬೃಹತ್ ಕುಂಬಳಕಾಯಿಯ ತೂಕ ಬರೋಬ್ಬರಿ 1,065 ಕೆಜಿ...!

ಈ ಹಿಂದೆ ಶೋರ್‌ಬರ್ಡ್‌ ಎಂದು ಕರೆಯಲ್ಪಡುವ ಹಕ್ಕಿ 2007ರಲ್ಲಿ 11,680 ಕಿಲೋಮೀಟರ್ ದೂರವನ್ನು ಸಂಚರಿಸಿ ದಾಖಲೆ ಬರೆದಿತ್ತು. ಆದರೆ, ಈಗ ಈ ದಾಖಲೆಯನ್ನು ಈ ಅಗೋಡ್ವಿಟ್ ಮುರಿದು ಆ ಜಾಗದಲ್ಲಿ ತನ್ನ ಹೆಸರು ದಾಖಲಾಗುವಂತೆ ನೋಡಿಕೊಂಡಿದೆ.

Also Read : ಮೊಸಳೆಗಳೊಂದಿಗೆ ಈಜುವ ಹುಚ್ಚು ಸಾಹಸ...! : ಮುಂದೇನಾಯ್ತು ಗೊತ್ತಾ...?

ಈ ಅಗೋಡ್ವಿಟ್ ಹಕ್ಕಿಗಳು ತಮ್ಮ ಪ್ರಯಾಣದ ಸಂದರ್ಭದಲ್ಲಿ ನಿದ್ದೆ ಮಾಡುವುದಿಲ್ಲ ಎಂದು ನಂಬಲಾಗಿದೆ. ಹೀಗಾಗಿ, ಈ ಹಕ್ಕಿ ಬಿಡುವೇ ಇಲ್ಲದೆ ಸಂಚರಿಸಿದೆ ಎಂಬುದು ತಜ್ಞರ ಅಭಿಪ್ರಾಯ. ಇನ್ನು, ಗಂಡು ಅಗೋಡ್ವಿಟ್‌ಗಳು ಹಾರಾಟದ ಸಂದರ್ಭದಲ್ಲಿ ತಮ್ಮ ಅಂಗಾಂಗಗಳನ್ನು ಕುಗ್ಗಿಸುವ ಸಾಮರ್ಥ್ಯವನ್ನೂ ಹೊಂದಿವೆಯಂತೆ. ಇದರಿಂದ ಇವುಗಳಿಗೆ ಇನ್ನಷ್ಟು ವೇಗದಲ್ಲಿ ಸಾಗಲು ಸಹಾಯವಾಗುತ್ತದೆ ಎಂಬುದು ತಜ್ಞರ ಮಾತು.