ಮಹಿಳೆಯ ಮಾದರಿಯ ಅಭಿಯಾನ...
ಪ್ರತೀ ನವೆಂಬರಿನಲ್ಲಿ ವಿಶ್ವದಾದ್ಯಂತ ಪುರುಷರು ಗಡ್ಡ ಮೀಸೆ ಶೇವ್ ಮಾಡದೆ ನೋ ಶೇವ್ ನವೆಂಬರ್ ಆಚರಿಸುತ್ತಾರೆ. ಈ ಮೂಲಕ ಉಳಿಯುವ ಹಣದಲ್ಲಿ ಕ್ಯಾನ್ಸರ್ ಪೀಡಿತರಿಗೆ ಧನಸಹಾಯ ಸೇರಿದಂತೆ ಹಲವು ಸಾಮಾಜಿಕ ಕಾರ್ಯಗಳಿಗೆ ಹಣ ವಿನಿಯೋಗಿಸುತ್ತಾರೆ. ಇದೊಂದು ಮಾದರಿ ಅಭಿಯಾನವಾಗಿ ವಿಶ್ವದಾದ್ಯಂತ ಹೆಸರು ಗಳಿಸುತ್ತಿದೆ. ನೋ ಶೇವ್ ನವೆಂಬರ್ ಜೊತೆಗೆ ಪುರುಷರ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸುವ `ಮೊವೆಂಬರ್' ಎಂಬ ಅಭಿಯಾನವೂ ಇದೇ ತಿಂಗಳು ನಡೆಯುತ್ತಿದೆ. ಈ ಅಭಿಯಾನಕ್ಕೂ ವಿಶ್ವದಾದ್ಯಂತ ವ್ಯಾಪಕ ಬೆಂಬಲ ಸಿಗುತ್ತಿದೆ. ಆದರೆ, ಈ ವರ್ಷ ಆಸ್ಟ್ರೇಲಿಯಾದ ತಾಯಿಯೊಬ್ಬರು `ಮೊವೆಂಬರ್' ಬರೀ ಪುರುಷರಿಗಷ್ಟೇ ಸೀಮಿತವಲ್ಲ ಎಂದು ತೋರಿಸಲು ಪಣತೊಟ್ಟಿದ್ದಾರೆ. ಪೆನ್ರಿತ್‌ನ ಹಾಲಿಡೇ ವಿಲೇಜ್‌ನಲ್ಲಿ ಕೆಲಸ ಮಾಡುತ್ತಿರುವ ಲೂಯಿಸ್ ರಾಡ್ಲ್‌ ಇಂತಹದ್ದೊಂದು ಪ್ರಯತ್ನಕ್ಕೆ ಕೈ ಹಾಕಿದ್ದಾರೆ. ತನ್ನ ಕಚೇರಿಯಲ್ಲಿ ಪುರುಷರು ಗಡ್ಡ ಮೀಸೆ ಬಿಟ್ಟು ಕೆಲಸ ಮಾಡುತ್ತಿದ್ದನ್ನು ಕಂಡ ಲೂಯಿಸ್, ತಾನೂ ಈ ಆಂದೋಲನದ ಭಾಗವಾಗಿ ಪುರುಷರ ಆರೋಗ್ಯ ಜಾಗೃತಿಗೆ ಒಂದಷ್ಟು ಧನಸಹಾಯ ಮಾಡಬೇಕೆಂದು ನಿರ್ಧರಿಸಿದ್ದರು. ಅಂತೆಯೇ, ಲೂಯಿಸ್ ಇಡೀ ಒಂದು ತಿಂಗಳು ನಕಲಿ ಮೀಸೆಯನ್ನು ಮುಖಕ್ಕೆ ಅಂಟಿಸಿಕೊಂಡು ಬಂದು ಕಚೇರಿಯಲ್ಲಿ ಕೆಲಸ ಮಾಡಲು ಆರಂಭಿಸಿದ್ದರು...
ಪ್ರತಿದಿನ ಮೀಸೆ ಇಟ್ಟುಕೊಂಡು ಓಡಾಟ...
ಈ ತಿಂಗಳ 17 ದಿನವೂ ಇವರು ಮುಖಕ್ಕೆ ಮೀಸೆ ಇಟ್ಟುಕೊಂಡು ಕೆಲಸ ಮಾಡಿದ್ದಲ್ಲದೆ, ಪ್ರತಿದಿನ ವಿವಿಧ ರೀತಿಯ ಮೀಸೆಗಳ ಮೂಲಕವೂ ಗಮನ ಸೆಳೆಯುತ್ತಿದ್ದರು. ಇವರನ್ನು ನೋಡಿ ಕೆಲವರು ಕುಹಕವಾಡಿದ್ದರು. ಆದರೆ, ಇದಕ್ಕೆಲ್ಲಾ ತಲೆಕೆಡಿಸಿಕೊಳ್ಳದ ಲೂಯಿಸ್ ಮನೆಯಿಂದ ಹೊರಗೆ ಹೋಗುವಾಗಲೂ ಮೀಸೆ ಅಂಟಿಸಿಕೊಳ್ಳಲು ಮರೆಯುತ್ತಿರಲಿಲ್ಲ. ಮೀಸೆಯೊಂದಿಗೆ ಎಲ್ಲೆಲ್ಲೂ ಓಡಾಡುವುದಕ್ಕೂ ಅಂಜುತ್ತಿರಲಿಲ್ಲ. `ನಾನು ಈಗ ನನ್ನ ಕೈಯಲ್ಲಾದ ಒಂದಷ್ಟು ಹಣ ಸಂಗ್ರಹಿಸಿದ್ದೇನೆ. ಪ್ರತಿದಿನ ಬೇರೆ ಬೇರೆ ಮೀಸೆಯೊಂದಿಗೆ ನಾನು ಬರುತ್ತಿದ್ದೇನೆ. ಕೆಲವೊಮ್ಮೆ ಮುಖಕ್ಕೆ ಮೀಸೆ ಅಂಟಿಸಿಕೊಳ್ಳುತ್ತೇನೆ. ಕೆಲವೊಮ್ಮೆ ಮೀಸೆಯನ್ನು ಮುಖದಲ್ಲಿ ಬಿಡಿಸಿಕೊಂಡು ಮನೆಯಿಂದ ಹೊರಡುತ್ತೇನೆ. ಒಂದಷ್ಟು ಸಂದರ್ಭದಲ್ಲಿ ಇದರಿಂದ ಕಿರಿಕಿರಿ ಅನುಭವಿಸಿದ್ದೂ ಇದೆ' ಎನ್ನುತ್ತಾರೆ ಲೂಯಿಸ್.
Twitter-30 different Mo's in 30 days. They said it couldn'...
ಜಾಗೃತಿಗಾಗಿ ಹಣ ಸಂಗ್ರಹ...
ಮೀಸೆ ಇಟ್ಟುಕೊಂಡು ಕಚೇರಿ, ಅಂಗಡಿ, ಹೆತ್ತವರ ಮನೆ, ಜಿಮ್ ಮತ್ತು ಸ್ವಿಮ್ಮಿಂಗ್ ಪೂಲ್‌ಗೆ ಹೋಗುವ ಫೋಟೋವನ್ನು ಲೂಯಿಸ್ ಹಂಚಿಕೊಂಡಿದ್ದಾರೆ. ಹಾಗಂತ, ಲೂಯಿಸ್ ಮಾಡುತ್ತಿರುವುದು ಬರೀ ಸ್ಟಂಟ್, ಇದು ಸಾಮಾಜಿಕ ಜಾಲತಾಣದಲ್ಲಿ ಎಲ್ಲರ ಗಮನ ಸೆಳೆಯುವ ಯತ್ನ ಎಂದು ಅಂದುಕೊಂಡರೆ ತುಂಬಾ ತಪ್ಪಾಗುತ್ತದೆ. ಯಾಕೆಂದರೆ, ಈ 17 ದಿನದ ಅವಧಿಯಲ್ಲಿ ಪುರುಷರ ಆರೋಗ್ಯದ ಜಾಗೃತಿಗೆ ಮತ್ತು ಅವರಿಗೆ ಒಂದಷ್ಟು ಸಹಾಯ ಮಾಡುವ ಸಲುವಾಗಿಯೇ ಇವರು 500 ಪೌಂಡ್ ಅಂದರೆ ಭಾರತದ ಸುಮಾರು 46,272 ರೂಪಾಯಿ ಹಣವನ್ನು ಸಂಗ್ರಹಿಸಿದ್ದಾರೆ. ಮುಂದಿನ ದಿನಕ್ಕೆ ಇದಕ್ಕೆ ಇನ್ನೂ ಹೆಚ್ಚಿನ ಹಣ ಸೇರಿಸುವ ವಿಶ್ವಾಸವನ್ನು ಇವರು ಹೊಂದಿದ್ದಾರೆ. ಈ ಮೂಲಕ ಲೂಯಿಸ್ ಮಾದರಿ ಹೆಜ್ಜೆಯನ್ನಿಟ್ಟಿದ್ದಾರೆ.
Credit : https://www.justgiving.com/fundraising/lou-with-the-moustache-radl