ಮರದ ದಿಮ್ಮಿ ಕೆಳಗೆ ಕಾಣುತ್ತಿರುವುದೇನು...? : ನೆಟ್ಟಿಗರು ಫುಲ್ ಕನ್‌ಫ್ಯೂಸ್...!

ಅದೊಂದು ಮರದ ದಿಮ್ಮಿ... ಅದರ ಕೆಳಗೆ ಕಾಣುತ್ತಿದೆ ಕಾಲುಗಳಂತಹ ಆಕೃತಿ... ಸದ್ಯ ನೆಟ್ಟಿಗರನ್ನು ಕನ್‌ಫ್ಯೂಸ್ ಮಾಡಿರುವ ಫೋಟೋ ಇದು. ಪಾದದ ಐದು ಬೆರಳುಗಳು ಮರದ ದಿಮ್ಮಿ ಕೆಳಗೆ ಇರುವಂತೆ ಈ ಫೋಟೋದಲ್ಲಿ ಕಾಣಿಸುತ್ತದೆ. ಆದರೆ, ಇದು ಮನುಷ್ಯರ ಕಾಲ ಬೆರಳಾ ಅಥವಾ ಪ್ರಾಣಿಗಳ ಕಾಲ ಬೆರಳ ಎಂಬುದು ತಕ್ಷಣಕ್ಕೆ ಗೊತ್ತಾಗುವುದಿಲ್ಲ. ಅದೂ ಅಲ್ಲದೆ, ಇದರ ಬಣ್ಣ ಕೂಡಾ ತಕ್ಷಣಕ್ಕೆ ಗೊಂದಲ ಮೂಡಿಸುತ್ತದೆ. ಒಂದು ಕ್ಷಣಕ್ಕೆ ಇದು ಮೃತದೇಹದ ಕಾಲುಗಳಾಗಿರಬಹುದು ಎಂದೆನಿಸಿದರೂ ಅಚ್ಚರಿ ಇಲ್ಲ...!


ಭಾರತೀಯ ಅರಣ್ಯ ಸೇವೆಯ ಅಧಿಕಾರಿ ಸುಸಂತ ನಂದ ಅವರು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಇಂತಹದ್ದೊಂದು ಫೋಟೋ ಹಾಕಿದ್ದರು ಮತ್ತು `ನೀವು ಈ ಪ್ರಾಣಿಯನ್ನು ಗುರುತಿಸುತ್ತೀರಾ...?' ಎಂದು ಪ್ರಶ್ನೆಯನ್ನು ಕೇಳಿದ್ದರು. ಈ ಪ್ರಶ್ನೆಗೆ ನಂದ ಅವರ ಫಾಲೋವರ್ಸ್ ಭರ್ಜರಿಯಾಗಿಯೇ ಪ್ರತಿಕ್ರಿಯೆ ಕೊಟ್ಟಿದ್ದಾರೆ. ಆದರೆ, ಬಹುತೇಕರನ್ನು ಈ ಫೋಟೋ ಕನ್‌ಫ್ಯೂಸ್ ಮಾಡಿ ಹಾಕಿತ್ತು. ಹೀಗಾಗಿ, ಒಬ್ಬೊಬ್ಬರು ಒಂದೊಂದು ಉತ್ತರ ಕೊಟ್ಟಿದ್ದರು. ಒಬ್ಬರು `ಇದು ಭಯಾನಕ'ವಾಗದೆ ಎಂದರೆ, ಇನ್ನು ಕೆಲವರು ಲಂಗೂರ್, ಗೊರಿಲ್ಲಾ ಸೇರಿದಂತೆ ವಿವಿಧ ಪ್ರಾಣಿಗಳ ಹೆಸರನ್ನು ಉತ್ತರವಾಗಿ ಕೊಟ್ಟಿದ್ದರು. ಆದರೆ, ಈ ಎಲ್ಲಾ ಉತ್ತರಗಳು ತಪ್ಪಾಗಿದ್ದವು.

ಹೀಗೆ ನೆಟ್ಟಿಗರು ಬಹು ಕುತೂಹಲದಿಂದಲೇ ಈ ಫೋಟೋವನ್ನು ವೀಕ್ಷಿಸಿದ್ದರು. ಅಲ್ಲದೆ, ಬಹಳ ಆಸಕ್ತಿಯಿಂದಲೇ ಉತ್ತರಗಳನ್ನು ಕೊಟ್ಟಿದ್ದರು. ಇತ್ತ, ಇದೇನು ಎಂದು ತಿಳಿದುಕೊಳ್ಳುವ ನೆಟ್ಟಿಗರ ಕುತೂಹಲ ಹೆಚ್ಚಾಗುತ್ತಿದ್ದಂತೆಯೇ ಸ್ವತಃ ಸುಸಂತ ನಂದ ಅವರೇ ಇದಕ್ಕೆ ಉತ್ತರ ಕೊಟ್ಟಿದ್ದಾರೆ. ಅಸಲಿಗೆ ಇದು ಯಾವುದೇ ಪ್ರಾಣಿ ಅಥವಾ ಮನುಷ್ಯನ ಪಾದ ಅಲ್ಲ. ಬದಲಾಗಿ ಇದು ಒಂದು ರೀತಿಯ ಫಂಗಸ್ ಅಂದರೆ ಶೀಲಿಂದ್ರ. ಹೀಗೆ ಉತ್ತರ ನೀಡಿದ್ದ ಸುಸಂತ ನಂದ ಅವರು ಇದಕ್ಕೆ ಪೂರಕವಾಗಿ ಒಂದು ವೆಬ್‌ಸೈಟ್ ಲಿಂಕ್ ಕೂಡಾ ಹಂಚಿಕೊಂಡಿದ್ದರು. ಈ ಫಂಗಸ್ ಅನ್ನು `ಡೆಡ್ ಮ್ಯಾನ್ಸ್‌ ಫಿಂಗರ್ಸ್‌' ಅಥವಾ ಕ್ಸೈಲೇರಿಯಾ ಪಾಲಿಮಾರ್ಫಾ ಎಂದು ಕರೆಯಲಾಗುತ್ತದೆ. ಸುಸಂತ ನಂದ ಅವರು ಕೊಟ್ಟಿರುವ ಲಿಂಕ್‌ನಲ್ಲಿರುವ ವೆಬ್‌ಸೈಟ್‌ನಲ್ಲಿ ಈ ಕುರಿತ ವಿಸ್ತೃತ ಮಾಹಿತಿ ಇದೆ.

ಪ್ರಕೃತಿಯಲ್ಲಿ ಬಗೆದಷ್ಟೂ ಇಂತಹ ಅನೇಕ ರಹಸ್ಯಗಳಡಗಿದೆ. ಈ ರಹಸ್ಯಗಳು ಖಂಡಿತಾ ನಮ್ಮಲ್ಲಿ ಅಚ್ಚರಿ ಮೂಡಿಸುತ್ತದೆ.