Constitution Day 2021: ಭಾರತದ ಪಾಲಿನ ಮಹತ್ವದ ದಿನ : ಇಲ್ಲಿದೆ ಸಂವಿಧಾನ ಶಿಲ್ಪಿಯ ಅದ್ಭುತ ಮಾತುಗಳು

ನವೆಂಬರ್ 26. ಪ್ರತಿಯೊಬ್ಬ ಭಾರತೀಯರ ಪಾಲಿಗೂ ಅತ್ಯಂತ ಮಹತ್ವದ ದಿನ. ಪವಿತ್ರ ಸಂವಿಧಾನದ ಮೂಲಕ ನಮ್ಮ ದೇಶದಲ್ಲಿ ಪ್ರಜಾಪ್ರಭುತ್ವಕ್ಕೊಂದು ಅರ್ಥ ಕಲ್ಪಿಸಿಕೊಡುವ ವ್ಯವಸ್ಥೆಯನ್ನು ಜಾರಿಗೆ ತಂದ ದಿನವಿದು. ಪ್ರತಿಯೊಬ್ಬ ಭಾರತೀಯರ ಶಕ್ತಿಯಾದ, ಎಲ್ಲರ ಪಾಲಿಗೂ ಪವಿತ್ರ ಗ್ರಂಥವಾದ ನಮ್ಮ ಸಂವಿಧಾನವನ್ನು 1949ರ ನವೆಂಬರ್ 26ರಂದು ಅಂಗೀಕರಿಸಲಾಗಿತ್ತು. ಹೀಗಾಗಿ, ಈ ದಿನವನ್ನು ದೇಶಾದ್ಯಂತ ಸಂವಿಧಾನ ದಿನವಾಗಿ ಆಚರಿಸಲಾಗುತ್ತದೆ.

ಡಾ. ಬಿ.ಆರ್‌.ಅಂಬೇಡ್ಕರ್‌ ನೇತೃತ್ವದ ಸಂವಿಧಾನ ಕರಡು ರಚನಾ ಸಮಿತಿಯ 2 ವರ್ಷ 11 ತಿಂಗಳ ಕಾಲ ಸತತ ಅಧ್ಯಯನ, ಪರಿಶ್ರಮದ ಫಲವೇ ನಮ್ಮ ಬಲಶಾಲಿ ಸಂವಿಧಾನ. 1949ರ ನವೆಂಬರ್ 26ರಂದು ಎಲ್ಲಾ ಸಂಸತ್ ಸದಸ್ಯರು ಸರ್ವಾನುಮತದಿಂದ ಭಾರತದ ಸಂವಿಧಾನವನ್ನು ಅಂಗೀಕರಿಸಿದರು. ಬಳಿಕ 1950ರ ಜನವರಿ 26 ರಂದು ನಮ್ಮ ಸಂವಿಧಾನವನ್ನು ಅನುಷ್ಠಾನಕ್ಕೆ ತರಲಾಗಿತ್ತು.

ಸಂವಿಧಾನ ಭಾರತದ ದೊಡ್ಡ ಬಲ. ಈ ಮಹಾನ್ ಗ್ರಂಥ ದೇಶದ ಜನರನ್ನು ಸಶಕ್ತಗೊಳಿಸಿದೆ. ಸರ್ವರಿಗೂ ಸಮಾನತೆಯೊದಗಿದೆ. ಮೂಲಭೂತ ಹಕ್ಕುಗಳು, ಕರ್ತವ್ಯವನ್ನೂ ನೀಡಿದೆ. ಇದರ ದ್ಯೋತಕವಾಗಿಯೇ ಸಂವಿಧಾನ ದಿನವನ್ನೂ ಆಚರಿಸಲಾಗುತ್ತಿದೆ. ಇದು ನಮ್ಮೆಲರ ಪಾಲಿನ ಹೆಮ್ಮೆಯ ದಿನ ಕೂಡಾ ಹೌದು. ಇಂತಹ ಮಹತ್ವದ ದಿನದಂದು ನಮ್ಮ ಸಂವಿಧಾನ ಶಿಲ್ಪಿ ಡಾ. ಬಿ ಆರ್ ಅಂಬೇಡ್ಕರ್ ಅವರ ಸ್ಫೂರ್ತಿದಾಯಕ ಮಾತುಗಳು ಇಲ್ಲಿವೆ.