ಕ್ಯಾನ್ಸರ್ ಪೀಡಿತ ಕಂದನ ಖುಷಿಗಾಗಿ ವೈದ್ಯರ ಬ್ಯಾಲೆ ಡಾನ್ಸ್‌ : ಕಲ್ಲುಹೃದಯವನ್ನೂ ಕರಗಿಸುವ ದೃಶ್ಯವಿದು

ಆ ಪುಟ್ಟ ಕಣ್ಣಲ್ಲಿ ಹೊಳಪಿತ್ತು... ಮುಖದಲ್ಲಿ ನಗುವರಳಿತ್ತು... ಹೃದಯಂತರಾಳದಲ್ಲಿದ್ದ ನೋವು ಅರೆಕ್ಷಣ ದೂರವಾಗಿತ್ತು... ಪುಟ್ಟ ಹೃದಯ ಖುಷಿಯಿಂದ ಕುಣಿದಿತ್ತು... ಬದುಕಿನಲ್ಲಿ ಮತ್ತೆ ಚೈತನ್ಯ ತುಂಬಿತ್ತು... ಕಾರಣ, ಆ ಇಬ್ಬರು ಹೃದಯವಂತರು.

ಸಾಮಾಜಿಕ ಮಾಧ್ಯಮಗಳಲ್ಲಿ ಕಾಣಸಿಗುವ ಒಂದಷ್ಟು ವಿಡಿಯೋಗಳು ನಮ್ಮ ಮೊಗದಲ್ಲಿ ನಗುವರಳಿಸುತ್ತದೆ, ಹೃದಯಕ್ಕೆ ಹಿತ ನೀಡುತ್ತವೆ. ಇದರ ಜೊತೆಜೊತೆಗೆ ಕೆಲ ವಿಡಿಯೋಗಳು ನಮ್ಮ ಹೃದಯವನ್ನು ಭಾರವಾಗಿಸುತ್ತದೆ. ಕಣ್ಣಾಲಿಗಳು ತುಂಬಿ ಬರುವಂತೆ ಮಾಡುತ್ತವೆ. ಇದು ಕೂಡಾ ಅಂತಹದ್ದೇ ಒಂದು ವಿಡಿಯೋ. ಕಲ್ಲುಹೃದಯವನ್ನೂ ಕರಗಿಸುವಂತಹ ಈ ವಿಡಿಯೋವನ್ನು ನೋಡಿ ಬಹುತೇಕರು ಭಾವುಕರಾಗಿದ್ದಾರೆ...

ಮತ್ತೊಬ್ಬರ ಮೊಗದಲ್ಲಿ ನಗುವರಳಿಸಿ ಹೃದಯದಲ್ಲಿ ಆನಂದ ಮೂಡಿಸುವುದು ಬಹುದೊಡ್ಡ ಕೆಲಸ. ಅದರಲ್ಲೂ ಸಂಕಷ್ಟದ ಸಂದರ್ಭದಲ್ಲಿ ಮತ್ತೊಬ್ಬರಿಗೆ ಖುಷಿ ನೀಡುವುದು ಹೃದಯವಂತಿಗೆ ಸಾಕ್ಷಿಯೂ ಹೌದು. ಇದು ಕೂಡಾ ಅಂತಹದ್ದೇ ಒಂದು ದೃಶ್ಯ. ಈ ದೃಶ್ಯ ಸೆರೆಯಾಗಿದ್ದು ಆಸ್ಪತ್ರೆಯಲ್ಲಿ. ಈ ಆಸ್ಪತ್ರೆಯಲ್ಲಿ ಒಬ್ಬಳು ಮುದ್ದು ಮುಖದ ಪುಟಾಣಿ ಮಾರಕ ಕ್ಯಾನ್ಸರ್‌ಗೆ ಚಿಕಿತ್ಸೆ ಪಡೆಯುತ್ತಿದ್ದಳು. ಈ ಕಂದನ ಮೊಗದಲ್ಲಿ ಖುಷಿ ಅರಳಿಸಲು ಆಸ್ಪತ್ರೆಯ ಸಿಬ್ಬಂದಿ ಬ್ಯಾಲೆ ಡಾನ್ಸ್‌ ಮಾಡಿದ್ದಾರೆ. ಈ ಸನ್ನಿವೇಶವನ್ನು ನೋಡುವಾಗಲೇ ಮನಸ್ಸು ಭಾರವಾಗುತ್ತದೆ...


Also Read : Air Car : ಮೂರೇ ನಿಮಿಷದಲ್ಲಿ ವಿಮಾನವಾಗಿ ಬದಲಾಗಿ ಹಾರುವ ಕಾರು! : ಅದ್ಭುತ ದೃಶ್ಯವಿದು

ವೋರ್ಸೆಸ್ಟರ್ಶೈರ್ ಅಕ್ಯೂಟ್ ಹಾಸ್ಪಿಟಲ್ಸ್ ಎನ್ಎಚ್ಎಸ್ ಟ್ರಸ್ಟ್‌ನ ಅಧಿಕೃತ ಫೇಸ್‌ಬುಕ್ ಖಾತೆಯಲ್ಲಿ ಈ ವಿಡಿಯೋವನ್ನು ಅಪ್ಲೋಡ್ ಮಾಡಲಾಗಿದೆ. ಐದು ವರ್ಷದ ಐಸೋಬೆಲ್ ಫ್ಲೆಚರ್ ಎಂಬ ಬಾಲಕಿ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದಾಳೆ. ಈ ಕಂದನಿಗೆ ಬ್ಯಾಲೆ ಎಂದರೆ ಬಲು ಇಷ್ಟ. ಹೀಗಾಗಿ, ಆಸ್ಪತ್ರೆಯ ವೈದ್ಯಕೀಯ ಸಿಬ್ಬಂದಿ ಡಾ ಬೈಲಾನ್ ಕಮಲರಾಜನ್ ಮತ್ತು ಸಹೋದ್ಯೋಗಿ ಎಮ್ಮಾ ಮಾಂಡರ್ ಕಂದನಿಗಾಗಿ ಬ್ಯಾಲೆ ಸ್ಟೆಪ್ಸ್‌ ಪ್ರದರ್ಶಿಸಿದ್ದರು. ಕಂದ ಚಿಕಿತ್ಸೆಗೆಂದು ಬಂದಂತಹ ಸಂದರ್ಭದಲ್ಲಿ ಈ ಇಬ್ಬರು ವಿಶಿಷ್ಟ ದಿರಿಸು ತೊಟ್ಟು ನೃತ್ಯ ಮಾಡಿದ್ದಾರೆ. ಈ ನೃತ್ಯ ನೋಡಿ ಐಸೋಬೆಲ್ ಅರೆಕ್ಷಣ ನೋವು ಮರೆತು ಖುಷಿಯಿಂದ ಕುಣಿದಿದ್ದಾಳೆ.

Also Read : ಮಿನಿ ಮನೆಯಂತಿದೆ ಈ ಕಾರು...! : ಇಲ್ಲಿದೆ ಬೆಡ್, ಫ್ರಿಡ್ಜ್‌ ಸೇರಿ ಎಲ್ಲಾ ಸೌಕರ್ಯ...!

`ಬ್ಯಾಲೆ ಪ್ರೇಮಿ ಮಗು ತನ್ನ ಕ್ಯಾನ್ಸರ್ ಚಿಕಿತ್ಸೆಗೆಂದು ನಮ್ಮ ಮಕ್ಕಳ ಚಿಕಿತ್ಸಾಲಯಕ್ಕೆ ಬಂದಾಗ ತಂಡದ ಇಬ್ಬರು ಅವಳಿಗೆ ವಿಶೇಷ ಸರ್ಪ್ರೈಸ್ ನೀಡಿದ್ದರು. ಈ ಸುಂದರ ಸರ್ಪ್ರೈಸ್‌ಗೆ ಬೈಲಾನ್ ಮತ್ತು ಎಮ್ಮಾ ಅವರಿಗೆ ಧನ್ಯವಾದಗಳು' ಎಂದು ಫೇಸ್‌ಬುಕ್‌ ಪೋಸ್ಟ್‌ನಲ್ಲಿ ಬರೆಯಲಾಗಿದೆ.

Also Read : ಆನೆಗಳೊಂದಿಗೆ ಯಾವತ್ತೂ ಹೀಗೆ ವರ್ತಿಸಬೇಡಿ : ತಿರುಗಿ ಬಿದ್ದರೆ ಅಪಾಯ ಕಟ್ಟಿಟ್ಟಬುತ್ತಿ!

ಸದ್ಯ ಈ ವಿಡಿಯೋ ಎಲ್ಲರ ಗಮನ ಸೆಳೆದಿದೆ. ಎಲ್ಲರೂ ಕಂದನ ಮೊಗದಲ್ಲಿ ನಗುವರಳಿಸಿದ ಸಿಬ್ಬಂದಿಗೆ ಧನ್ಯವಾದ ಹೇಳಿದ್ದಾರೆ. ಅಲ್ಲದೆ, ಕಂದ ಐಸೋಬೆಲ್ ಶೀಘ್ರ ಗುಣಮುಖಳಾಗಲಿ ಎಂದು ಎಲ್ಲರೂ ಹೃದಯತುಂಬಿ ಹಾರೈಸಿದ್ದಾರೆ. ನಮ್ಮ ಪ್ರಾರ್ಥನೆ ಕೂಡಾ ಅದೇ... ಈ ಪುಟಾಣಿ ಕ್ಯಾನ್ಸರ್‌ನಿಂದ ಮುಕ್ತಳಾಗಲಿ... ಅವಳ ಬದುಕನ್ನು ಖುಷಿಯಿಂದ ಕಳೆಯಲಿ...