ಈಕೆ ಲಾಸ್ ಏಂಜಲೀಸ್‌ನ ರಾನು ಮಂಡಲ್ : ರಸ್ತೆ ಬದಿಯಲ್ಲಿ ಹಾಡಿದ್ದ ಗಾಯಕಿಗೆ ಸಿಕ್ತು ಅವಕಾಶ...

ಜೀವನವೇ ಹಾಗೆ... ಅನಿರೀಕ್ಷಿತ ತಿರುವುಗಳ ದಾರಿ... ಒಮ್ಮೊಮ್ಮೆ ಈ ತಿರುವುಗಳು ಬದುಕನ್ನೇ ಮುಗಿಸುತ್ತವೆ, ಮತ್ತೆ ಕೆಲವೊಮ್ಮೆ ಬದುಕು ನೀಡುತ್ತವೆ... ಅದಕ್ಕೆ ಸಾಕ್ಷಿ ಇವರು...

ರಾನು ಮಂಡಲ್... ಇತ್ತೀಚಿನ ದಿನಗಳಲ್ಲಿ ಭಾರತದಲ್ಲಿ ಕೇಳಿ ಬಂದ ದೊಡ್ಡ ಹೆಸರು. ರೈಲ್ವೇ ನಿಲ್ದಾಣದಲ್ಲಿ ಹಾಡುತ್ತಿದ್ದ ಈ ರಾನು ಏಕಾಏಕಿ ಸ್ಟಾರ್ ಸಿಂಗರ್ ಆಗಿ ಬಿಟ್ಟಿದ್ದರು. ಅದು ಒಂದು ವೀಡಿಯೋದ ಮೂಲಕ. ಗಾನ ಕೋಗಿಲೆ ಲತಾ ಮಂಗೇಶ್ವರ್ ಅವರನ್ನೇ ಹೋಲುವ ಧ್ವನಿ ಸಿರಿವಂತಿಕೆ ಹೊಂದಿದ್ದ ರಾನು ಹಾಡುವ ವೀಡಿಯೋವನ್ನು ವ್ಯಕ್ತಿಯೊಬ್ಬರು ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣಕ್ಕೆ ಅಪ್ಲೋಡ್ ಮಾಡಿದ್ದರು. ಇದು ಒಂದೇ ದಿನಕ್ಕೇ ವೈರಲ್ ಆಗಿ ಹೋಯಿತು. ಎಲ್ಲಿ ತನಕ ಎಂದರೆ ಬಾಲಿವುಡ್ ಗಾಯಕ ಹಿಮೇಶ್ ರೇಶ್ಮಿಯಾ ಕರೆದು ಅವಕಾಶ ಕೊಟ್ಟರು. ಜೊತೆಗೆ, ಒಳ್ಳೆಯ ಸಂಭಾವನೆಯನ್ನೂ ನೀಡಿದ್ದರು. ಅಲ್ಲಿಗೆ ರಾನು ಬದುಕಿನ ಕಷ್ಟ ದೂರವಾಯಿತು.


ಈಗ ರಾನು ಅವರ ಬದುಕನ್ನೇ ಹೋಲುವ ಕತೆ ಲಾಸ್ ಏಂಜಲೀಸ್‌ನಲ್ಲೂ ನಡೆದಿದೆ. ಎಮಿಲಿ ಝಮೌರ್ಕಾ ಈ ಕತೆಯ ನಾಯಕಿ. ಮೂಲತಃ ರಷ್ಯಾದವರಾದ 52 ವರ್ಷದ ಎಮಿಲಿ ಲಾಸ್‌ ಏಂಜಲೀಸ್‌ನಲ್ಲಿ ಬೀದಿ ಬೀದಿ ಅಲೆಯುತ್ತಿದ್ದರು. ಯಾಕೆಂದರೆ, ಇವರಿಗೆ ಮನೆ ಇರಲಿಲ್ಲ. ಇಂತಹ ಎಮಿಲಿ ಲಾಸ್ ಏಂಜಲೀಸ್‌ನ ಸಬ್‌ವೇ ಸ್ಟೇಷನ್‌ನಲ್ಲಿ ಖ್ಯಾತ ಹಾಡನ್ನು ಹಾಡಿದ್ದರು. ಅದನ್ನು ಅಲ್ಲೇ ಇದ್ದ ಪೊಲೀಸ್ ಅಧಿಕಾರಿಯೊಬ್ಬರು ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣಕ್ಕೆ ಅಪ್ಲೋಡ್ ಮಾಡಿದ್ದರು. ಎಮಿಲಿ ಸುಶ್ರಾವ್ಯ ಕಂಠ ಕೇಳಿ ಎಲ್ಲರೂ ಪುಳಕಗೊಂಡಿದ್ದರು... ಅಷ್ಟೇ... ಮುಂದಿನದೆಲ್ಲಾ ಸಂತೋಷದ ಕತೆ...


ಎಮಿಲಿ ಝಮೌರ್ಕಾರ ಸಿರಿಕಂಠಕ್ಕೆ ಮರುಳಾದ ಜರ್ಮನಿಯ ಖ್ಯಾತ ಮ್ಯೂಸಿಕ್ ಪ್ರೊಡ್ಯೂಸರ್ ಜೋಯಲ್ ಡೈಮಂಡ್ ತಕ್ಷಣ ಇವರಿಗೆ ಹಾಡುವುದಕ್ಕೆ ಅವಕಾಶ ನೀಡಿದ್ದಾರೆ. ಜೊತೆಗೆ, ಇನ್ನೂ ಒಂದೆರಡು ಮ್ಯೂಸಿಕ್ ಕಂಪನಿಗಳು ಇವರಿಗೆ ಹಾಡಲು ವೇದಿಕೆ ನೀಡಿವೆ. ಹಲವು ಬೃಹತ್ ಕಾರ್ಯಕ್ರಮಗಳಲ್ಲಿ ಹಾಡುವುದಕ್ಕೂ ಇವರಿಗೆ ಅವಕಾಶಗಳು ಸಿಕ್ಕಿವೆ. ಈಗ ಎಮಿಲಿ ಸೆಲೆಬ್ರಿಟಿಯಾಗಿದ್ದಾರೆ.


ಎಮಿಲಿ ಸುಮಾರು ಎರಡು ದಶಕದ ಹಿಂದೆ ಅಮೇರಿಕಾಕ್ಕೆ ಬಂದಿದ್ದರು. ಇವರು ಪಿಯಾನೋ ಮತ್ತು ವಾಯಲಿನ್ ಕಲಿಸಿಕೊಡುತ್ತಿದ್ದರು. ಬಳಿಕ ಅನಾರೋಗ್ಯಕ್ಕೆ ತುತ್ತಾದ ಇವರು ಚಿಕಿತ್ಸೆಗಾಗಿ ಮನೆಯನ್ನೂ ಕಳೆದುಕೊಂಡು ಬೀದಿ ಬೀದಿ ಅಲೆಯುವುದಕ್ಕೆ ಆರಂಭಿಸಿದ್ದರು.


ಸದ್ಯ ಒಂದು ವೀಡಿಯೋ ಇವರ ಜೀವನವನ್ನೇ ಬದಲಾಯಿಸಿದೆ. ಬದುಕಿನ ಅನಿರೀಕ್ಷಿತ ತಿರುವು ಎಮಿಲಿ ಅವರ ಕಷ್ಟದ ದಿನಗಳನ್ನು ದೂರ ಮಾಡಿ ನಗೆ ಚೆಲ್ಲುವಂತೆ ಮಾಡಿದೆ.