ಮೊಮ್ಮಕ್ಕಳನ್ನು ಬಿಗಿದಪ್ಪಲು ಹಿಮಕರಡಿಯ ವೇಷ ಧರಿಸಿದ ಅಜ್ಜ ಅಜ್ಜಿ! : ಮಾರ್ಚ್ ಬಳಿಕ ಇದೇ ಮೊದಲ ಭೇಟಿ...!

ರಕ್ಕಸ ಕೊರೊನಾ ವೈರಾಣು ಕೊಡುವ ಕಾಟ ಅಷ್ಟಿಷ್ಟಲ್ಲ... ಈ ರಕ್ಕಸ ವೈರಾಣುವಿನ ಕಾರಣದಿಂದ ನೊಂದವರೆಷ್ಟೋ... ಅದರಲ್ಲೂ ವಯಸ್ಸಾದವರು ಮತ್ತು ಮಕ್ಕಳಿಗೆ ಈ ಮಹಾಮಾರಿಯಿಂದಾಗುವ ಅಪಾಯ ಇನ್ನೂ ಹೆಚ್ಚು. ಇದೇ ಕಾರಣದಿಂದ ಅನೇಕ ಕಡೆಗಳಲ್ಲಿ ಸುರಕ್ಷತೆಯ ದೃಷ್ಟಿಯಿಂದ ಮನೆಯ ಹಿರಿಯರು ಪ್ರತ್ಯೇಕ ವಾಸದಲ್ಲಿದ್ದರು. ಅದೆಷ್ಟೋ ತಿಂಗಳುಗಳ ಕಾಲ ಇವರೆಲ್ಲಾ ಮನೆಯೊಳಗೇ ಬಂಧಿಯಾಗಿದ್ದರು. ಪರಿಸ್ಥಿತಿ ಹೇಗಿತ್ತು ಎಂದರೆ ಹತ್ತಿರದಲ್ಲಿದ್ದರೂ ಎಷ್ಟೋ ಅಜ್ಜ ಅಜ್ಜಿಗೆ ತಮ್ಮ ಮಕ್ಕಳು, ಮೊಮ್ಮಕ್ಕಳನ್ನು ನೋಡುವುದಕ್ಕೂ ಸಾಧ್ಯವಾಗಿರಲಿಲ್ಲ. ಇದೆಷ್ಟು ನೋವಿನ ಸನ್ನಿವೇಶ ಎಂಬುದನ್ನು ಊಹಿಸುವುದೇನೂ ಕಷ್ಟವಲ್ಲ.

Also Read : ಸೂಪರ್ ಐಡಿಯಾ! : 10 ವರ್ಷದ ಬಾಲಕಿಯಿಂದ `ಹಗ್ ಕರ್ಟನ್' ವಿನ್ಯಾಸ

ಇಂತಹ ಸಂಕಷ್ಟದ ಸಂದರ್ಭದಲ್ಲಿ `ಹಗ್ ಕರ್ಟನ್'ಗಳು ಜಾಸ್ತಿ ಬಳಕೆಗೆ ಬಂದಿದ್ದವು. ಅಂದರೆ ಪರದೆಯ ಮೂಲಕ ತಮ್ಮ ಪ್ರೀತಿಪಾತ್ರರನ್ನು ಅಪ್ಪಿಕೊಳ್ಳಲು ಇರುವಂತಹ ವ್ಯವಸ್ಥೆಯದು. ಅನೇಕರು ತಮ್ಮ ಮೊಮ್ಮಕ್ಕಳನ್ನು ಇದೇ ಪರದೆಯ ಮೂಲಕ ಬಿಗಿದಪ್ಪಿ ಮನಸ್ಸಿಗೆ ಕೊಂಚ ಸಮಾಧಾನ ತಂದುಕೊಳ್ಳುತ್ತಿದ್ದರು. ಇನ್ನು ಕೆಲವರು ಮೊಮ್ಮಕ್ಕಳನ್ನು ದೂರದಿಂದಲೇ ನೋಡಿ ಖುಷಿಯಿಂದ ನಗುತ್ತಿದ್ದರೂ ಒಳಗೊಳಗೇ ಕಣ್ಣೀರಿಡುತ್ತಿದ್ದರು...! ಖಂಡಿತಾ ಇದು ಕರುಳು ಹಿಂಡುವಂತಹ ಸನ್ನಿವೇಶಗಳು.

Also Read : ಸಹಾಯಕ್ಕೆ ಮೊರೆ ಇಟ್ಟ ಶ್ವಾನ, ರಕ್ಷಣೆಗೆ ಧಾವಿಸಿದ ಪೊಲೀಸ್ : ಇದು ಹೃದಯಸ್ಪರ್ಶಿ ದೃಶ್ಯ


ಅಂತೆಯೇ, ಈಗ ಇಲ್ಲೊಂದು ವೃದ್ಧ ಜೋಡಿ ಮೊಮ್ಮಕ್ಕಳನ್ನು ನೋಡಲು ಉತ್ತಮ ಮಾರ್ಗವನ್ನು ಕಂಡುಕೊಂಡಿದ್ದಾರೆ. ಇವರು ಹಿಮಕರಡಿಯ ವೇಷ ತೊಟ್ಟು ಮೊಮ್ಮಕ್ಕಳನ್ನು ನೋಡುವುದಕ್ಕೆಂದೇ ಬಂದಿದ್ದರು...! ಇದು ಯುಕೆ ಮೂಲದ ವೃದ್ಧ ದಂಪತಿಯ ಪ್ರೀತಿಯ ಕತೆ. ಮಾರ್ಚ್‌ನಿಂದ ಈ ಇಬ್ಬರು ತಮ್ಮ ಮೊಮ್ಮಕ್ಕಳನ್ನು ಮುದ್ದಿಸಿರಲಿಲ್ಲ. ಕೊರೊನಾ ಭಯದ ಕಾರಣದಿಂದ ಪ್ರತ್ಯೇಕವಾಸದಲ್ಲಿದ್ದ ಈ ದಂಪತಿ ಅನಿವಾರ್ಯವಾಗಿ ಮನೆಯಿಂದ ಆಚೆಯೇ ಬರುತ್ತಿರಲಿಲ್ಲ. ಆದರೆ, ಸುಮಾರು ಎಪ್ಪತ್ತರ ಹರೆಯದ ಈ ದಂಪತಿ ಮೊಮ್ಮಕ್ಕಳನ್ನು ನೋಡಲೇಬೇಕೆಂಬ ಆಸೆಯಿಂದ ದೊಡ್ಡ ಹಿಮಕರಡಿಯ ವೇಷ ತೊಟ್ಟು ಬಂದು ಪುಟಾಣಿಗಳನ್ನು ಮುದ್ದಾಡಿದ್ದಾರೆ. ಈ ದೃಶ್ಯವೇ ಭಾವನಾತ್ಮಕವಾಗಿದೆ.

Also Read : ಸಮುದ್ರದಲ್ಲಿ ತೇಲುತ್ತಿತ್ತು ಕಾರು...! : ಅಚ್ಚರಿಯ ವಿಡಿಯೋ ವೈರಲ್

ಸದ್ಯ ಈ ಹೃದಯಸ್ಪರ್ಶಿ ಫೋಟೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಎಲ್ಲರೂ ಈ ದೃಶ್ಯ ಕಂಡು ಭಾವುಕರಾಗಿದ್ದಾರೆ. ಅಲ್ಲದೆ, ಅಜ್ಜ ಅಜ್ಜಿಯ ಐಡಿಯಾವನ್ನು ಮೆಚ್ಚಿಕೊಂಡಿದ್ದಾರೆ.