ಒಂದು ಬೆಂಚ್, ಎರಡು ರಾಜ್ಯ! : ಗುಜರಾತ್, ಮಹಾರಾಷ್ಟ್ರದ ಗಡಿ ವಿಭಜಿಸಿದೆ ಈ ರೈಲು ನಿಲ್ದಾಣ!

ಒಂದು ರೈಲು ನಿಲ್ದಾಣ. ಆದರೆ, ಎರಡು ರಾಜ್ಯಕ್ಕೆ ಪಾಲು...! ಒಂದು ಬೆಂಚು. ಅರ್ಧ ಮಹಾರಾಷ್ಟ್ರದ್ದು, ಇನ್ನರ್ಧ ಗುಜರಾತ್‌ನದ್ದು...! ಇದು ಮಹಾರಾಷ್ಟ್ರದ ನಂದುರ್ಬಾರ್ ಜಿಲ್ಲೆಯ ತಾಲ್ಲೂಕು ಪ್ರಧಾನ ಕೇಂದ್ರವಾದ ನವಪುರದ ರೈಲು ನಿಲ್ದಾಣದ ಕತೆ. ಹಲವು ವರ್ಷಗಳಿಂದ ಈ ರಾಜ್ಯ ಜನರ ಗಮನ ಸೆಳೆಯುತ್ತಿದೆ. ಯಾಕೆಂದರೆ, ಈ ರೈಲು ನಿಲ್ದಾಣ ಎರಡು ರಾಜ್ಯಗಳಿಗೆ ಸೇರಿದೆ. ನಿಲ್ದಾಣದ ಒಂದು ಭಾಗ ಮಹಾರಾಷ್ಟ್ರದ ಗಡಿಯೊಳಗಿದ್ದರೆ, ಇನ್ನೊಂದು ಭಾಗ ಗುಜರಾತ್‌ಗೆ ಸೇರಿದೆ. ಹೀಗಾಗಿ, ನಿಲ್ದಾಣವನ್ನು ಹಂಚಿಕೊಳ್ಳುವಾಗ ಒಂದು ಬೆಂಚ್ ಕೂಡಾ ಸರಿಯಾಗಿ ಎರಡು ರಾಜ್ಯದ ಪಾಲಾಗಿದೆ.

Also Read : ಅಬ್ಬಬ್ಬಾ...! ಕಣ್ಣ ರೆಪ್ಪೆ ತೆರೆದು ಮುಚ್ಚುವಷ್ಟರಲ್ಲಿ ಮರವೇರುವ ಯುವಕ

ಒಂದು ಬೆಂಚ್‌ನಲ್ಲಿ ಅರ್ಧ ಭಾಗದಲ್ಲಿ ಮಹಾರಾಷ್ಟ್ರ ಎಂದು ಬರೆದರೆ, ಇನ್ನೊಂದು ಭಾಗದಲ್ಲಿ ಗುಜರಾತ್ ಎಂದು ಬರೆಯಲಾಗಿದೆ. ಈ ಫೋಟೋಗಳು ಆಗಾಗ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಸದ್ಯ ಅನಂತ್ ರೂಪನಗುಡಿ ಎಂಬವರು ಈ ಫೋಟೋವನ್ನು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದು, ಮತ್ತೆ ನವಪುರದ ರೈಲು ನಿಲ್ದಾಣದ ಕತೆ ವೈರಲ್ ಆಗುತ್ತಿದೆ.

Also Read : ರೆಸ್ಟೋರೆಂಟ್ ಮಾಲಿಕರಿಗೆ ತಲಾ 723 ವರ್ಷಗಳ ಜೈಲು ಶಿಕ್ಷೆ...!

ಗಡಿ ವಿಂಗಡನೆಯಿಂದಲೇ ಈ ರೈಲು ನಿಲ್ದಾಣ ಹಲವರ ಗಮನ ಸೆಳೆದಿದೆ. 2018ರಲ್ಲಿ ರೈಲ್ವೇ ಸಚಿವ ಪಿಯೂಷ್ ಗೋಯಲ್ ಕೂಡಾ ಇದೇ ಫೋಟೋವನ್ನು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದರು.

Also Read : ಕಣ್ಣೀರಿಗೆ ಕರಗಿದ ಚೋರ: ದೋಚಿದ್ದ ವಸ್ತು ಮರಳಿ ಕೊಟ್ಟು ಹೋದ ದರೋಡೆಕೋರರು


ಈ ರೈಲು ನಿಲ್ದಾಣದಲ್ಲಿ ಅನೇಕ ವಿಶೇಷತೆಗಳಿವೆ. ಈ ನಿಲ್ದಾಣ 800 ಮೀಟರ್ ಉದ್ದವಿದ್ದು, ಗುಜರಾತ್‌ನಲ್ಲಿ 500 ಮೀಟರ್ ಇದ್ದರೆ ಉಳಿದ 300 ಮೀಟರ್ ಮಹಾರಾಷ್ಟ್ರದಲ್ಲಿದೆ. ನಿಲ್ದಾಣದಲ್ಲಿ ಪ್ರಕಟಣೆಗಳನ್ನು ಇಂಗ್ಲಿಷ್, ಹಿಂದಿ, ಮರಾಠಿ ಮತ್ತು ಗುಜರಾತಿ ಭಾಷೆಗಳಲ್ಲಿ ಮಾಡಲಾಗುತ್ತಿದೆ. ಅದೂ ಅಲ್ಲದೆ, ನವಪುರ ರೈಲ್ವೆ ನಿಲ್ದಾಣದಲ್ಲಿನ ಟಿಕೆಟ್ ಕೌಂಟರ್ ಮತ್ತು ಪೊಲೀಸ್ ಠಾಣೆ ಮಹಾರಾಷ್ಟ್ರದ ನಂದುರ್ಬಾರ್ ಜಿಲ್ಲೆಯಲ್ಲಿದ್ದರೆ, ಸ್ಟೇಷನ್ ಮಾಸ್ಟರ್ಸ್ ಆಫೀಸ್, ವೇಟಿಂಗ್ ರೂಮ್ ಗುಜರಾತ್‌ನ ಟ್ಯಾಪಿ ಜಿಲ್ಲೆಯಲ್ಲಿದೆ...! ಇನ್ನೊಂದು ವಿಶೇಷತೆ ಏನೆಂದರೆ, ಗುಜರಾತ್‌ನಲ್ಲಿ ಮದ್ಯಪಾನವನ್ನು ನಿಷೇಧಿಸಲಾಗಿದೆ ಮತ್ತು ಮಹಾರಾಷ್ಟ್ರದಲ್ಲಿ ಪಾನ್ ಮಸಾಲಾ ಮತ್ತು ಗುಟ್ಕಾವನ್ನು ನಿಷೇಧಿಸಲಾಗಿದೆ.

ಈ ನಿಲ್ದಾಣ ತನ್ನ ಈ ವಿಶೇಷತೆಯಿಂದಲೇ ಹಲವು ವರ್ಷಗಳಿಂದ ಜನ ಗಮನ ಸೆಳೆಯುತ್ತಿದೆ. ಇಲ್ಲಿಗೆ ಬರುವ ಪ್ರಯಾಣಿಕರು ಈ ಗಡಿ ಗುರುತಿನ ಎದುರು ಫೋಟೋ ಕ್ಲಿಕ್ಕಿಸಿಕೊಂಡು ಖುಷಿಪಡುತ್ತಾರೆ.