`ನಮನ ವೀರರೇ... ಎಂದೂ ಮರೆಯಲ್ಲ ನಿಮ್ಮ ತ್ಯಾಗ, ಬಲಿದಾನ'

ಫೆಬ್ರವರಿ 14... ಭಾರತದ ಪಾಲಿಗೆ ಎಂದೂ ಮರೆಯಲಾಗದ, ಪದೇ ಪದೇ ಘೋರ ನೆನಪಾಗಿ ಕಾಡುವ ದಿನ... ಯಾಕೆಂದರೆ, ಸರಿಯಾಗಿ ಒಂದು ವರ್ಷದ ಹಿಂದೆ ಇಡೀ ಭಾರತವೇ ಬೆಚ್ಚಿಬೀಳುವ ಘಟನೆಯೊಂದು ನಡೆದಿತ್ತು. ಅಂದು ರಕ್ತಪಿಪಾಸು ಜೈಶ್-ಎ-ಮೊಹಮ್ಮದ್ ಉಗ್ರರ ದಾಳಿಗೆ ಪುಲ್ವಾಮಾದಲ್ಲಿ ನಮ್ಮ 40ಕ್ಕೂ ಅಧಿಕ ವೀರ ಯೋಧರು ಹುತಾತ್ಮರಾಗಿದ್ದರು.

ಅಂದಿನ ಭೀಕರ ಘಟನೆ ಇಂದಿಗೂ ಕಣ್ಣಿಗೆ ಕಟ್ಟಿದಂತಿದೆ. ಯೋಧರ ತ್ಯಾಗ, ಕುಟುಂಬದ ಕಣ್ಣೀರಿನ ದೃಶ್ಯವನ್ನು ನೆನೆದಾಗ ಹೃದಯ ಭಾರವಾಗುತ್ತದೆ. ನಮಗೇ ಗೊತ್ತಿಲ್ಲದಂತೆ ಕಣ್ಣೀರ ಹನಿ ಕೆನ್ನೆ ಸವರಿ ಜಾರಿರುತ್ತದೆ. ಅಷ್ಟು ಭೀಕರವಾಗಿತ್ತು ಅಂದಿನ ದೃಶ್ಯ... ಅಂದಿನ ಘಟನೆಯನ್ನು ಯಾರೂ ಮರೆಯಲು ಸಾಧ್ಯವೇ ಇಲ್ಲ. ಹೀಗಾಗಿ, ನೆಟ್ಟಿಗರು ಇಂದು ವೀರ ಯೋಧರ ತ್ಯಾಗ ಬಲಿದಾನವನ್ನು ಸ್ಮರಿಸುತ್ತಿದ್ದಾರೆ.


* ನಿಮ್ಮ ತ್ಯಾಗವನ್ನು ಮರೆಯಲು ಸಾಧ್ಯವಿಲ್ಲ... ನಮ್ಮ ಹೃದಯದಲ್ಲಿ ನಿಮ್ಮ ನೆನಪು ಸದಾ ಶಾಶ್ವತ... ಕೆಚ್ಚೆದೆಯ ವೀರರಿಗೆ ನಮ್ಮ ನಮನ...

* ನಮಗಾಗಿ ಕಷ್ಟಪಟ್ಟಿರಿ... ನಮಗಾಗಿ ಹೋರಾಡಿದಿರಿ... ಓ... ಯೋಧರೆ, ನೀವು ಎಂದೆಂದಿಗೂ ಅಜರಾಮರ...

* ನಾವು ನೆಮ್ಮದಿಯಿಂದ ಸುರಕ್ಷಿತವಾಗಿ ಇದ್ದೇವೆ ಎಂದರೆ ಅದಕ್ಕೆ ಕಾರಣ ಗಡಿಯಲ್ಲಿ ನಮಗಾಗಿ ಕಷ್ಟಪಡುವ ಯೋಧರು. ಬಿಸಿಲು, ಮಳೆ, ಚಳಿ ಎನ್ನದೆ ಸದಾ ಕಾಲ ದೇಶಕ್ಕಾಗಿ ದುಡಿಯುವ ಈ ತ್ಯಾಗಮಯಿ ಯೋಧರನ್ನು ಎಷ್ಟು ಸ್ಮರಿಸಿದರೂ ಅದು ಕಡಿಮೆಯೇ.


ನಿಜ, ಯೋಧರನ್ನು ಎಷ್ಟು ನೆನೆದರೂ ಅದು ಕಡಿಮೆಯೇ.. ತಮ್ಮ ಮನೆಯವರು, ಪ್ರೀತಿಪಾತ್ರರನ್ನು ಬಿಟ್ಟು ದೂರದಲ್ಲೆಲ್ಲೋ ಗಡಿಯಲ್ಲಿ ಇವರು ನಮಗಾಗಿ ಹೋರಾಡುತ್ತಿರುತ್ತಾರೆ. ಹೀಗಾಗಿ, ನಾವೆಲ್ಲಾ ದೇಶವಾಸಿಗಳು ನೆಮ್ಮದಿಯಿಂದ ಬದುಕು ಕಾಣುತ್ತಿದ್ದೇವೆ...