ಮೊಮ್ಮಗಳೊಂದಿಗೆ ಅಜ್ಜನ ಭರ್ಜರಿ ಸ್ಟೆಪ್ಸ್‌ : ಇದು ಮನಸೆಳೆಯುವ ವಿಡಿಯೋ

ಕೊರೊನಾ ವೈರಸ್ ಕಾಟ ಎಲ್ಲರನ್ನೂ ಮನೆಯೊಳಗೆ ಮುದುಡಿ ಕುಳಿತುಕೊಳ್ಳುವಂತೆ ಮಾಡಿದೆ. ರಕ್ಕಸ ವೈರಸ್ ಹರಡುವುದನ್ನು ತಡೆಯಲು ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದೊಂದೇ ಪರಿಹಾರವಾಗಿದೆ. ಹೀಗಾಗಿ, ಬಹುತೇಕರು ಮನೆಯಿಂದ ಹೊರಬರಲು ಹೆದರುತ್ತಿದ್ದಾರೆ. ಪರಿಣಾಮ, ಕೆಲವರಿಗೆ `ಬೋರ್' ಹೊಡೆಯಲು ಶುರುವಾಗಿದೆ. ಆದರೆ, ಸದ್ಯ ಇರುವ ಪರಿಸ್ಥಿತಿಯಲ್ಲೇ ಖುಷಿಯಾಗಿ ಹೇಗೆ ಕಾಲ ಕಳೆಯಬಹುದು ಎಂಬುದಕ್ಕೆ ಈ ಅಜ್ಜ ಮೊಮ್ಮಗಳು ಸಾಕ್ಷಿಯಾಗಿದ್ದಾರೆ.

Also Read : ಬರ್ತ್‌ಡೇ ದಿನ ಬಾಲಕಿಯ ಮುಖದಲ್ಲಿ ನಗುವರಳಿಸಿದ ಪೊಲೀಸರು


ನೋಡಿದಿರಲ್ಲಾ ಇವರೆಷ್ಟು ಉಲ್ಲಸಿತರಾಗಿದ್ದಾರೆಂದು... ಸಾಮಾಜಿಕ ಅಂತರವನ್ನೂ ಕಾಯ್ದುಕೊಳ್ಳಬೇಕು, ತಮ್ಮ ದಿನವೂ ಖುಷಿಯಿಂದ ಸಾಗಬೇಕು ಎಂಬ ಉದ್ದೇಶದಿಂದ ಇವರಿಬ್ಬರು ಸ್ವಚ್ಛಂದ ಪರಿಸರದಲ್ಲಿ ಕುಣಿದಿದ್ದಾರೆ. ಇದೇ ಕಾರಣಕ್ಕೆ ಈ ವಿಡಿಯೋ ಈಗ ನೆಟ್ಟಿಗರ ಗಮನ ಸೆಳೆದಿದೆ.

Also Read : ಒಂದ್ಕಡೆಯಿಂದ ಇನ್ನೊಂದೆಡೆಗೆ ಓಡಾಡುತ್ತಿದೆ ಪೊದೆ...! ಇದು ಮ್ಯಾಜಿಕ್ ಅಲ್ಲ...!

ಇದು ಟೆನ್ನೆಸ್ಸೀಯ ನ್ಯಾಶ್ವಿಲ್ಲೆಯಲ್ಲಿ ಸೆರೆಯಾದ ದೃಶ್ಯ. ಪುಟಾಣಿ ಮೊಮ್ಮಗಳು ಕುಣಿಯುತ್ತಿದ್ದರೆ, ಅಜ್ಜನೂ ಇದಕ್ಕೆ ಹೆಜ್ಜೆ ಸೇರಿಸಿದ್ದರು. ತನ್ನ ತಂದೆ ಮರ್ವೀನ್ ನೀಲಿ ಮತ್ತು ಆರು ವರ್ಷದ ಮಗಳು ಖೈರಾರ ಈ ಖುಷಿಯ ದೃಶ್ಯವನ್ನು ಶೆರ್ರಿ ನೀಲಿ ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಇಲ್ಲಿ ಪುಟಾಣಿ ಕುಣಿಯುವುದರ ಜೊತೆಗೆ ಮರ್ವೀನ್ ಅವರ ಡಾನ್ಸ್‌, ಉತ್ಸಾಹ ನಿಜಕ್ಕೂ ಇಷ್ಟವಾಗುತ್ತದೆ ಮತ್ತು ಅಚ್ಚರಿ ಮೂಡಿಸುತ್ತದೆ. ಯಾಕೆಂದರೆ ಮುಂದಿನ ತಿಂಗಳು 81ನೇ ವರ್ಷಕ್ಕೆ ಕಾಲಿಡುತ್ತಿರುವ ಮರ್ವೀನ್ ಇಲ್ಲಿ ಮೈಕಲ್ ಜಾಕ್ಸನ್ ರೀತಿಯೇ ಹೆಜ್ಜೆ ಹಾಕಿ ಖುಷಿಪಟ್ಟಿದ್ದಾರೆ ಮತ್ತು ಖುಷಿಕೊಟ್ಟಿದ್ದಾರೆ. ಜೊತೆಗೆ, ತನ್ನಂತೆ ಅಜ್ಜ ಕೂಡಾ ಹೆಜ್ಜೆ ಹಾಕುವುದನ್ನು ಕಂಡು ಖೈರಾ ಕೂಡಾ ಖುಷಿಯಿಂದ ಕುಣಿದಾಡಿದ್ದಾಳೆ.

ಖೈರಾ ಸದಾ ಅಜ್ಜನೊಂದಿಗೇ ಕಾಲ ಕಳೆಯಲು ಇಷ್ಟಪಡುತ್ತಾಳಂತೆ. ಆದರೆ, ಕೊರೊನಾ ವೈರಸ್ ಭಯದಲ್ಲಿ ಇವರಿಗೆ ಒಟ್ಟಿಗೆ ಆಟ ಆಡಲು ಸಾಧ್ಯವಾಗುತ್ತಿಲ್ಲ. ಈ ಕೊರಗು ನೀಗಿಸಲು ಈ ಅಜ್ಜ ಮೊಮ್ಮಗಳು ಈ ರೀತಿ ಕುಣಿದು ಖುಷಿಪಡುತ್ತಿದ್ದಾರೆ. ಈ ಮೂಲಕ ಮಗುವಿಗೆ ಆಟ ಆಡಿದಂತೆಯೂ ಆಗುತ್ತದೆ, ಮರ್ವೀನ್ ಅವರಿಗೆ ವ್ಯಾಯಾಮ ಮಾಡಿದಂತೆಯೂ ಆಗುತ್ತದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದ್ದು, ಎಲ್ಲರೂ ಇವರಿಬ್ಬರ ಉತ್ಸಾಹವನ್ನು ಕೊಂಡಾಡಿದ್ದಾರೆ.

Also Read : ಸಮೋಸ ಬೇಕೆಂದು ಕಂಟ್ರೋಲ್‌ ರೂಮ್‌ಗೆ ಪದೇ ಪದೇ ಕರೆ : ಮುಂದೇನಾಯ್ತು ಗೊತ್ತಾ?

ವಿಶ್ವ ಆರೋಗ್ಯ ಸಂಸ್ಥೆಯ ಮಾರ್ಗಸೂಚಿ ಪ್ರಕಾರ ಕೊರೊನಾ ವೈರಸ್ ನಿಯಂತ್ರಣಕ್ಕೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು ಅತ್ಯಗತ್ಯ. ವ್ಯಕ್ತಿ ವ್ಯಕ್ತಿಗಳ ನಡುವೆ ಕನಿಷ್ಠ 3 ಅಡಿ ಅಂತರವನ್ನು ಕಾಯ್ದುಕೊಳ್ಳುವುದರಿಂದ ಈ ವೈರಸ್ ಸೋಂಕು ತಗುಲುವುದರಿಂದ ಪಾರಾಗುವ ಅವಕಾಶವಿದೆ. ಯಾಕೆಂದರೆ, ಈ ವೈರಸ್ ದೇಹದ ದ್ರವದ ಮೂಲಕ ಒಬ್ಬರಿಂದ ಒಬ್ಬರಿಗೆ ಹರಡುತ್ತದೆ. ಯಾರಾದರೂ ಕೆಮ್ಮಿದಾಗ ಅಥವಾ ಸೀನಿದಾಗ ಮೂಗು ಮತ್ತು ಬಾಯಿಯಿಂದ ದ್ರವದ ಹನಿ ಹೊರಬೀಳುತ್ತದೆ. ಒಂದೊಮ್ಮೆ ಹತ್ತಿರದಲ್ಲಿ ಬಂದು ಕೆಮ್ಮಿದವರು ಕೊರೊನಾ ಸೋಂಕಿತರಾದರೆ ಆ ವೈರಸ್ ಮತ್ತೊಬ್ಬರ ಕೈಯ ಮೂಲಕ ದೇಹ ಪ್ರವೇಶಿಸುವ ಸಾಧ್ಯತೆಗಳು ಹೆಚ್ಚಿರುತ್ತದೆ. ಇದೇ ಕಾರಣಕ್ಕೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು ಇಂದಿನ ತುರ್ತು ಅಗತ್ಯಗಳಲ್ಲಿ ಒಂದಾಗಿದೆ.