ಐಪ್ಯಾಡ್, ಸ್ನ್ಯಾಕ್ಸ್‌ನೊಂದಿಗೆ `ರಹಸ್ಯ ತಾಣ'ದಲ್ಲಿ ಕುಳಿತಿದ್ದ 2 ವರ್ಷದ ಮಗನನ್ನು ಕಂಡುಹಿಡಿದ ತಾಯಿ!

ಪುಟ್ಟ ಮಕ್ಕಳ ಆಟ ತುಂಟಾಟ ನೋಡುವುದೇ ಒಂದು ಖುಷಿ. ಚಿಣ್ಣರು ಏನು ಮಾಡಿದರೂ ಅದನ್ನು ಕಣ್ತುಂಬಿಕೊಳ್ಳುವುದೇ ಒಂದು ಸಡಗರ. ಕೆಲವೊಮ್ಮೆ ಪುಟಾಣಿಗಳು ತಮ್ಮ ಇಂತಹ ತುಂಟಾಟದಿಂದಲೇ ಚಕಿತಗೊಳಿಸುವುದಲ್ಲದೆ, ಎಲ್ಲರನ್ನೂ ನಗೆಗಡಲಲ್ಲಿ ತೇಲುವಂತೆ ಮಾಡುತ್ತಾರೆ. ಇಂತಹ ಸಾಕಷ್ಟು ವಿಡಿಯೋಗಳು ಸೋಶಿಯಲ್ ಮೀಡಿಯಾದಲ್ಲಿ ಸದಾ ವೈರಲ್ ಆಗುತ್ತಿರುತ್ತವೆ. ಇದು ಕೂಡಾ ಅಂತಹದ್ದೇ ಒಂದು ಖುಷಿಯ ವಿಡಿಯೋ.

ಮಕ್ಕಳಿಗೆ ಮೊಬೈಲ್ ಫೋನ್, ಐಪ್ಯಾಡ್‌ ಎಂದರೆ ಸಹಜ ಕುತೂಹಲ. ಕೆಲ ಮಕ್ಕಳಂತೂ ಇವುಗಳ ದಾಸರಾಗಿ ಹೋಗಿರುತ್ತಾರೆ. ಊಟ ಮಾಡುವುದಕ್ಕೂ ಮೊಬೈಲ್ ಫೋನ್‌ಗೆ ಮಕ್ಕಳು ರಚ್ಚೆ ಹಿಡಿಯುವಂತಹ ಕಾಲವಿದು. ಕೆಲವೊಂದು ಸಲ ಪುಟಾಣಿಗಳು ಹೆತ್ತವರಿಗೆ ಗೊತ್ತಿಲ್ಲದೆ ಈ ಮೊಬೈಲ್ ಫೋನ್, ಐಪ್ಯಾಡ್‌ಗಳನ್ನು ನೋಡುವುದು ಕೂಡಾ ಇದೆ. ಆದರೆ, ಈ ವೇಳೆ ಪುಟಾಣಿಗಳು ಹೆತ್ತವರ ಕೈಗೆ ಸಿಕ್ಕಿಬಿದ್ದಾಗ ಅವರು ತೋರುವ ಪ್ರತಿಕ್ರಿಯೆ ಏರಿದ್ದ ಕೋಪವನ್ನೆಲ್ಲಾ ಇಳಿಸಿ ಬಿಡುತ್ತದೆ. ಅದಕ್ಕೆ ಈ ದೃಶ್ಯನೇ ಸಾಕ್ಷಿ.

Also Read : `ಪ್ಲೀಸ್, ಇವನನ್ನು ಮನೆಗೆ ಕರೆದೊಯ್ದು ಸಾಕಿ' : ಶ್ವಾನದ ಪಕ್ಕದಲ್ಲಿತ್ತು ಬಾಲಕ ಬರೆದಿದ್ದ ಭಾವನಾತ್ಮಕ ಪತ್ರ!

ಈ ಎರಡು ವರ್ಷದ ಪುಟಾಣಿ ಮನೆಯಲ್ಲಿದ್ದ ಐಪ್ಯಾಡ್ ಹಿಡಿದುಕೊಂಡು ಒಂದಷ್ಟು ಸ್ನ್ಯಾಕ್ಸ್‌ ಜೊತೆಗೆ ತನ್ನ `ರಹಸ್ಯ ತಾಣ'ಕ್ಕೆ ಹೋಗಿದ್ದ. ಈ ರಹಸ್ಯ ತಾಣವನ್ನು ಅಮ್ಮ ಹುಡುಕಿದ್ದರು...! ಇಷ್ಟಕ್ಕೂ ಈ `ರಹಸ್ಯ ಸ್ಥಳ' ಯಾವುದು ಗೊತ್ತಾ...? ಅಡುಗೆ ಕೋಣೆಯ ಕ್ಯಾಬಿನೆಟ್...! ಅಡುಗೆ ಕೋಣೆಯ ಸಣ್ಣ ಕಪಾಟಿನ ಒಳಗೆ ಕುಳಿತು ಐಪ್ಯಾಡ್ ನೋಡುತ್ತಾ ಈ ಪುಟಾಣಿ ಸ್ನ್ಯಾಕ್ಸ್‌ ಸವಿಯುತ್ತಿದ್ದ.


Also Read : ಮುದ್ದಾದ ಶ್ವಾನದೊಂದಿಗೆ ತುಂಟ ಮರಿಯಾನೆಯ ಫ್ರೆಂಡ್‌ಶಿಪ್ : ಅದ್ಭುತವಾಗಿದೆ ಆಟ

ನೋವಾ ಅಲೆಕ್ಸಾಂಡರ್ ವಾಕರ್ಸ್‌ ಎಂಬ ಪುಟಾಣಿಯ ವೈಯಕ್ತಿಕ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಈ ವಿಡಿಯೋವನ್ನು ಅಪ್ಲೋಡ್ ಮಾಡಲಾಗಿದೆ. ಮಗುವಿನ ತಾಯಿ ಸೆರೆ ಹಿಡಿದ ದೃಶ್ಯವಿದು. ತಮ್ಮ ಮನೆಯ ಅಡುಗೆ ಕೋಣೆಯ ಕಪಾಟಿನ ಕಡೆಗೆ ಮಗುವಿನ ಹೆಸರು ಕರೆಯುತ್ತಾ ನಡೆದುಕೊಂಡು ಹೋಗುತ್ತಾ ಈ ಮಹಿಳೆ ಈ ದೃಶ್ಯವನ್ನು ಸೆರೆ ಹಿಡಿಯುತ್ತಿದ್ದರು. ಹೀಗೆ ಬಂದವರು ಈ ಕ್ಯಾಬಿನೆಟ್ ಬಾಗಿಲನ್ನು ತೆರೆಯುತ್ತಾರೆ. ಆಗ ಐಪ್ಯಾಡ್ ನೋಡುತ್ತಾ ಸ್ನ್ಯಾಕ್ಸ್‌ ತಿನ್ನುತ್ತಿದ್ದ ಅಲೆಕ್ಸಾಂಡರ್ `ಅಯ್ಯೋ ಸಿಕ್ಕಿಬಿದ್ದೆನಲ್ವಾ...?' ಎಂಬಂತೆ ಪ್ರತಿಕ್ರಿಯೆ ತೋರಿದ್ದಾನೆ. ಅದು ಅಲ್ಲದೆ, `ನಿನಗೆ ತೊಂದರೆಯಾಯಿತೇ' ಎಂದು ಕೇಳಿದಾಗ ಮಗು `ಹೌದು' ಎಂಬಂತೆ ಉತ್ತರ ಕೊಡುವುದು ಎಲ್ಲರಲ್ಲೂ ನಗುವರಳಿಸಿದೆ.

Also Read : `ಮೃತಪಟ್ಟಿದ್ದಾರೆ' ಎಂದು ತಿಳಿದುಕೊಂಡಿದ್ದ ವ್ಯಕ್ತಿ ಅಂತ್ಯಕ್ರಿಯೆಯ ವೇಳೆ ಎದ್ದು ಕುಳಿತಿದ್ದರು...!

ಸದ್ಯ ಈ ವಿಡಿಯೋವನ್ನು ಸಾಕಷ್ಟು ಜನ ನೋಡಿದ್ದಾರೆ. ಮಗುವಿನ ತಾಯಿಯಂತೆಯೇ ನೆಟ್ಟಿಗರು ಕೂಡಾ ಈ ಪುಟಾಣಿಯ ತುಂಟಾಟ ಕಂಡು ಖುಷಿಪಟ್ಟಿದ್ದಾರೆ.