ರಾಜಕಾಲುವೆಗೆ ಬಿದ್ದಿದ್ದ ಮರಿಯ ರಕ್ಷಣೆ: ಈ ತಾಯಿಯ `ಪಾಠ'ಕ್ಕೆ ಬೆರಗಾಗದೆ ಇರಲು ಸಾಧ್ಯವೇ ಇಲ್ಲ!

ಅಮ್ಮ ಎಂದರೆ ದೇವರು... ಅಮ್ಮ ಎಂದರೆ ಜಗತ್ತು... ಅಮ್ಮನೇ ಗುರು... ಅಮ್ಮನೇ ಬಾಳು... ಅಮ್ಮ ಇಲ್ಲದೆ ಏನೂ ಇಲ್ಲ. ಅಮ್ಮ ಎಂಬುದು ಬರೀ ಪದವಲ್ಲ, ಬದುಕು. ಅಮ್ಮನ ಪ್ರೀತಿ ಎಂತಹದ್ದು ಎಂಬುದು ಎಲ್ಲರಿಗೂ ಗೊತ್ತಿದೆ. ಅಮ್ಮನ ಪ್ರೀತಿಗೆ ಸರಿಸಮ ಈ ಜಗತ್ತಿನಲ್ಲಿ ಯಾವುದೂ ಇಲ್ಲ.

ಮಾತೃಪ್ರೇಮ ಎಂಬುದು ಅದ್ಭುತ ಅನುಭವ. ಬರೀ ಮನುಷ್ಯರಷ್ಟೇ ಅಲ್ಲ, ಈ ಜಗತ್ತಿನ ಪ್ರತಿಯೊಂದು ಜೀವಿಗಳಲ್ಲೂ ನಾವು ಮಾತೃಪ್ರೇಮವನ್ನು ಕಾಣಬಹುದು. ಪ್ರಾಣಿಗಳೂ ತಮ್ಮ ಮರಿಗಳನ್ನು ಮನುಷ್ಯರಷ್ಟೇ ಪ್ರೀತಿಯಿಂದ, ಜಾಗರೂಕತೆಯಿಂದ ಆರೈಕೆ ಮಾಡುತ್ತವೆ. ಒಂದೊಮ್ಮೆ ಮರಿಗಳು ಕಷ್ಟದಲ್ಲಿದ್ದರೆ ಮನುಷ್ಯರು ರೋದಿಸಿದಂತೆಯೇ ರೋದಿಸುತ್ತವೆ. ಈ ರೀತಿಯ ಅನೇಕ ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿವೆ ಮತ್ತು ಇಂತಹ ವಿಡಿಯೋಗಳು ಎಲ್ಲರನ್ನೂ ಭಾವುಕರನ್ನಾಗಿಸಿದ್ದೂ ಇದೆ. ಸದ್ಯ ಇಂತಹದ್ದೇ ಮತ್ತೊಂದು ವಿಡಿಯೋ ಈಗ ಸೋಶಿಯಲ್ ಮೀಡಿಯಾದಲ್ಲಿ ಎಲ್ಲರ ಗಮನ ಸೆಳೆಯುತ್ತಿದೆ.

Also Read : ಹೃದಯಸ್ಪರ್ಶಿ ನಡೆ: ತನ್ನ ಗದ್ದೆಯ ಅಕ್ಕಿಯನ್ನು ವೈದ್ಯರಿಗೆ ನೀಡಿ ಕೃತಜ್ಞತೆ ಸಲ್ಲಿಸಿದ ಕೊರೊನಾ ಮುಕ್ತ ವೃದ್ಧ

ಇದು ತಾಯಿಯ ಮಮತೆಯ ದೃಶ್ಯವೂ ಹೌದು, ಸಂಕಷ್ಟದಲ್ಲಿದ್ದಾಗ ಹೇಗೆ ಪಾರಾಗಬೇಕು ಎಂದು ಅಮ್ಮ ತನ್ನ ಕಂದನಿಗೆ ಕಲಿಸುವ ಪಾಠವೂ ಹೌದು. ಎಲ್ಲರಿಗೂ ಗೊತ್ತಿರುವಂತೆ ಅಮ್ಮನೇ ಎಲ್ಲರಿಗೂ ಮೊದಲ ಗುರು. ಇದು ಬರೀ ಮನುಷ್ಯರಿಗಷ್ಟೇ ಅನ್ವಯವಾಗುವುದಲ್ಲ. ಪ್ರಾಣಿಗಳಲ್ಲೂ ನಾವು ಇಂತಹ ಗುಣವನ್ನು ಕಾಣಬಹುದು. ಅದಕ್ಕೆ ಸಾಕ್ಷಿ ಈ ವಿಡಿಯೋ.

Also Read : ಹೆಬ್ಬಾವನ್ನೇ ಫೇಸ್‌ಮಾಸ್ಕ್‌ ರೀತಿ ಸುತ್ತಿಕೊಂಡು ಬಸ್‌ನಲ್ಲಿ ಪ್ರಯಾಣಿಸಿದ ವ್ಯಕ್ತಿ...!

ಆ ರಕೂನ್ ಮರಿ ದೊಡ್ಡ ರಾಜಕಾಲುವೆಗೆ ಬಿದ್ದಿತ್ತು. ತಾಯಿ ಮತ್ತು ಇನ್ನೊಂದು ಮರಿ ಮೇಲೆ ಇದ್ದರೆ ಈ ಮರಿಗೆ ನೀರಿನಿಂದ ಮೇಲೆ ಬರಲು ಆಗುತ್ತಿರಲಿಲ್ಲ. ಈ ವೇಳೆ, ಕಂದನ ಸ್ಥಿತಿ ಕಂಡು ತಾಯಿ ರಕೂನ್ ಮರುಗಿತ್ತು. ಹೇಗಾದರೂ ಮಾಡಿ ಕಂದನನ್ನು ಸಂಕಷ್ಟದಿಂದ ಪಾರುಮಾಡಲೇಬೇಕು ಎಂದು ಪಣತೊಟ್ಟಿದ್ದ ರಕೂನ್ ಸಾಕಷ್ಟು ಬಾರಿ ರಾಜಕಾಲುವೆಗೆ ಇಳಿಯಲು ಅಳವಡಿಸಿದ್ದ ಕಬ್ಬಿಣದ ಹಿಡಿಗಳಿಂದ ಕೆಳಗೆ ಇಳಿದು ಮೇಲೆ ಹತ್ತಿತ್ತು. ಅಂದರೆ, ಈ ತಾಯಿ ರಕೂನ್ `ಹೀಗೆ ಮೇಲೆ ಬರಬೇಕು' ಎಂದು ತನ್ನ ಕಂದನಿಗೆ ಹೇಳಿ ಕೊಡುತ್ತಿತ್ತು. ಈ ಮರಿಯೂ ಸಾಕಷ್ಟು ಸಲ ಪ್ರಯತ್ನಿಸಿತ್ತು. ಆದರೆ, ಸಾಧ್ಯವಾಗಿರಲಿಲ್ಲ. ಹಾಗಂತ, ತಾಯಿ ತನ್ನ ಪ್ರಯತ್ನವನ್ನು ಬಿಡಲಿಲ್ಲ. ಹೀಗೆ ಸಾಕಷ್ಟು ಸಲ ಮೇಲೆ, ಕೆಳಗೆ ಸಾಗಿದ ಬಳಿಕ ಅಂತಿಮವಾಗಿ ಮರಿ ಗಟ್ಟಿಯಾಗಿ ಹಿಡಿದು ಒಂದು ಹಂತ ಮೇಲೆ ಬಂದಿತ್ತು. ಈ ವೇಳೆ, ಓಡಿದ ತಾಯಿ ರಕೂನ್ ಮರಿಯನ್ನು ಬಲವಾಗಿ ಹಿಡಿದು ಮೇಲೆ ಬರಲು ಅನುವು ಮಾಡಿಕೊಟ್ಟಿತ್ತು. ಈ ದೃಶ್ಯವೇ ಅಪೂರ್ವವಾಗಿದೆ.


Also Read : ನೀರಿನ ಕ್ಯಾನ್‌ನೊಳಗೆ ಕೈ ಹಾಕಿ ನೋವಾದಂತೆ ಕಂದನ ನಟನೆ! : ವ್ಹಾವ್... ಸೂಪರ್ ದೃಶ್ಯವಿದು

ವೈರ್ಲ್ಡ್‌ ಚಾರ್ಲ್ಸ್‌ ಎಂಬ ಫೇಸ್‌ಬುಕ್ ಪುಟದಲ್ಲಿ ಈ ವಿಡಿಯೋ ಅಪ್ಲೋಡ್ ಆಗಿದೆ. ರಕೂನ್ ಅಮೇರಿಕಾದಲ್ಲಿ ಹೆಚ್ಚಾಗಿ ಕಾಣಸಿಗುವ ನಿಶಾಚರ ಪ್ರಾಣಿ. ಇದು ಮಾಂಸಹಾರಿ ಪ್ರಾಣಿಯೂ ಹೌದು. ಸದ್ಯ ಈ ರಕೂನ್‌ನ ಈ ವಿಡಿಯೋ ಎಲ್ಲರ ಗಮನ ಸೆಳೆದಿದೆ. ಎಲ್ಲರೂ ಈ ತಾಯಿಯ ಚಡಪಡಿಕೆಗೆ ಮರುಗಿದರೆ, ಕಂದನಿಗೆ ಸಂಕಷ್ಟದಿಂದ ಪಾರಾಗುವ ಬಗ್ಗೆ ಹೇಳಿಕೊಟ್ಟ ರೀತಿಯನ್ನು ಕೊಂಡಾಡಿದ್ದಾರೆ. ನಿಜಕ್ಕೂ ಇದೊಂದು ಹೃದಯಸ್ಪರ್ಶಿ ದೃಶ್ಯ. ಅಮ್ಮನ ಪ್ರೀತಿಯೆಷ್ಟು ಮಧುರ ಎಂಬುದಕ್ಕೂ ಸಾಕ್ಷಿ.