ಕಡೆಯ ಭೇಟಿ...!
| Representative image | Image by skeeze from Pixabay
ತಾಯಿಯ ಪ್ರೀತಿ ಎಂದರೆ ಬೆಲೆ ಕಟ್ಟಲಾಗದ್ದು. ಅದು ಮನುಷ್ಯರ ವಿಷಯವಾಗಲಿ ಅಥವಾ ಪ್ರಾಣಿಗಳ ವಿಷಯದಲ್ಲಾಗಲಿ ತಾಯಿ ಪ್ರೀತಿಗೆ ಅದರದ್ದೇ ಆದ ಮಹತ್ವವಿದೆ. ಕರುಳಬಳ್ಳಿಗಳ ಯೋಗಕ್ಷೇಮವೇ ತಾಯಿಯ ಜೀವನ. ತಾನು ಕಷ್ಟಪಟ್ಟರೂ ಮಕ್ಕಳು ಖುಷಿಯಾಗಿರಬೇಕು ಎಂದು ಬಯಸುವವಳು ತಾಯಿ. ನಿಸ್ವಾರ್ಥ ಪ್ರೀತಿಗೂ ತಾಯಿಯೇ ಸಾಕ್ಷಿ... ಆದರೆ, ಪ್ರಾಣಿಗಳ ವಿಷಯದಲ್ಲಿ ಈ ಪ್ರೀತಿಯಲ್ಲಿ ಬೇರೆ ಬೇರೆ ವಿಧಗಳಿರುತ್ತವೆ. ಅದಕ್ಕೆ ಇದು ಸ್ಪಷ್ಟ ಉದಾಹರಣೆ. ಇಲ್ಲಿ ತಾಯಿ ಹುಲಿ ತನ್ನ ಮರಿಗಳನ್ನು ಸ್ವತಃ ತಾನೇ ದೂರ ಮಾಡುತ್ತಿದೆ. ಹತ್ತಿರಕ್ಕೂ ಬರದಂತೆ ನೋಡುತ್ತಿದೆ. ಇಷ್ಟು ವರ್ಷ ಪ್ರೀತಿಯಿಂದ, ಜಾಗರೂಕತೆಯಿಂದ ಸಲಹುತ್ತಿದ್ದ ಈ ತಾಯಿಯೇ ಈಗ ಮರಿಗಳನ್ನು ಸ್ವತಂತ್ರವಾಗಿ ಜೀವನ ನಡೆಸಲು ಬೈದು ಕಳಿಸುವಂತಿದೆ ಈ ದೃಶ್ಯ. ಈ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಇದನ್ನು ಭಾರತೀಯ ಅರಣ್ಯ ಸೇವೆಗಳ ಅಧಿಕಾರಿ ಸುಸಂತ ನಂದ ಟ್ವಿಟ್ಟರಿನಲ್ಲಿ ಹಂಚಿಕೊಂಡಿದ್ದಾರೆ.
Twitter-Susanta Nanda IFS
ಮರಿಗಳು ಇನ್ನು ಸ್ವತಂತ್ರ...
| Representative image | Image by Gerhard Gellinger from Pixabay.jpg
ಈ ವಿಡಿಯೋದಲ್ಲಿ ತಾಯಿ ಹುಲಿ ತನ್ನ ಎರಡು ಗಂಡು ಮರಿಗಳನ್ನು ಗದರಿಸುವ ದೃಶ್ಯವಿದೆ. ಅಂದರೆ, ಇದು ತಾಯಿ ಕಡೇ ಬಾರಿಗೆ ತನ್ನ ಮಕ್ಕಳನ್ನು ಬೀಳ್ಕೊಡುವ ದೃಶ್ಯ. ಇಲ್ಲಿಂದ ಈ ಮರಿಗಳು ಸ್ವತಂತ್ರವಾಗಿ ಬದುಕು ಕಟ್ಟಿಕೊಳ್ಳಬೇಕು. ತನ್ನದೇ ವ್ಯಾಪ್ತಿಯನ್ನು ಹುಡುಕಿಕೊಳ್ಳಬೇಕು. ಇಷ್ಟು ದಿನ ತಾಯಿಯ ನೆರಳಿನಲ್ಲೇ ಓಡಾಡುತ್ತಿದ್ದ ಈ ಮರಿಗಳು ಇನ್ನು ಸ್ವತಂತ್ರ. ಹುಟ್ಟಿದ 18 ತಿಂಗಳಿನಲ್ಲಿ ಹುಲಿ ಮರಿಗಳು ಬೇಟೆಯನ್ನು ಕಲಿಯುತ್ತವೆ. ಆದರೆ, ಸುಮಾರು ಎರಡೂವರೆ ವರ್ಷಗಳ ಕಾಲ ಈ ಹುಲಿಗಳು ತಾಯಿಯ ಜೊತೆಗೇ ಇರುತ್ತವೆ. ಇದಾದ ಬಳಿಕ ತಾಯಿ ಮರಿಗಳನ್ನು ತೊರೆಯುತ್ತದೆ ಎಂದು ಸುಸಂತ ನಂದ ತಮ್ಮ ಟ್ವಿಟ್ಟರ್ ಪೋಸ್ಟಿನಲ್ಲಿ ತಿಳಿಸಿದ್ದಾರೆ.
ಕೊನೆಯ ವಿದಾಯ...
| Representative image | Image by WikiImages from Pixabay.jpg
ಸುಮಾರು 30 ಸೆಕೆಂಡಿನ ಈ ವಿಡಿಯೋದಲ್ಲಿ ತಾಯಿ ಹುಲಿ ಮರಿಗಳಿಗೆ ಗದರುತ್ತಿದೆ. ಮರಿಗಳು ಮತ್ತೆ ಮತ್ತೆ ತಾಯಿ ಬಳಿ ಬರುವ ಯತ್ನ ಮಾಡುತ್ತವೆ. ಆದರೆ, ತಾಯಿ ಇವುಗಳನ್ನು ಶತ್ರುಗಳನ್ನು ಓಡಿಸಿದಂತೆ ಓಡಿಸುತ್ತದೆ. ಹೀಗಾಗಿ, ಕೊನೆಗೆ ತಾಯಿಯ ಮನವೊಲಿಕೆ ಸಾಧ್ಯವಾಗದೆ ಮರಿಗಳು ಭಾರವಾದ ಹೃದಯದಿಂದಲೇ ತಮ್ಮ ಹೊಸ ಬದುಕನ್ನರಸಿ ಸಾಗುತ್ತವೆ. ಬಹುಶಃ ತಾಯಿ ಹುಲಿಗೂ ಆ ಕ್ಷಣಕ್ಕೆ ಮಕ್ಕಳ ಸ್ಥಿತಿ ನೋಡಿ ನೋವಾಗಬಹುದು. ಆದರೆ, ಮರಿಗಳನ್ನು ಸ್ವತಂತ್ರ್ಯವಾಗಿ ರೂಪಿಸಲು ಈ ತಾಯಿಗೆ ಇದಕ್ಕಿಂತ ಅನ್ಯ ಮಾರ್ಗ ತಿಳಿದಿಲ್ಲ ಪಾಪ...
ಇದು ನನ್ನದೇ ರಾಜ್ಯ...
| Representative image | Image by Marcel Langthim from Pixabay.jpg
ಮತ್ತೊಂದು ಕಡೆ ಸಿಂಹವೊಂದರ ವಿಡಿಯೋ ವೈರಲ್ ಆಗುತ್ತಿದೆ. ಸಾಮಾನ್ಯವಾಗಿ ಸಿಂಹಗಳು ಗರ್ಜಿಸಿ ತನ್ನ ವ್ಯಾಪ್ತಿಯನ್ನು ಎಲ್ಲಾ ಪ್ರಾಣಿಗಳಿಗೂ ತಿಳಿಸಿ ಹೇಳುತ್ತದೆ. ಈ ಗರ್ಜನೆಯೇ ಎದೆ ನಡುಗಿಸುವಂತಿರುತ್ತದೆ. ಇಂತಹದ್ದೇ ಸಿಂಹ ಗರ್ಜನೆಯ ದೃಶ್ಯ ಗುಜರಾತಿನ ಗಿರ್ ರಾಷ್ಟ್ರೀಯ ಉದ್ಯಾನವನದಲ್ಲಿ ಸೆರೆಯಾಗಿದೆ. ಭಾರತೀಯ ಅರಣ್ಯ ಸೇವೆಗಳ ಅಧಿಕಾರಿ ಅಂಕಿತ್ ಕುಮಾರ್ ಈ ವಿಡಿಯೋವನ್ನು ಶೇರ್ ಮಾಡಿದ್ದಾರೆ. ಒಂದು ರೀತಿಯಲ್ಲಿ ಈ ಗರ್ಜನೆ ಬೇರೆ ಪ್ರಾಣಿಗಳಿಗೆ ಸೂಚನೆ. ಅಂತೆಯೇ, ಈ ಸಿಂಹ ಕೂಡಾ ಗಾಂಭೀರ್ಯದಿಂದಲೇ ಕುಳಿತು `ಇದು ನನ್ನ ರಾಜ್ಯ' ಎಂಬಂತೆ ಎಲ್ಲರಿಗೂ ತಿಳಿಸಿ ಹೇಳುವಂತಿದೆ ಈ ದೃಶ್ಯ. ಸದ್ಯ ಈ ದೃಶ್ಯ ಸಾಮಾಜಿಕ ಮಾಧ್ಯಮಗಳಲ್ಲಿ ಸಖತ್ ಆಗಿಯೇ ವೈರಲ್ ಆಗುತ್ತಿದೆ.