ಆ್ಯಪ್ನಗರ

ಇಷ್ಟಾರ್ಥಗಳನ್ನು ಚೀಟಿಯಲ್ಲಿ ಬರೆದು ಈ ಕೋಟೆಯಲ್ಲಿ ಅಂಟಿಸಿದರೆ ಸಂಕಷ್ಟಗಳು ದೂರವಾಗುತ್ತದೆಯಂತೆ...!

ಪುರಾತನ ಕೋಟೆಗಳ ಹಿಂದೆ ಒಂದೊಂದು ಕತೆ ಇರುತ್ತವೆ, ಒಂದೊಂದು ರಹಸ್ಯ ಅಡಗಿರುತ್ತವೆ. ಆದರೆ, ಕೆಲವೊಂದು ಕೋಟೆಗಳು ರಹಸ್ಯದ ಜೊತೆಗೆ ಶೃದ್ಧಾ ಭಕ್ತಿಯ ಕೇಂದ್ರವೂ ಆಗಿರುತ್ತದೆ...

Vijaya Karnataka Web 25 Nov 2019, 7:57 am
ಪುರಾತನ ಕೋಟೆಗಳ ಹಿಂದೆ ಒಂದೊಂದು ಕತೆ ಇರುತ್ತವೆ, ಒಂದೊಂದು ರಹಸ್ಯ ಅಡಗಿರುತ್ತವೆ. ಆದರೆ, ಕೆಲವೊಂದು ಕೋಟೆಗಳು ರಹಸ್ಯದ ಜೊತೆಗೆ ಶೃದ್ಧಾ ಭಕ್ತಿಯ ಕೇಂದ್ರವೂ ಆಗಿರುತ್ತದೆ...
Vijaya Karnataka Web history of feroz shah kotla fort and mysterious story behind djinns
ಇಷ್ಟಾರ್ಥಗಳನ್ನು ಚೀಟಿಯಲ್ಲಿ ಬರೆದು ಈ ಕೋಟೆಯಲ್ಲಿ ಅಂಟಿಸಿದರೆ ಸಂಕಷ್ಟಗಳು ದೂರವಾಗುತ್ತದೆಯಂತೆ...!


ರಾಜಧಾನಿಯ ರಹಸ್ಯ ತಾಣ...

ದೆಹಲಿ... ನಮ್ಮ ದೇಶದ ಹೆಮ್ಮೆ... ಅದೆಷ್ಟೋ ಜನರಿಗೆ ಬದುಕು ಕಟ್ಟಿಕೊಟ್ಟ ನಗರವಿದು. ಐತಿಹಾಸಿಕವಾಗಿಯೂ ದೆಹಲಿಗೆ ಅದರದ್ದೇ ಆದ ಮಾನ್ಯತೆ, ಮಹತ್ವ ಇದೆ. ಇಲ್ಲಿ ಹೆಜ್ಜೆ ಹೆಜ್ಜೆಗೂ ಪುರಾತನ ಕಟ್ಟಡ, ಪುರಾತನ ಕೋಟೆ, ಪುರಾತನ ಬಾವಿ, ದೇಗುಲ, ಮಂದಿರ, ಮಸೀದಿಗಳು ಸಿಗುತ್ತವೆ. ಪ್ರವಾಸಿಗರನ್ನು ಸೂಜಿಗಲ್ಲಿನಂತೆ ಸೆಳೆಯುವ ಅದೆಷ್ಟೋ ಪ್ರದೇಶಗಳು ಇಲ್ಲಿವೆ. ಇಂತಹ ಐತಿಹಾಸಿಕ ಸ್ಥಳಗಳಲ್ಲಿ ಕೆಲವು ಸ್ಥಳಗಳು ರಹಸ್ಯ ಮತ್ತು ಭಯ ಹುಟ್ಟಿಸುವ ಕತೆಗಳ ಮೂಲಕವೂ ಗಮನ ಸೆಳೆಯುತ್ತವೆ. `ಆ ಜಾಗದಲ್ಲಿ ಅತಿಮಾನುಷ ಶಕ್ತಿಗಳಿವೆ' ಎಂಬ ಹಣೆಪಟ್ಟಿ ಕಟ್ಟಿಕೊಂಡ ಒಂದಷ್ಟು ಜಾಗಗಳೂ ಇಲ್ಲಿವೆ. ಅಂತಹ ಒಂದು ಸ್ಥಳ ಫಿರೋಜ್ ‍ಷಾ ಕೋಟ್ಲಾ ಕೋಟೆ...

ಕೋಟೆಯ ಇತಿಹಾಸ...

ಹಳೆ ಮತ್ತು ಹೊಸ ದೆಹಲಿಯ ನಡುವೆ ಇರುವ ಕೋಟೆ ಇದು. 1351ರಿಂದ 1384ರವರೆಗೆ ಆಳಿದ್ದ ಸುಲ್ತಾನ್ ಫಿರೋಜ್ ಷಾ ತುಘಲಕ್ ಈ ಕೋಟೆಯನ್ನು 1354ರಲ್ಲಿ ನಿರ್ಮಿಸಿದ್ದ. ಇದು ದೆಹಲಿಯಲ್ಲಿರುವ ಅತ್ಯಂತ ಪುರಾತನ ಜಾಗಗಳಲ್ಲಿ ಒಂದು. ಇತಿಹಾಸದ ಪ್ರಕಾರ ತುಘಲಕಾಬಾದ್‌ನಲ್ಲಿ ನೀರಿನ ಅಭಾವ ಕಂಡು ಬಂದ ಹಿನ್ನೆಲೆಯಲ್ಲಿ ಅಂದು ರಾಜಧಾನಿಯನ್ನು ಫಿರೋಜಾಬಾದ್‌ಗೆ ವರ್ಗಾಯಿಸಲಾಗಿತ್ತು. ನೀರಿನ ಅಭಾವ ಕೊನೆಯಾಗಲೆಂದು ಈ ಕೋಟೆಯನ್ನು ಯಮುನಾ ನದಿಯ ದಂಡೆಯಲ್ಲೇ ನಿರ್ಮಿಸಲಾಗಿದೆ. ತುಘಲಕಾಬಾದ್ ರಾಜವಂಶದ ಮೂರನೆಯ ಆಡಳಿತಗಾರನ ಆಳ್ವಿಕೆಯ ಸಂಕೇತವಾಗಿ ಈ ಕೋಟೆಯೊಳಗೆ ಮದರಸಾಗಳು, ಅರಮನೆಗಳು, ಸುಂದರವಾದ ಉದ್ಯಾನಗಳು ಮತ್ತು ಮಸೀದಿಗಳನ್ನು ನಿರ್ಮಿಸಲಾಗಿತ್ತು.

ಇಲ್ಲಿವೆಯಂತೆ ಅತಿಮಾನುಷ ಶಕ್ತಿಗಳು...

ಸದ್ಯ ಈ ಕೋಟೆ ಐತಿಹಾಸಿಕವಾಗಿ ಎಷ್ಟು ಮಹತ್ವ ಪಡೆದಿದೆಯೋ ಜನ ಮಾನಸದಲ್ಲಿ ಕಷ್ಟ ದೂರ ಮಾಡುವ ಸ್ಥಳವಾಗಿಯೂ ಅಷ್ಟೇ ಮಹತ್ವವನ್ನು ಪಡೆದಿದೆ. ಸ್ಥಳೀಯರ ನಂಬಿಕೆ ಪ್ರಕಾರ ಇಲ್ಲಿ ಜಿನ್‌ಗಳು ನೆಲೆಸಿವೆಯಂತೆ. ಈ ಜಿನ್‌ಗಳು ಜನರ ಕಷ್ಟವನ್ನು ಈಡೇರಿಸುತ್ತವೆಯಂತೆ. ತಮ್ಮ ಕಷ್ಟಗಳನ್ನು ಚೀಟಿಯಲ್ಲಿ ಬರೆದು ಗೋಟೆಗೆ ಅಂಟಿಸಿ ಭಕ್ತಿಯಿಂದ ನಮಿಸಿದರೆ ಈ ಜಿನ್‌ಗಳು ಇವೆಲ್ಲವನ್ನೂ ಈಡೇರಿಸುತ್ತವೆ, ಕಷ್ಟ ದೂರ ಮಾಡುತ್ತವೆ ಎಂಬ ನಂಬಿಕೆ ಸ್ಥಳೀಯರದ್ದು. ಅದೂ ಅಲ್ಲದೆ, ಅಪರಿಮಿತ ಶಕ್ತಿ ಹೊಂದಿರುವ ಈ ಜಿನ್‌ಗಳು ಜನರ ಮೇಲೆ ಆವರಿಸಿರುವಂತಹ ದೆವ್ವ, ಪಿಶಾಚಿಗಳನ್ನೂ ದೂರ ಮಾಡುತ್ತವೆಯಂತೆ. ಹೀಗಾಗಿ, ಇಲ್ಲಿ ಭೂತೋಚ್ಚಾಟನೆ ಮಾಡಲು ಬರುವವರ ಸಂಖ್ಯೆಯೂ ಅಧಿಕವಾಗಿರುತ್ತದೆ. ಈ ಜಿನ್‌ಗಳಿಗೆ ಸಾವಿರಾರು ವರ್ಷಗಳ ಕಾಲ ಬದುಕುವ ಶಕ್ತಿ ಇದೆಯಂತೆ. ಜೊತೆಗೆ, ಮನುಷ್ಯರನ್ನು ವಶೀಕರಣ ಮಾಡುವ ಸಾಮರ್ಥ್ಯವೂ ಇವುಗಳಿಗಿವೆ ಎಂಬುದು ಜನರ ನಂಬಿಕೆ. ಇದೇ ಕಾರಣಕ್ಕೆ ಈ ಕೋಟೆಯ ಒಂದು ಸ್ಥಳ ತುಂಬಾ ಶೃದ್ಧಾ ಭಕ್ತಿಯ ಕೇಂದ್ರವಾಗಿದೆ. ಗುರುವಾರ ಜನರು ಇಲ್ಲಿಗೆ ಬಂದು ಮೊಂಬತ್ತಿಯನ್ನು ಹಚ್ಚಿ ತಮ್ಮ ಇಷ್ಟಾರ್ಥ ಸಿದ್ಧಿಗಾಗಿ ಬೇಡಿಕೊಳ್ಳುತ್ತಾರೆ. ಚೀಟಿಯಲ್ಲಿ ಕಷ್ಟವನ್ನು ಬರೆದು ಪರಿಹರಿಸುವಂತೆ ನಿವೇದಿಸಿಕೊಳ್ಳುತ್ತಾರೆ. ಈ ಹಿಂದೆ ಇಲ್ಲಿ ಕೆಲವರಿಗೆ ತುಂಬಾ ಘೋರ ಶಿಕ್ಷೆ ನೀಡಲಾಗುತ್ತಿತ್ತು. ಹೀಗೆ ಶಿಕ್ಷೆ ಪಡೆದು ಸಾವನ್ನಪ್ಪಿರುವವರ ಆತ್ಮ ಇಲ್ಲಿ ಜಿನ್‌ಗಳ ರೂಪದಲ್ಲಿ ಜನರ ಕಷ್ಟ ದೂರ ಮಾಡುತ್ತಿವೆ ಎಂಬ ನಂಬಿಕೆ ಕೂಡಾ ಇದೆ.

1977ರ ಮಾತು...

ತಜ್ಞರ ಮಾತುಗಳನ್ನೇ ನಂಬುವುದಾದರೆ 1977ರಿಂದ ಈಚೆಗೆ ಈ ಜಿನ್‌ಗಳ ಕತೆ, ನಂಬಿಕೆ ಜೋರಾಗಿದ್ದಂತೆ. ಭಾರತದಲ್ಲಿ ತುರ್ತು ಪರಿಸ್ಥಿತಿ ಹೇರಿಕೆಯಾದ ಸ್ವಲ್ಪ ತಿಂಗಳ ನಂತರ ಜನ ಇಲ್ಲಿ ಬಂದು ಸೇರಿಕೊಳ್ಳುತ್ತಿದ್ದರಂತೆ. ಹೀಗಾಗಿ, ಸುಮಾರು ನಾಲ್ಕು ದಶಕಗಳ ಹಿಂದಿನಿಂದ ಇಲ್ಲಿ ಜಿನ್‌ಗಳ ಅಸ್ಥಿತ್ವದ ಕತೆ ಆರಂಭವಾಗಿತ್ತು ಎನ್ನಲಾಗುತ್ತಿದೆ. 14ನೇ ಶತಮಾನದಲ್ಲಿ ನಿರ್ಮಾಣವಾದ ಈ ಸುಂದರ ಕೋಟೆ ಒಂದು ಕಾಲದಲ್ಲಿ ಸುಂದರ ದಿನಗಳನ್ನು ಕಂಡಿತ್ತು. ಕಾಲದ ಹೊಡೆತಕ್ಕೆ ಕೋಟೆಯ ವೈಭವ ಮರೆಯಾಗಿರಬಹುದು ನಿಜ. ಆದರೆ, ಈ ಕೋಟೆಯ ಒಂದೊಂದು ಕಲ್ಲು ಕಲ್ಲು ಕೂಡಾ ಅಂದಿನ ದಿನಗಳನ್ನು ಈಗಲೂ ನೆನಪಿಸುತ್ತವೆ...

ನೋಡಲು ಸುಂದರ ತಾಣ...

ಫಿರೋಜಾ ಷಾ ಕೋಟ್ಲಾ ಕೋಟೆ ಸದ್ಯ ಶೃದ್ಧಾಭಕ್ತಿಯ ಕೇಂದ್ರದೊಂದಿಗೆ ಇತರ ಭಯಾನಕ ಕತೆಗಳಿಗೂ ವಸ್ತುವಾಗಿದೆ ನಿಜ. ಇಲ್ಲಿನ ಅಲೌಕಿಕ ಶಕ್ತಿಗಳನ್ನು ನಂಬುವವರೂ ಹಲವರು ಇದ್ದಾರೆ ಎಂಬುದೂ ಸತ್ಯ. ಆದರೆ, ಈ ಅಲೌಕಿಕ ಶಕ್ತಿಯನ್ನು ನಂಬುವವರು ಮತ್ತು ನಂಬದೇ ಇರುವವರಿಗೂ ಈ ಫಿರೋಜಾ ಷಾ ಕೋಟ್ಲಾ ಕೋಟೆ ವೀಕ್ಷಣೆಗೆ ಬೇಕಾದಂತಹ ಅದ್ಭುತ ಜಾಗವಿದು. ದೆಹಲಿಗೆ ಎಂದಾದರೂ ಹೋದಾಗ ಈ ಜಾಗಕ್ಕೂ ಭೇಟಿ ಕೊಡಬಹುದು. ಯಾಕೆಂದರೆ, ವಿಸ್ತಾರವಾದ ಕೋಟೆ, ಕೋಟೆಯ ವಿನ್ಯಾಸದ ಸೊಬಗು ನಿಮ್ಮನ್ನು ಸೆಳೆಯದೇ ಇರದು. ಜೊತೆಗೆ, ಅದ್ಭುತ ಮೆಟ್ಟಿಲುಗಳ ಬಾವಿ, ಅಶೋಕನ ಕಾಲದ ಕಲ್ಲಿನ ಬೃಹತ್ ಸ್ಥಂಭ, ರಹಸ್ಯ ಕೋಣೆಗಳು... ಹೀಗೆ ಎಲ್ಲವೂ ನಿಮ್ಮನ್ನು ಸೆಳೆಯುವ ತಾಕತ್ತು ಹೊಂದಿವೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ