ನಟ ಶಿವರಾಜ್ಕುಮಾರ್ಗೆ ಕ್ರಿಕೆಟ್ ಅಂದ್ರೆ ಪಂಚಪ್ರಾಣ. ಅನೇಕ ಬಾರಿ ಅದನ್ನು ಅವರು ಹೇಳಿಕೊಂಡಿದ್ದಾರೆ ಕೂಡ. ಕರ್ನಾಟಕದ ಕ್ರಿಕೆಟ್ ಆಟಗಾರರೊಂದಿಗೆ ಉತ್ತಮ ಒಡನಾಟ ಹೊಂದಿದ್ದಾರೆ ಶಿವಣ್ಣ. ವಯಸ್ಸು 58 ಆಗಿದ್ದರೂ, ಈಗಲೂ ಹರೆಯದ ಯುವಕನಂತೆ ಮೈದಾನದಲ್ಲಿ ಕ್ರಿಕೆಟ್ ಆಡುತ್ತಾರೆ ಶಿವಣ್ಣ. ಮೊದಲೆಲ್ಲ ಶೂಟಿಂಗ್ ಇರುತ್ತಿದ್ದರಿಂದ ಕ್ರಿಕೆಟ್ ಆಡಲು ಅವರಿಗೆ ಜಾಸ್ತಿ ಸಮಯ ಸಿಗುತ್ತಿರಲಿಲ್ಲ. ಆದರೆ, ಈಗ ಕೊರೊನಾ ವೈರಸ್ ಹಾವಳಿ ಇರೋದ್ರಿಂದ ಸಿನಿಮಾ ಚಿತ್ರೀಕರಣ ನಡೆಯುತ್ತಿಲ್ಲ. ಸದ್ಯಕ್ಕಂತೂ ಅವರು ಮನೆಯಲ್ಲಿ ಇದ್ದಾರೆ. ಈ ವೇಳೆ ಅವರು ಸ್ನೇಹಿತರೊಂದಿಗೆ ಸೇರಿಕೊಂಡು ಕ್ರಿಕೆಟ್ ಆಡುತ್ತಿದ್ದಾರೆ. ಪ್ರತಿ ಎರಡು ದಿನಗಳಿಗೊಮ್ಮೆ ಅವರು ಮನೆಯ ಸುತ್ತಮುತ್ತವೇ ಕ್ರಿಕೆಟ್ ಆಡುತ್ತಾರೆ. ಇನ್ನು, ನಟ ಪುನೀತ್ ರಾಜ್ಕುಮಾರ್ ಕೂಡ ಕ್ರಿಕೆಟ್, ಫುಟ್ಬಾಲ್ ಆಡುತ್ತಾರೆ.
'ಪ್ರತಿದಿನ ಒಂದು ಗಂಟೆ ಕಾಲ ವರ್ಕೌಟ್ ಮಾಡುತ್ತೇನೆ. ಮೈಂಡ್ ರಿಫ್ರೆಶ್ ಆಗಲು ಕ್ರಿಕೆಟ್ ಆಡೋಣ ಎಂದು ಕೆ. ಪಿ. ಶ್ರೀಕಾಂತ್ ಅವರಿಗೆ ಹೇಳಿದ್ದೆ. ಅವರೆಲ್ಲರೂ ದಿನ ಬಿಟ್ಟು ದಿನ ನಮ್ಮ ಮನೆ ಹತ್ತಿರ ಬರುತ್ತಾರೆ. ಸಂಜೆ 4.30ರಿಂದ 6.30ರವರೆಗೆ ಆಡುತ್ತೇವೆ. ಮೊನ್ನೆ ಭಾರತ ತಂಡದ ಮಾಜಿ ಕ್ರಿಕೆಟಿಗ ವಿಜಯ್ ಭಾರದ್ವಾಜ್ ಬಂದಿದ್ದರು. ಆಗಲೂ ಒಂದು ಗಂಟೆ ಕ್ರಿಕೆಟ್ ಆಡಿದೆವು. ಎಲ್ಲರೂ ಸೇರಿ ಖುಷಿಯಿಂದ ಕಳೆಯುವ ಸಮಯ ಅದಾಗಿದೆ' ಎಂದು ಕ್ರಿಕೆಟ್ ಆಡುವುದರ ಕುರಿತು ಈ ಹಿಂದೆ ಮಾಹಿತಿ ನೀಡಿದ್ದರು ಶಿವಣ್ಣ. ಸದ್ಯ ಅವರು ಕ್ರಿಕೆಟ್ ಆಡುತ್ತಿರುವ ವೇಳೆ ಛಾಯಾಗ್ರಾಹಕ ಚಂದನ್ ಗೌಡ ಕ್ಲಿಕ್ಕಿಸಿರುವ ಫೋಟೋಗಳು ಇಲ್ಲಿವೆ.