ನಟ ಪುನೀತ್ ರಾಜ್ಕುಮಾರ್ ಚಿತ್ರರಂಗಕ್ಕೆ ಕಾಲಿಟ್ಟು 45 ವರ್ಷಗಳು ಕಳೆದಿವೆ. ಬಾಲನಟನಾಗಿ ಪ್ರೇಕ್ಷಕರ ಮುಂದೆ ಬಂದ ಅಪ್ಪು ಒಟ್ಟಾರೆಯಾಗಿ 49 ಸಿನಿಮಾಗಳಲ್ಲಿ ನಟಿಸಿದ್ದಾರೆ. ನಟಸಾರ್ವಭೌಮ ಡಾ ರಾಜ್ಕುಮಾರ್ ಮಗನಾದರೂ ಕೂಡ ನಟನೆ, ಗಾಯನ, ಪರಿಶ್ರಮದ ಮೂಲಕ ದೊಡ್ಡ ಅಭಿಮಾನಿ ಬಳಗ ಸೃಷ್ಟಿ ಮಾಡಿಕೊಂಡಿದ್ದಾರೆ. ಚಿಕ್ಕ ಮಕ್ಕಳಿಂದ ಹಿಡಿದು, ವೃದ್ಧರವರೆಗೂ ಕೂಡ ಅವರಿಗೆ ಅಭಿಮಾನಿಗಳಿದ್ದಾರೆ. ಫಿಟ್ನೆಸ್ ಕಡೆಗೆ ಸದಾ ಗಮನಕೊಡುವ ಪುನೀತ್ ರಾಜ್ಕುಮಾರ್ ಹೃದಯಾಘಾತದಿಂದ ನಿಧನರಾಗಿದ್ದಾರೆ ಎನ್ನೋದನ್ನು ಯಾರಿಗೂ ಅರಗಿಸಿಕೊಳ್ಳಲಾಗುತ್ತಿಲ್ಲ. ಬೆಂಗಳೂರಿನ ವಿಕ್ರಮ್ ಆಸ್ಪತ್ರೆಯಲ್ಲಿ ಪುನೀತ್ ರಾಜ್ಕುಮಾರ್ ಕೊನೆಯುಸಿರೆಳೆದಿದ್ದಾರೆ. ಪುನೀತ್ ನಿಧನಕ್ಕೆ ಕನ್ನಡ ಚಿತ್ರರಂಗ ಸೇರಿದಂತೆ ಉಳಿದ ಚಿತ್ರರಂಗ ಕೂಡ ಸಂತಾಪ ಸೂಚಿಸುತ್ತಿದೆ. ಸದ್ಯ ಪುನೀತ್ ಪಾರ್ಥಿವ ಶರೀರವನ್ನು ಅವರ ಬೆಂಗಳೂರಿನ ಸದಾಶಿವನಗರದಲ್ಲಿರುವ ನಿವಾಸಕ್ಕೆ ತೆಗೆದುಕೊಂಡು ಹೋಗಲಾಗಿದೆ. ಬೆಂಗಳೂರಿನ ಕಂಠೀರವ ಸ್ಟುಡಿಯೋದಲ್ಲಿ ಅಂತಿಮ ಸಂಸ್ಕಾರಕ್ಕೆ ವ್ಯವಸ್ಥೆ ಮಾಡಲಾಗಿದೆ. 'ನಟ ಸಾರ್ವಭೌಮ', 'ಯುವರತ್ನ', 'ಆಕಾಶ್', 'ಅಪ್ಪು', 'ಅಭಿ', 'ಜಾಕಿ' 'ಮೌರ್ಯ', 'ಯಾರೇ ಕೂಗಾಡಲಿ', 'ಅಣ್ಣಾ ಬಾಂಡ್', 'ರಾಜಕುಮಾರ', 'ಅಂಜನಿ ಪುತ್ರ', 'ದೊಡ್ಮನೆ ಹುಡುಗ', 'ಮೈತ್ರಿ', 'ರಣವಿಕ್ರಮ', 'ಪವರ್', 'ನಿನ್ನಿಂದಲೇ', 'ರಾಮ್' ಮುಂತಾದ ಸಿನಿಮಾಗಳಲ್ಲಿ ಪುನೀತ್ ರಾಜ್ಕುಮಾರ್ ಬಣ್ಣ ಹಚ್ಚಿದ್ದಾರೆ.