ನೈರೋಬಿ: ಇಡೀ ವಿಶ್ವವೇ ಕೊರೊನಾ ವೈರಸ್ನಿಂದ ತತ್ತರಿಸಿದೆ. ಆದರೆ, ಕೀನ್ಯಾದಲ್ಲಿ ಕಳೆದ ಮೂರು ವಾರಗಳಲ್ಲಿ ಪ್ರವಾಹಗಳಿಂದ 194 ಮಂದಿ ಸಾವಿಗೀಡಾಗಿದ್ದು, ಒಂದು ಲಕ್ಷಕ್ಕೂ ಹೆಚ್ಚು ಜನರು ಸ್ಥಳಾಂತರಗೊಂಡಿದ್ದಾರೆ ಎಂದು ಅಲ್ಲಿನ ಅಧಿಕಾರಿಗಳು ಬುಧವಾರ ತಿಳಿಸಿದ್ದಾರೆ. ಭಾರೀ ಮಳೆಯಿಂದ ಉಂಟಾದ ಪ್ರವಾಹಗಳಿಂದಾಗಿ ಮನೆಗಳು, ವಾಣಿಜ್ಯ ಸಮುಚ್ಛಯಗಳು ಮತ್ತು ಕೃಷಿ ತೋಟಗಳು ಹಾನಿಯಾಗಿವೆ ಎಂದು ಅಲ್ಲಿನ ಸಂಪುಟ ಕಾರ್ಯದರ್ಶಿ ಯುಗೇನ್ ವಾಮಲ್ವಾ ತಿಳಿಸಿದ್ದಾರೆ. ಪ್ರವಾಹ ಸಂತ್ರಸ್ತರ ಶೋಧ ಮತ್ತು ರಕ್ಷಣಾ ಕಾರ್ಯ ತೀವ್ರಗೊಳಿಸಲಾಗುವುದು. ಸಂತ್ರಸ್ತರಿಗೆ ಆಶ್ರಯ, ಆಹಾರ, ಶುದ್ಧ ಕುಡಿಯುವ ನೀರು ಮತ್ತು ಜೀವರಕ್ಷಕ ಔಷಧಗಳನ್ನು ಒದಗಿಸಲಾಗುವುದು ಎಂದು ಅವರು ಹೇಳಿದ್ದಾರೆ.